ئەگەر خەلكی نانەك هەبا دا دەنە پێشمەرگەی و زارۆكێن خوە دهێلانە برسی
ديدار، سالار محةمةد دؤسكى:
پێشمەرگەیێ شۆڕەشا گولانێ (جەهوەر نەمر خدر) ل 15/6/1958 ل ئێسفنێ ل قەزا شێخان ژ دایك بوویە، خواندنا سەرەتایی و ناڤنجی ل هەمان قەزایێ و ئامادەیی ل پیشەسازییا مۆیسل ل سالا 1979 ب دووماهی ئینایە.
پێشمەرگەیێ شۆڕەشا گولانێ (جەهەوەر نەمر خدر)، د دیدارەكا رۆژنامەڤانی دا بۆ رۆژناما ئەڤرۆ بەحسێ پەیوەندیێن بنەمالا خوە ل گەل پارتی دیموكراتی كوردستان دكەت گۆت: دووماهی یا سالێت چلان و دەسپێكا سالێت پێنجیان مامێ من (جوقی) چالاكیێن باش ل گەل پارتی دیموكراتی كوردستان هەبوون، و دووڤدا بابێ من خودێ ژ هەردوكان رازی بیت هەتا سالا 1959، و مامێ من خودێ ژێ رازی (سلۆ خدر) بوویە ئەندامێ پارتی دیموكراتی كوردستان، ل سالا 1961ێ ژ قوتابخانێ هاتیە دەرخستن و ل گەل كومەكا هەڤالێن خوە چووینە ئەلقوش بەردەوامی دا ب دەواما خوە، و دووڤدا هاتبوو دەستەسەركرن و ماوێ سێ سالان ل زیندانا مۆسل دا ژیان دەربازكریە، و ل سالا 1963 دەمێ هاتیە ئازادكرن ئێكسەر پەیوەندی ب شۆڕەشا ئیلونێ كریە، ل سالا 1974 باب و مام و پسمام و خزم و مرۆڤێن مە ئەم هەمی دناڤا شۆڕەشێ دا بووین، ئەڤێ هەمیێ كارتێكرن ل سەر من هەبوو بچمە دناڤ شۆڕەشێ دا.
پێشمەرگێ شۆڕەشا گولانێ (جەهەوەر نەمر خدر)، زێدەتر بەحسێ پەیوەندیا خوە ل گەل شۆڕەشا گولانێ دكەت و گۆت: هەیڤا پێنج ل سالا 1983ێ چوومە مالا مامێ خوە (سلۆ خدر) خودێ ژێ رازیبت، وی دەمی دناڤا پێشمەرگەی دا بوو، هەتا زڤری یە دەستیردانێ ل هەیڤا تەباخێ ل گەل خوە برمە بارەگایێ لقێ ئێك ئەو ماوەكێ كێم بوو بارەگایێ لقێ ئێك هاتبوو (زێوە شكان)، و بدورستی 1/9/1983 ڤەكولین ل گەل من هاتەكرن وەك نووهاتی هاتمە وەرگرتن، و ئەو رۆژێ ب دورستی من پەیوەندی ب شۆڕەشا گولانێ كر، پشتی من پەیوەندی پێ كری ماوەكی ل زالگەها لقێ ئێك هاتمەدانان و دووڤدا هاتمە ڤەگوهاستن بۆ عومبارێ هەر ل بارەگایێ لقێ، و ل هەیڤا ئێك سالا 1984 مامێ من (سلۆ خدر) خودێ ژێ رازی بیت ب شێوەكێ بەروەخت هاتە ڤەگوهاستن بۆ وەرگرتنا بەرپرسایەتییا لژنا دهۆكێ، ل گەل هاتم و ئەم شەش هەیڤان ماینە ل گەل.
