ئەمریکا دێ ب توندی بەرسڤا گرۆپێن چەکدار دەت
رۆژنامەیا واشنتۆن پۆست یا ئەمریکی د راپۆرتەکێ دا دیار کریە، ل سووریێ و ئیراقێ گرۆپێن چەکدار بەردەوام ئێرشی بنگەهێن ئەمریکا دکەن و نها ل سووریێ ب تایبەتی ژی ل دێرازۆرێ هێزێن سەر ب ئیرانێ ڤە ب موشەکان ئێرشی بنگەهێ ئەمریکا دکەن و زیانێن گەلەک مەزن ژی گەهشتینە هێزێن ئەمریکا، ژ بەر ڤێ یەکێ ژی وەزارەتا بەرگریێ یا ئەمریکی داخواز ژ سەرۆکێ وی وەلاتی کریە فەرمانێ بدەتە هێزێن ئەمریکا دا ب توندی بەرسڤا گرۆپێن چەکدارێن سەر ب ئیرانێ ڤە بدەت.
هەمان رۆژنامێ ئەو یەک ژی دیار کریە، ئیرانێ دڤێت ل سووریێ ئاریشان بۆ هێزێن ئەمریکا دروست بکەت، بەری نها پیلانەکا هەڤپشک یا رۆسیایێ و ئیرانێ هەبوو دا بشێن ب رێیا گرۆپێن چەکدار ئەمریکا نەچار بکەن دا هێزێن خوە ژ سووریێ ڤەکێشیت، لێ جارێ ئەمریکا نەڤێت هێزێن خوە ژ باکورێ سووریێ ڤەکێشیت، چونکی مەترسیا داعشێ و گرۆپێن دی یێن تیرۆرستی ل سەر بەرژەوەندیێن ئەمریکا هەنە، ژ بەر ڤێ یەکێ ژی ئەمریکا دڤێت پێگەهێ خوە ل سووریێ ب تایبەتی ژی ل باکورێ وی وەلاتی بهێزتر لێ بکەت، ئەو یەک ژی ب دلێ رۆسیا و ئیرانێ نینە و ب تایبەتی ژی پشتی شەرێ د ناڤبەرا ئسرائیلێ و حەماسێ دا ئیرانێ ب رێیا گرۆپێن چەکدار دڤێت ئاریشان بۆ ئەمریکا دروست بکەت و نها ئیرانێ چەکێ گران داینە حوسیێن یەمەنێ دا ئەو ژی ل دەریا سۆر ئاریشان بۆ ئەمریکا و هەڤپەیمانێن وێ دروست بکەن.
چاڤدێرێن سیاسی ژی دیار دکەن، نها ئەمریکا ب هەموو رەنگەکێ یێ کار دکەت دا بشێت پێگەهێ خوە ل سووریێ بهێز بکەت، هەبوونا هێزێن ئەمریکا ل سووریێ بۆ بهێزبوونا پێگەهێ وی وەلاتی ل رۆژهەلاتا ناڤین گەلەک یا گرنگە، هەرچەندە بەرپرسێن ئەمریکا دبێژن ئەو ژ بەر شەرێ ل دژی داعشێ ل سووریێ نە، لێ هەر کەس دزانیت ئەمریکا ئارمانجێن خوە یێن تایبەت هەنە و ژ بەر ڤێ یەکێ ژی جارێ ئەمریکا نەڤێت هێزێن خوە ژ سووریێ ڤەکێشیت.
