کۆریا باکور ل دۆر ئۆکرانیایێ هۆشداریێ ددەتە کۆریا باشۆر
وەزارەتا دەرڤە یا کۆریا باکور د داخۆیانیەکێ دا راگەهاند، دەمەکە کۆریا باشۆر چەکێ گران ددەتە ئۆکرانیایێ ئەو یەک ب چو رەنگەکێ ناهێتە قەبوول کرن و دێ ئەنجامێن گەلەک خراب بۆ کۆریا باشۆر هەن، دڤێت بەرپرسێن کۆریا باشور خوە ژ کارەکێ وەسا دوور بکەن، چونکی بابەتێ شەرێ نها د ناڤبەرا ئۆکرانیا و رۆسیا دا کاریگەریا خوە ل هەموو دەڤەرێ و جیهانێ یا کری، هەکە کۆریا باشۆر ل سەر هاریکاریێن خوە بەردەوام بیت ئەو یەک دێ بیتە ئەگەرێ روودانا ئالۆزیێن نوو.
بەری نها ژی بەرپرسێن کۆریا باکور دیار کربوون نابیت کۆریا باشور چەکێ گران بدەتە ئۆکرانیایێ، چونکی ئەمریکا و ناتۆ دخوازن ئالۆزیێن نوو دروست بکەن، دڤێت کۆریا باشور نەبیتە پشکەک ژ سیاسەتا ئەمریکا و ناتۆ.
ئەو یەک د دەمەکێ دایە کو بەری نها بەرپرسێن ئەمریکا دیار کربوون کۆریا باکور چەکێ گران ددەتە رۆسیا و بەرپرسێن رۆسیا ژی ئەو یەک ب توندی رەت کربوون.