پێشمەرگێ شۆڕەشا گولانێ (جەهەوەر نەمر خدر)، بەحسێ چەند چالاكیێن پێشمەرگەی دكەت ل سنورێ لژنا دهۆكێ ل وی سەردەمی و گۆت: دەمێ ل گەل مامێ خوە خودێ ژێ رازی (سلۆ خدر) پشكداری چەند شەران بووم، ئەو ژی شەرێ (قەوغایێ) و شەرەكی ل نێزیكی (مانگێشكێ) و هەمان دەم شەرێ (دوستەكا) و شەرێ ژ هەمیان مەزنتر شەرێ (دوستەكا) بوویە، زێدەتر گۆت: ل سالا 1984ێ خوپیشاندانێن قوتابیان ل دهۆكێ دروست بوون، و ئەم هاتین وەك پشتەڤانی بۆ ئەڤان خوپیشاندانان و ئەم هاتینە گوندێن (سینا و شێخ خدرێ) لەشكرێ ئیراقێ هاتە سەرێ ئەلقوش، ئەم (29) پێشمەرگە بووین و ب سەركەفتین بۆ (كەرەجالی) هێشتا رۆژ نەدەركەفت بوو، مە دیت هێزا دوژمنی و لەشكرێ ئیراقێ سەرێ چیایی گرتیە و لەوما ب ترۆمبێلێن (قەلاب) چووینە گوندێ (دوستەكا) فرۆكە هاتن، و هێزەكا مەزن یا دوژمنی هات و زریپوش دوژمنی بوون و هەمان دەم ژ ئالیێ پشتێ ژی هێزەكا مەزنا دوژمنی هات، و سپێدێ شەری دەسپێكر هەتا ئێڤاری و ئەم گەلەك دبرسی و تهێنی بووین، و دەمێ هاتینە پشتا چیایی ئانكو نێزیكی گوندێ(ئەفریكێ) هندەك ژ خەلكێ دهۆكێ نان و سەمون و باجان و خیار بوومە ئینابوون، و مە تێر خوار و ئەم زڤرینە هەڤالێن خوە بوو مەغرەب دوی شەری دا پێنچ هەڤالێن مە كەفت بوونە دەستێ دوژمنی دا، زێدەتر ئەم بۆ پشتەڤانیا خوپیشاندانێن قوتابیان هاتبووین لێ حوكمەتا بەعس هێزەكا مەزن ئینا دەڤەرێ و رەنگە پێزانین ل سەر هاتنا مە بۆ دەڤەرێ گەهشتبن، چونكە ئەم چووبووینە دناڤ ئێك دا و شەش فرۆكە ل سەر سەرێ مەبوون، و فرۆكە نەشیان رەمیێ ل مە بكەن، چونكە كەفت بووینە دناف ئێك دا و هەتا ئەم چووینە لایێ (ئەڤریكێ) شنی فرۆكان ڕەمی ل مەكر، و پشتی یازدە هەیڤان ژ دەستەسەركرنا هەڤالێن مە هەر پێنچ ژلایێ رژێمێ ڤە هاتنە سێدارەدان، كو ئێك ژوانا كور مامێ من بوو بناڤێ(شاكر شەریف خدر) خودێ ژ هەمی شەهیدان رازی ببیت، هەلبەت هەتا نوكە ژی گەلەك جاران هزرا خوە دكەم نوزانم چەوا ئەم قورتال بووین، راستی ئەڤە داستانەكا مەزن بوو و گەلەك دەنگ ڤەدا و هەبوونا خوە دناڤا جەرگێ دوژمنی دا مە نیشادا، و پشتی سالا 1984ێ زڤریمە لقێ پشكا (شەهیدان) هاتەدانان (مەلا تاهر رەشەڤای) بۆ بەرپرسێ پشكا ناڤبری، و بوومە ئەندام ل گەل دا و دووماهی یا سالا 1984ێ هاتمە ڤەگوهاستن بۆ پشكا (دارایی) یا لقێ ئێك و هەتا ئەنفالا یێ بەردەوام بووم ل ڤێ پشكێ.
