پارتا دەم داخوازەکێ ژ لەیلا زانایێ دکەت
پارتا دەم داخواز ژ سیاسەتمەدارا ناڤدار یا کورد کریە کو خوە بۆ هەڤسەرۆکاتیا باژێرڤانیا ئامەدێ بەربژار بکەت و ب فەرمی ئەو یەک بۆ لەیلا زانایێ هاتیە گۆتن و هەتا نها ب فەرمی لەیلا زانایێ بەرسڤا پارتا دەم نەدایە.
بەرپرسەکێ پارتا (دەم) یێ کو بەری نها ناڤێ وێ هەدەپ بوو، بۆ دەزگەهێن راگەهاندنێ دیار کر وان دڤێت ب رەنگەکێ بهێز پشکداریێ د هەلبژارتنێن باژێرڤانیان ل تورکیا و باکورێ کوردستانێ دا بکەن، وان دڤێت دەست ب قۆناغەکا نوو بکەن و ل سەر بنەمایێ سیاسەتەکا نوو کو پشتا خوە ب دەنگێ گەلێ کورد گەرم دکەت، خوە بۆ قۆناغەکا نوو بەرهەڤ بکەن و ب رەنگەکێ بهێز پشکداریێ د سیاسەتێ دا بکەن، ژ بەر ڤێ یەکێ ژی وان دڤێت کەسێن هەژی و ناڤدار بۆ هەڤسەرۆکاتیا باژێرڤانیان ل باژێرێن تورکیا و باکورێ کوردستانێ بەربژار بکەن.
هەمان بەرپرسی ئەو یەک ژی دیار کریە، ئێک ژ وان کەسان کو هەژیە و دشێت رۆلەکا کاریگەر د هەلبژارتنان دا بگێریت لەیلا زانا سیاسەتمدارا ناڤدار یا کوردە و ژ بەر ڤێ یەکێ ژی بەری دەمەکێ وان ب فەرمی داخواز ژ لەیلا زانایێ کرینە خوە بۆ هەڤسەرۆکاتیا باژێرڤانیا ئامەدێ بەربژار بکەت، چونکی لەیلا زانا کەسەک دلسۆزە بۆ دۆزا گەلێ کوردستانێ، د ناڤ کوردان دا ل تورکیا و باکورێ کوردستانێ ژی پێگەهەکا تایبەت هەیە، خەلک گەلەک حەز ژ لەیلا زانایێ دکەن، ژ بەر ڤێ یەکێ ژی وەکو پارتا دەم ئەو ل سەر ڤێ باوەریێ نە هەکە لەیلا زانا خوە بەربژار بکەت دێ شێت سەرکەفتنەکا مەزن بدەستڤە بینیت.
سەبارەت ب بەرسڤا لەیلا زانایێ ژی ناڤهاتی راگەهاند، هەتا نها لەیلا زانایێ ب فەرمی بەرسڤا پارتا وان نەدایە، لێ ئەو ل سەر ڤێ باوەریێ نە کو دێ بەرسڤا لەیلا زانایێ یا ئەرێنی بیت، چونکی لەیلا زانایێ د قۆناغێن هەری دژوار دا بەرگری ژ مافێن رەوا یێن گەلێ کورد کریە، گەلەک قوربانی داینە، ب سالان ل زیندانێ دا مایە و ژ بەر ڤێ یەکێ ژی باشترین کەسە بشێت ببیتە هەڤسەرۆکا باژێرڤانیا ئامەدێ و هەکە لەیلا زانا ڤێ داخوازیێ قەبوول بکەت دێ کاریگەریەکا مەزن هەبیت.
ل ئالیێ دی چاڤدێرێن سیاسی ل تورکیا و باکورێ کوردستانێ ژی دیار دکەن، پارتا دەم بەرۆڤاژی هەدەپێ دڤێت پتر پشتا خوە ب کوردان گەرم بکەت، چونکی هەدەپێ بەری نها گەلەک گرنگی دا کەسێن چەپێن تورک و ژ بەر ڤێ یەکێ ژی رێژەیەکا مەزن ژ دەنگێن خوە ل باکورێ کوردستانێ ژ دەست دان، نها پارتا دەم هەتا رادەیەکێ دڤێت شاشیێن بەری نها دوبارە نەکەت، بەربژارکرنا کەسێن وەکو لەیلا زانا و ئەحمەد تورک ژی نیشا ددەت پارتا دەم دڤێت گوهۆڕینان د سیاسەتا خوە دا بکەت.
