سالا نوو گوهۆڕین د بەلاڤكرنا ئاهێن خوارنێ دا دێ هێنە كرن
هەولێر، قائید میرۆ:
رێڤەبەرێ گشتیێ بازرگانی ل هەرێما كوردستانێ دیار كر، وەلاتی و بریكارێن ئاهێن خوارنێ ب رێیا ئنتەرنێتێ دێ پێكڤە هێنە گرێدان و دبێژیت: ناڤێن زێدە و مریان دێ هێنە لادان و ب ڤی پارەی دێ ماددەیێن دی بۆ وەلاتیان هێنە زێدەكرن.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیار كر، پرۆسا ئەلكترۆنیكرنا پلێتێن ئاهێن خوارنێ یا بەردەوامە و ل دهۆكێ 97%ێ ب دوماهی هاتیە و گۆت: «بڕیارە ل پارێزگەهێن سلێمانی و هەولێرێ ژی بهێتە بجهئینان، بەلێ هێشتا كارت بۆ ئەلكترۆنیكرنا وان هەردو پارێزگەهان نەهاتینە چاپكرن، ئەم چاڤەڕێی بەغدا دكەین بۆ دەستپێكرنا قووناغا سێیێ، ئەپلیكەیشنەك دێ هێتە دانان و هەموو خێزان دێ ل گەل بریكارێن ئاهێن خوارنێ هێنە گرێدان، ل هەموو دەڤەران ئنتەرنێت نینە، نوكە مژوولی بجهئینانا ئەڤی سیستەمینە».
نەوزاد شێخ كامل گۆتژی: «پشتی پلێتێن ئاهێن خوارنێ دبنە ئەلكترۆنی هەموو ئەو كەسێن مری و یێن ل دەرڤەی وەلاتی و ناڤێن زێدە دێ هێنە لادان و ئەو پارە بۆ حوكمەتێ دێ ڤەگەڕیت و دوبارە دێ ئاهێن خوارنێ ب ئەڤی پارەی هێنە زێدەكرن، پلان هەیە بۆ سالا نوو گوهۆڕین بكەڤیتە بەلاڤكرنا ئاهێن خوارنێ، چونكی ئەو ناڤێن زێدە بهێنە لادان دێ پارە زێدە بیت، دشێن ماددێن دی زێدە بكەن».
