د شۆرەشا گولانێ دا مللەت پاشخانە و ژێدەرێ ژیارا پێشمەرگەی بوو
ديدار، سالار محةمةد دؤسكى:
2-2
پێشمەرگەیێ شۆرەشا گولانێ، خورشید باكۆزی زێدەتر گۆت: رێكەفتی 14/ 9/1982ێ ژلایێ (امن دولە) یا سوری ڤە ل باژێرێ قامشلو ل سەر نامەكێ كو من بۆ هەڤالەكێ خوە ب رێكا پوستە و گەهاندنێ فرێكربوو ئیرانێ هاتمە دەستەسەركرن، ژبەرك و من دناما خوە دا نڤێسی بوو ئەز نوكە یێ ل كوردستانا رۆژئاڤا ل سوریێ ژ بەر پەیڤا كوردستانێ هاتمە گرتن بۆ ماوێ چەند رۆژان و ب رەنگەكێ هوڤانە هاتمە ئەشكەنجەدان، پشتی من ژی هەڤالەكێ مەیێ دی ژی بناڤێ ( ئەكرەم سلێمان بامەرنی) ئەو ژی هاتبوو دەستەسەركرن ژ بەر ئەشكەنجەكا زور بۆ ناڤبری دین ب بوو ل دووماهیێ ب وێ ئەشكەنجەدانێ شەهید بوو، ل هەیڤا یازدە ل سالا 1982ێ ئەم ژ دەڤەرا شنگالێ ڤەگەریاینە گوندێ (سیرۆاج و زراع) پشتی شەرەكێ گران هەڤالەكێ مەبناڤێ (عەزیز لازار پەتو) یێ بەرنیاس ب (دیندار) ب برینداری كەفتە دەستێ دوژمنی بۆ سێزدە سال و شەش هەیڤان ما دزیندانا رەش و تاری یا ئەبو غورێب ڤە و ژ بەر كو چەند لێبورین هاتنەدان ژ ئەوی نەدگرتن، چونكە مەسیحی بوو و مەسیحی حوكمەتا ئیراقێ كربوونە نەتەوە عەرەب و پشتی ژ زیندانێ هاتینە ئازادكرن بۆ ماوەكێ كێم ما و دووف دا وەغەرا دووماهیێ كرن.
هەمان پێشمەرگە گۆت: ژ بەر ئەڤان كارو رەفتارێن هوڤانەیێن رژێما سوریێ، ل دووماهی یا سالا 1983ێ جارەكادی ڤە گەریامە باشورێ كوردستانێ و هاتمە ل گەل لژنا دهۆكێ ل گەل رێكخراوا شەهید (ئەحمەد حاجی حسێن) بەرپرسێ وێ رێكخراوێ (صادق گەلناسكی) بوو وێ دەڤەرێ مە گەلەك چالاكیێن لەشكەری ئەنجامدانن وەكو هێرشا دوژمنی یا مەزن بۆ سەر لژنا ناوچا دهۆكێ ل 28/8/1984ێ ئەڤێ هێرشێ بۆ ماوێ هەشت رۆژان ڤەكێشا بەلێ دوژمن ب سەرشوری شكەستن و هژمارەكا زورا مەزن یا تەرمێن دوژمنی مانە ل مەیدانا شەری دا و دووڤدا هەڤژینێن وان هاتن تەرمێن وا ب تەرەكتورا ڤەگوهاستن.
