ژ بۆ هەلبژارتنان بەرهەڤین ل گەل هەموو ئالیان دانوستاندنان بکەین
هەڤسەرۆکێ لقێ هەدەپێ ل ئستەنبۆلێ راگەهاند، ژ بۆ هەلبژارتنێن باژێرڤانیان ئەو بەرهەڤن ل گەل ئاکپارتیێ و پارتا کۆماری ژی دانوستاندنان بکەن، هەتا نها وان بریار نەداینە کو دێ ل ئستەنبۆلێ بەربژارێن خوە هەبن یان نە؟ لێ ئەو بەرهەڤن ل گەل هەر دو پارتێن مەزن یێن تورکیا دانوستاندن بکەن.
موراد کالماز هەڤسەرۆکێ لقێ هەدەپێ یێ ئستەنبۆلێ بۆ دەزگەهێن راگەهاندنا تورکیا دیار کر، وەکو هەدەپە وان هەتا نها چو بەربژار بۆ هەلبژارتنێن سەرۆکاتیا باژێرڤانیا ئستەنبۆلێ دیار نەکرینە، لێ ئەو بەرهەڤن بۆ هەلبژارتنان ل گەل ئاکپارتیێ و پارتا کۆماری ژی دانوستاندنان بکەن، دەرگەهێ وان بۆ هەموو ئالیان د ڤەکرینە، ئەو دێ چاڤەرێی هەلوەستێ هەر دو پارتێن مەزن یێن تورکیا بن، ئەو بەرهەڤن دانوستاندنان بکەن و ل گۆر دانوستاندنان ژی ئەو دێ هەلوەستێ خوە ب فەرمی راگەهینن و گۆت: (دەنگدەرێن مە ژ بەر هەلوەستێ پارتا مە د هەلبژارتنێن بۆری دا گەلەک رەخنە ل مە گرتینە، خەلکێ مە دڤێت ئەم سیاسەتەکا وەسا برێڤە ببەین کو ئەنجامێن خوە یێن باش بۆ وان هەبیت، ژ بەر ڤێ یەکێ ژی ئەم دێ ل گۆر بەرژەوەندیا خەلکێ خوە بریارێ دەین، هەکە ئاکپارتی یان ژی پارتا کۆماری داخوازیێن مە بەرچاڤ وەربگرن و سۆزێن خوە بجه بینن ئەم دشێین هەلوەستێ خوە ل گۆر هندێ دیار بکەین، بێگومان هەتا وی دەمی ژی ئەم دێ چاڤەرێ بین دا بزانین کا دێ رەوش بەر ب کیڤە چیت).
ناڤهاتی ئەو یەک ژی دیار کر، هەلبژارتنێن باژێرڤانیان یێن ئادارا ٢٠٢٤ بۆ تورکیا و کوردان گەلەک گرنگن، ژ بلی باژێرێن باکورێ کوردستانێ وان دڤێت ل باژێرێن مەزن یێن تورکیا ل گۆر هەلوەستێ ئاکپارتیێ و پارتا کۆماری سەرەدەریێ بکەن و دێ سیاسەتا خوە ژی وەسا دیار کەن.
ئەو یەک د دەمەکێ دایە کو بەری چەند رۆژان ئۆزگور ئۆزەل سەرۆکێ پارتا کۆماری د داخۆیانیەکێ دا راگەهاند، ژ بۆ هەلبژارتنێن باژێرڤانیان ئەو دێ ل گەل هەدەپێ دانوستاندنان کەن، چونکی وان دڤێت ل باژێرێن مەزن یێن تورکیا سەرکەڤن، ژ بۆ ڤێ یەکێ ژی هەدەپە و دەنگدەرێن وێ گەلەک گرنگن، لێ هەتا نها دیار نینە کا دێ کەنگێ ئەو ل گەل هەدەپێ کۆمبن.
ل ئالیێ دی هەتا نها سەبارەت ب هەلوەستێ بەرپرسێ هەدەپێ، ئاکپارتیێ چو داخۆیانی نەداینە و هندەک ژ چاڤدێرێن سیاسی ژی دیار دکەن، ژ بەر هەڤپەیمانیا ئاکپارتیێ یا ل گەل پارتا بزاڤا نەتەوەپەرست گەلەک زەحمەتە کو ئاکپارتی ژ بۆ هەلبژارتنێن باژێرڤانیان ل گەل هەدەپێ دانوستاندنان بکەت، چونکی هەر دانوستاندنەک دێ بیتە ئەگەرێ هندێ پارتا بزاڤا نەتەوەپەرست ئاریشان بۆ ئاکپارتیێ دروست بکەت، ژ بەر ڤێ یەکێ ژی هەتا نها ئاکپارتیێ چو داخۆیانیەک ل دۆر هەلوەستێ نوو یێ هەدەپێ نەداینە.
