هێزێن سیاسی ل تورکیا خوە بۆ هەلبژارتنێن باژێرڤانیان بەرهەڤ دکەن
هێزێن سیاسی ل تورکیا خوە بۆ هەلبژارتنێن باژێرڤانیان ل ئادارا سالا بهێت بەرهەڤ دکەن و سەرۆکێ نوو یێ پارتا کۆماری ژی دیار دکەت، ئەو دێ رێژا دەنگێن خوە گەهیننە ٣٥٪ و ئاکپارتی ژی کار بۆ بدەستڤەئینانا سەرۆکاتیا هەر دو باژێرڤانیێن ئستەنبۆل و ئەنقەرە دکەت.
ئۆزگور ئۆزەل سەرۆکێ نوو یێ پارتا کۆماریا گەل د داخۆیانیەکێ دا راگەهاند، وەکو پارتا کۆماری وان دەست ب قۆناغەکا نوو کرینە، ئەو دێ گەلەک گوهۆڕینێن مەزن کەن، چونکی وان دڤێت وەکو پارتا هەری مەزن یا ئۆپۆزسیۆنێ ببنە جهێ باوەریا خەلکی، ژ بەر ڤێ یەکێ ژی وان دەست ب بەرهەڤیێن خوە بۆ هەلبژارتنێن باژێرڤانیان کرینە و وەکو جەهەپە وان دڤێت رێژەیا دەنگێن خوە زێدە بکەن و دڤێت د ڤان هەلبژارتنان دا ئەو بشێن ٣٥٪ ژ دەنگان بدەستڤە بینن.
ناڤهاتی ئەو یەک ژی دیار کر، باوەریا خەلکی ب دەستهەلاتێ لاواز بوویە، ژ بەر ڤێ یەکێ ژی جەهەپە دشێت ببیتە جهێ باوەریا هەموو گەلێ تورکیا، چونکی چو پرۆژێن ئاکپارتیێ بۆ چارەسەرکرنا قەیرانێن نها ل تورکیا نینن، ئاکپارتی ئێدی نەشێت چو بۆ تورکیا بکەت، ژ بەر ڤێ یەکێ ژی هەلبژارتنێن باژێرڤانیان بۆ پارتا کۆماری گەلەک گرنگن، سەرکەفتنا پارتا کۆماری د ڤان هەلبژارتنان دا دێ بیتە پێنگاڤا ئێکێ یا لاوازبوونا ئاکپارتیێ و دوورخستنا وێ ژ دەستهەلاتێ.
ل ئالیێ دی بەرپرسەکێ ئاکپارتیێ ژی راگەهاند، هەلبژارتنێن ڤێجارێ یێ باژێرڤانیان بۆ ئاکپارتیێ تایبەتیا خوە یا هەی، ئاکپارتیێ شیا د هەلبژارتنێن سەرۆک کۆماریێ و پەرلەمانی دا سەرکەفتنەکا مەزن تۆمار بکەت و ببیتە جهێ باوەریا خەلکی، نها ژی ئاکپارتی کار ل سەر هندێ دکەت هەر دو باژێرڤانیێن هەری مەزن ئانکۆ سەرۆکاتیا باژێرڤانیێن ئستەنبۆل و ئەنقەرە ژ دەستێ پارتا کۆماری دەرخینیت، ژ بۆ هندێ ژی ئەو دێ بۆ ڤان هەلبژارتنان کەسێن دلسۆز و ئەکادیمی و جهێ باوەریا خەلکی بۆ سەرۆکاتیا باژێرڤانیان بەربژار کەن، چونکی سەرکەفتنا ئاکپارتیێ د ڤان هەلبژارتنان دا دێ بیتە ئەگەرێ بهێزبوونا پێگەهێ ئاکپارتیێ.
چاڤدێرێن سیاسی ژی دیار دکەن، هەلبژارتنێن باژێرڤانیان یێن ئادارا سالا بهێت بۆ هەموو پارتێن سیاسی یێن تورکیا گرنگن، نها ئاکپارتی و پارتا بزاڤا نەتەوەپەرست دخوازن بەری هەلبژارتنێن باژێرڤانیان هەدەپە بهێتە داخستن و گەلەک ژ سەرکردێن وێ ژی ژ کاری بهێنە دوورخستن و قەدەغەیا سیاسەتکرنێ ژی ل سەر وان بهێتە سەپاندن، هەکە بەری هەلبژارتنان ئەو کارەکێ وەسا بکەن رەنگە ببیتە ئەگەرێ هندەک گوهۆڕینێن نەچاڤەرێکری د هەلبژارتنان دا، چونکی ئاکپارتیێ دڤێت رێژەیا دەنگێن خوە ل باکورێ کوردستانێ زێدەتر لێ بکەت، لێ هەدەپێ ژی ل ژێر ناڤێ پارتەکا نوو خوە بۆ هەر ئەگەرەکێ بەرهەڤ کریە و دڤێت رێژەیا دەنگێن خوە بپارێزیت و هەتا زێدەتر ژی بکەت.
