بكارئینانا سایتێن سێكسی دبیتە ئەگەرێ مرنا خانێن مێشكی
هەولێر، قائید میرۆ:
ل عیراقێ بڕیار هاتیە دان مالپەڕێن سێكسی بهێنە گرتن و نۆشدارەكا شارەزا ژی دیار كر كو گرتنا ماڵپەڕێن سێكسی دێ كاریگەریەكا ئەرێنی ل سەر تەخا گەنجان هەبیت، ژبەركو بكارئینانا مالپەڕێن سێكسی كارتێكرنێن زۆر نەرێنی ل سەر دەروونێ مرۆڤی هەیە هندەك كەس ژی پشتی بەرێ خوە ددەنە مالپەڕێن سێكسی دخوازن تشتێ دهێتە كرن ناڤا مالپەڕێن سێكسی بجه بینن و تووشی كارەساتا دبن.
دكتۆرە دیلمان ئازاد، بۆ رۆژناما ئەڤرۆ گۆت: (ب دیتنا من گرتنا مالپەڕێن سێكسی پێنگاڤەكا باشە ژلایێ عێراقێ ڤە، چونكی كاریگەریێن خراب ل سەر مرۆڤی هەنە بتایبەتی ل سەر تەخا سنێلەیان، ژبەركو كەسێن مالپەڕێن سێكسی بكار دئینن بزاڤێ دكەن وان رەفتارێن ناڤا فیلمێن پۆرن و مالپەڕێن سێكسی دوبارە بكەن و ئەڤە دبیتە ئەگەرێ مرنا خانێن مەژیێ مرۆڤی، هەروەسا كەسێن مالپەڕێن سێكسی بكار دئینن فێری (خۆها نهێنی دبن)، هەكە ئەو كەس خێزاندار ژی بن بێگومان ئەڤ چەندە كەساتیا مرۆڤی بەر ب هەرفینێ دبەت و چەندین ئاریشەیێن هەی گرێدایی بكار ئینانا وان مالپەڕێن سێكسی نە).
د. دیلمانێ دیار كر ژی ب كورتی هەر كەسێ مالپەڕێن سێكسی بكار بینیت ل پاشەرۆژێ دێ تووشی چەندین نەخۆشیێن دەروونی بیت، گرتنا وان مالپەڕان دێ كاریگەریێن زۆر ئەرێنی هەبن ل سەر جڤاكێ عێراقێ و كوردستانێ، ل چەندین وەلاتێن جیهانێ ژی ڤەكرنا مالپەڕێن سیكسی هاتیە سنوردار كرن.
دكتۆرایێ دا زانین ژی كو چو ئامارێن دروست لبەر دەست نینن كا ل عێراقێ چەند كەس مالپەڕێن سێكسی بكار دئینن، بەلێ یا خویایە ئەو سایتێن سێكسی كار ل سەر مەژیێ مرۆڤی دكەن و هەر كەسەكێ ب رێیا وان مالپەڕان بگەهیتە ئاستێ ئورگانیزمێ ل ژیانا خوە یا حەقیقی ناگەهیتێ، چونكە ئاشكرایە چێكرنا وان فیلم و بابەتێن سێكسی بابەتەكێ بازرگانیە و د ژیانا مرۆڤی یا حەقیقی دا ئەو تشت نینە و گۆت: (كەس هەبووینە پشتی بەرێ خوە دانا وان سایتا خواستیە هەمان تشت دوبارە بكەن، بتایبەتی گەنجێن تازە پێ گەهشتی دخوازن هەر تشتەكێ ل سایت و تێلەفزیۆنێ دبینن د ژیانا خوە دا دوبارە بكەن، ئەڤەژی ئێكە ژ وان پێنگاڤێن شاش).
د. دیلمانێ گۆتژی: (باشترین بڕیارە هاتیە دان كو مالپەڕێن سێكسی بهێنە گرتن ل عێراقێ و هەرێما كوردستانێ، چونكی ل پاشەڕۆژێ دێ بنە مەترسیێن مەزن ل سەر جڤاكی و نابیت بڤی شێوەی هەر كەسەكێ بخوازیت د هەر تەمەنەكی دا بیت بشێت مالپەڕێن سێكسی ڤەكەت و بكار بینیت).