خورشید باكوزی، پێشمەرگێ شورەشا گولانێ ئەو ژی گۆت: ل سالا 1984ێ بۆ ئێكەم جار ل گوندێ (كێڤلا) ئەم شیاین زریپوشەكا دوژمنی بشكێنین و ئاگری بەردەینێ، ژ هەلویستێن گەلەك نەخوش ل شورەشا گولانێ دا من دیت و گەلەك پێ داخباربوون گرتن و سێدارەدانا (13) كادر و پێشمەرگێن مە بوو ژلایێ رژێما ئیراقێ ڤە ئەوێن ل رۆژا 12-13/3/1984 ل دەڤەرا پێشابیرێ دناڤبەرا گوندێ (توسان و مشارا) هاتنە دەستەسەركرن و پشتی هاتینە ئەشكەنجەكا هوڤانە ل رێكەفتی 31/3/1985 هاتنە سێدارەدان و پرانی یا وان كادرو پێشمەرگێن دەسپێكا شورەشا گولانا نشتیمان و پێشكەفتن خواز بوون وەكی شەهید (عزەت عەلی، عەبدوالعەزیز فارس ئامێدی، شەمو هاجانی، جانگو كارەبائی، جەمال باكوزی، نەوزاد ئەرەدنی، دەشتی كارەیی، هەكار بامەرنی، سیابەند كوچەر، جەمال بەرگارەیی) ل گەل چەندین هەڤالێن دی و من پەرتووكا خوە یا بناڤێ( سێزدە سوارێن بەهدینان) ب درێژی بەحسێ ڤان شەهیدان كریە.
هەمان پێشمەرگە گۆت: ل سالا 1984ێ شەهید (دلوڤان محەمەد كەمەكی) ئامر مەفرەزە بوو ل گەل رێكخراوا رێنجبەراندا و بتنێ ئەو چەند رۆژەك بوو چوویە دژیانا هەڤژینیێ دا و پێزانین دگەهنێ كو دێ چالاكیەك هێتە ئەنجامدان، لەوما دهێتە ئاقارێ گوندێ (ئەردا) ل دەڤەرا دۆسكیا و دگەهیتە هەڤالێن خوە و هەر ل وێرێ پشكداری كومبوونەكێ دبیت ل سەر چالاكیێ ب سەرپەرشتیا شەهید (فەتەح گولی) و دووڤ دا پێشمەرگە ل سەر خالێن دەست نیشانكرنی دهێنە دابەشكرن، ئەز ل گەل شەهید دلوڤان وێ شەڤێ چووینە مالەكێ و سپێدێ زیكا رابووین دا قەستا جهێ بوسێ بكەین، ئەوێ شەڤێ خودانێ مالێ بوومە هنگڤین داگرت بوو بەلێ جهێ داخێ یە ل سپێدەهی یا رۆژا شەمبی رێكەفتی 20/9/1984 ێ ل كەمینا ل سەر جادا سەرەكی یا مانگێشكێ نێزیك پرا دویلیا پشتی سوتن و ژناڤبرنا ئیڤایەكا جاشێن رژێمێ و كوشتنا هژمارەكا جاشان، پێشمەرگە دلوڤان كەمەكی دهێتە شەهیدكرن و دگەهیتە كاروانێ سەربەرزێ شەهیدان و رێكا ئازادی یا كوردستانێ وی دەمی ئەم گەلەك كەیف خوش دبین دەمێ مە سەركەفتن دچالاكیێ دا ئینا و مە تولا شەهیدێن خوە ڤەكر .
ل دووماهیێ، پێشمەرگێ شورەشا گولانێ خورشید باكوزی گۆت: ئەگەر رەوشا پێشمەرگێن دێرینێن كوردستانێ ل بەرچاڤ بهێتە وەرگرتن و رۆلێ ئەوان شێرە ژنێن كوردستانێ نەهێتە ژبیركرن و بەرچاڤ بهێتە وەرگرتن، یێن قوربانی بۆ ڤی مللەتی و ئاخا پیرۆز داین ژ بەر كو ئەو دەسكەفتێن نوكە كەدا وان قارەمانێن رۆژێن سەختێن كوردایەتیێ نە، داخازا ئێكرێزی و یەكگرتنا هەمی هێزا و پارتێن كوردستانێ دكەم ژ بەر كو نەخوشترین هەلویست دشورەشێ دا شەرێن نافخوبووینە، باوەركە ئەو شەهیدێن مە ل شەرێن نافخو دا داین كێمتر نەبووینە ئەوێن ل شەرێن بەرامبەر دوژمنی مەداین و ئەڤە ژی كارەساتەكا نافخویی یا زورا مەزن بوو بۆ گەلێ كوردستانێ.
