داعش ل دێرازۆرێ بەرهەڤیان بۆ کریارێن تیرۆرستی دکەت
ل دوڤ نوچه‌یێن هه‌رێمی ئه‌ڤە دو رۆژن ل نێزیکی ئه‌بوکه‌مال چه‌کدارێن داعشێ هێزێن خوه کۆم دکه‌ن و د ناڤ دو رۆژان دا تیرۆرستێن داعشێ سێ جاران ئێرشی هێزێن سووریێ کرینە و ١٠ لەشکرێن سووریێ هاتینە کوشتن و ژ ئەنجاما شەڕی سێ چەکدارێن رێکخستنا تیرۆرستی یا داعشێ ژی هاتینە کوشتن.
ل ئالیێ دی ناڤەندا چاڤدێریێ یا مافێن مرۆڤی یا سووریێ ژی راگەهاند دەمەکە رێکخستنا تیرۆرستی یا داعشێ ل دەڤەرێن سنۆری یێن د ناڤبەرا سووریێ و ئیراقێ دا خوە بهێز دکەت و شیایە هندەک کریارێن تیرۆرستی ژی ئەنجام بدەت و هەروەسا داعش ل وان دەڤەران خوە بۆ ئێرشێن بەرفرەهـ ژی بەرهەڤ دکەت.
هەمان ناڤەندێ ئەو یەک ژی دیار کریە نها هێزێن سووریێ نەشێن وەکو پێدڤی چاڤدێریا دەڤەرێن سنۆری ب تایبەتی ژی ئەبوکەمال بکەن، ژ بەر ڤێ یەکێ ژی چەکدارێن رێکخستنا تیرۆرستی یا داعشێ بزاڤا ڤێ یەکێ دکەن بشێن ل دەڤەرێن سنۆری یێن د ناڤبەرا سووریێ و ئیراقێ دا خوە ب رێکخستن بکەن و جارەکا دی ئێرشی ئاخا سووریێ و ئیراقێ بکەن.
