هـەکـە شـەڕ بەردەوام بیت دێ گـوهۆڕینێن مـەزن روو دەن
پەیڤدارێ وەزارەتا دەرڤە یا ئیرانێ دیار کر، بەری دو رۆژان هێزێن وان شیاینە ل رۆژهەلاتێ ئیرانێ فرۆکەکا بێ فرۆکەڤان یا ئسرائیلێ ژناڤ ببەن کو دخواست سیخوریێ ل هندەک جهێن سەرباز یێ ئیرانێ بکەت، ئەو یەک ژی نیشا ددەت ئیسرائیلێ دڤێت ئاریشان بۆ ئیرانێ دروست بکەت، لێ دڤێت بەرپرسێن ئسرائیلێ ژی باش بزانن ئیران وەلاتەک بهێزە و ئەو شیان یێت هەین ل هەر جهەکێ کو بڤێت ب توندی بەرسڤا ئسرائیلێ بدەت.
ناسر کەنعانی ئەو یەک ژی دیار کر، نها شەرەک گەلەک مەزن ل غەزە هەیە، هەتا نها ژی ئسرائیلێ نەشیایە د شەری دا سەرکەفتی بیت، بەرەیەک بهێز نها ل دژی ئسرائیلێ هەیە، خەلکێ غەزە و هەموو گەلێ موسلمان ل جیهانێ نها ل دژی ئسرائیلێ نە، ل گەلەک وەلاتێن جیهانێ ژی خەلک ب رێیا خوەنیشادانان زۆرداریا ئسرائیلێ و کوشتنا ژن و زارۆیان ل غەزە شەرمزار دکەن، ئەو یەک ژی شکەستنەکا مەزنە بۆ ئسرائیلێ و ئێدی جڤاکێ نێڤدەولەتی ژی نەشێت وەکو بەرێ ل هەمبەر زۆرداریا ئسرائیلێ یا بێدەنگ بیت.
ناڤهاتی ئەو یەک ژی دیار کر، دڤێت ئێرشێن نها یێن ئسرائیلێ ل سەر غەزە بهێنە راگرتن، رۆژانە ژن و زارۆ دهێنە کوشتن، کارەساتێن مرۆڤی ل غەزە روو ددەن، مخابن جڤاکێ نێڤدەولەتی ل هەمبەر زۆرداریا ئسرائیلێ وەکو پێدڤی خوەدان هەلوەست نەبوویە، لێ هەکە رەوش وەسا بەردەوام بیت دێ گوهۆڕینێن مەزن ل دەڤەرێ روو دەن.
ئەو یەک د دەمەکێ دایە کو جارەکا دی سەرۆک وەزیرێن ئسرائیلێ بنیامین نەتانیاهۆ راگەهاند، د رەوشا نها دا ئەو هزر د راگەهاندنا ئاگربەستێ دا ناکەن، چونکی ئاگربەست د بەرژەوەندیا حەماسێ دایە، وان دڤێت دربێن کوژەک ل حەماسێ بدەن دا شیانێن سەربازی یێن وێ رێکخستنێ ژناڤ ببەن، ژ بەر هندێ ژی ئسرائیل ب هەموو شیانێن خوە دێ ئێرشی حەماسێ کەت.
چاڤدێرێن سیاسی ژی دیار دکەن د سەرەدانا ڤێ دووماهیێ یا وەزیرێ دەرڤە یێ ئەمریکا بۆ رۆژهەلاتا ناڤین دا ئەمریکا ب رەنگەکێ ئاشکرا دیار کریە، نها رەوش بۆ راگەهاندنا ئاگربەستێ گونجای نینە، چونکی ئسرائیلێ ئەو مافە یێ هەی بەرگریێ ل خوە بکەت، ئەڤ هەلوەستێ ئەمریکا ژی ب دلێ وەلاتێن عەرەبی نینە، چونکی پرانیا وەلاتێن عەرەبی نها ناخوازن شەر بەردەوام بیت، ئەو داخواز ژ ئەمریکا دکەن کار بۆ راگەهاندنا ئاگربەستەکێ بهێتە کرن دا هاریکاریێن مرۆڤی بگەهنە غەزە، لێ ئەمریکا و ئسرائیل دخوازن پشتی سەرکەفتنا ئسرائیلێ د شەری دا ئەو کار بۆ راگەهاندنا ئاگربەستێ بکەن، ژ بەر ڤێ یەکێ ژی دهێتە چاڤەرێکرن شەرێ نها د ناڤبەرا ئسرائیلێ و حەماسێ دا بۆ دەمەکێ ب دژواری بەردەوام بیت.
