گەنجەك ب رێیا بەلاڤكرنا پێزانینێن سەیر خزمەتێ دكەت
گەنجەك دبێژیت، هەر چەندە ب رێیا تۆرێن فەیسبوك و ئینستیگرامی چ داهات بۆ من ناهێت، بەلێ من دڤێت خزمەتێ بكەم و ب تایبەت بۆ گەنجان و گۆت: (بێگومان هەر بابەتەكێ ئەز بەلاڤ دكەم ژێدەرێ خۆ یێ تایبەت هەیە و ژ سایتێن جیهانی یێن باوەرپێكرینە).
بایز عەبدوالرەحمان، گەنجەكێ خودان شیانە، د دیدارەكێ دا بۆ رۆژناما ئەڤرۆ دیار كر، هەر ژ دەسپێكا دەركەفتنا سوشیال میدیایێ من كار تێداكریە، ب تایبەت دروستكرنا پەیجێن من یێن بەلاڤكرنا پێزانینێن سەیر ل سالا 2016 وەرە ئەز تێدا كاردكەم و گۆت» (من هەر ژ دەسپێكا خۆ حەز ژ خواندنێ و دووڤچونا بابەتان كریە، من دڤێت یا ئەز دزانم بەلاڤ بكەم دا كو خەلك ژی و ب تایبەتی گەنج بۆ خۆ مفای ژێ وەربگرن).
بایزی گۆت ژی: هەر بابەتەكێ ئەز بەلاڤ دكەم ژێدەرێن خۆ یێن تایبەت هەنە و ژ سایتێن جیهانی یێن باوەرپێكرینە، ئەگەر ئەز 100%یێ ژێ پشت راست نەبم وی بابەتی بەلاڤ ناكەم، ئەگەر هات و جارەكێ بابەتەك خەلەت بەلاڤبوو و پاشی راستیا وی دیاربوو، ئەم داخوازا لێبورینێ ژ هەڤالان دخوازین.
د بەردەوامیا ئاخفتنا خۆ دا بایزی دیار ژی كر، ب رێیا كومپانیێن فەیسبوكی و ئینستیگرامی و هەموو تۆرێن كومەلایەتی هیچ داهاتەك بۆ من پێڤە ناهیت، ب تنێ ئەو نەبیت ئەز جارەكێ ریكلامەكێ د پەیجێن خودا بەلاڤبكەم و گۆت: (ژبەركو پەیجێن من بینەرێن زور هەنە، لەوما ئەز دبینم تاراددەیەكێ زور خزمەتا وان دكەم، هەر چەندە دڤێت ئەو ڤێ بریارێ بدەن، بەلێ ئەز ژ بینەریا وان و دووڤچوونا وان دزانم، ژبەركو من ژی ئارمانجەك ژ ڤێ وەستیانێ هەیە).
ل دووماهیێ ژی گۆت: ئەڤ ئەنترنێتا نوكە ل بەردەستێن مە نیعمەتەكا مەزنە ژ دەڤ خودێ، بەلێ ئەگەر مروڤ ب دروستی بكاربینیت، ژ بەر كو بابەت و كورس و كارێن گەلەك ب مفا د ناڤدا هەنە، لەوما ژی ئەز داخوازێ ژ هەموو گەنجان دكەم دووڤچوونێ بۆ بكەن و بەردەوام خۆ پێشبێخن و نەمیننە ب تشتێن بێ رامان ڤە.
