پێدڤیە ئەم خوە ل گەل گوهۆڕینێن دانعەمران بگونجینین
بێوار حەمدی:
گەلەك گوهۆڕین ل دەڤ مروڤی پەیدا دبن دەمێ دانعەمر دبیت و جودا دبیت ژ كەسێن گەنج، لەوما پێدڤیە خۆ ل گەل گوهوڕینێن وان بگونجینین، ڤەكولەرەكێ جڤاكی ژی گۆت: جڤاكێ كوردی سەرەدەریەكا باشتر ل گەل دانعەمران دكەت، چونكی ژدەرڤە جهێن خودانكرنا دانعەمران گەلەكن.
ڤەكولەرێ جڤاكی عەبدولجەبار عەبدوالرەحمان، د دیدارەكێ دا بۆ رۆژناما ئەڤرۆ دیار كر كو ب شێوەیەكێ گشتی دانعەمری د سێ قوناغان دا دبوریت، ئەو ژی قوناغێن دەسپێكێ و ناڤنجی و دوماهیكێ و گۆت: (د جڤاكێ كوردی دا پشتی ژیێ 60 ساڵیێ دانعەمری دەستپێدكەت، بەلێ جیاوازی یا هەی دناڤبەرا وان دانعەمرێن ل گوندا دژین و یێن ل باژێرا دژین، ژبەركۆ ئەوێن ل گوندا دژین تەندروستیا وان باشترە و پتر د سەرخۆنە ژ یێن باژێران).
ڤەكۆلەری گۆتژی: (د جڤاكێ كوردی دا سەرەدەریكرن ل گەل كەسێن دانعەمر گەلەك باشترە ل چاڤ جڤاكێن بیانی، ژبەركۆ ل ژ دەرڤە جهێن خودانكرنا دانعەمران گەلەكن و ئەڤە وێ چەندێ دگەهینیت كو د بێ چاڤدانن، لێ ئەڤە هەموو دزڤڕیت بۆ كەلتورێ مە یێ كوردەواری ولایەنێ ئایینی، ژبەركو ئەم جڤاكەكێ موسلمانین لەوما پتر بهایێ دانعەمران دزانین).
د بەردەوامیا ئاخفتنا خۆدا ڤەكولەرێ جڤاكی دیار كر كو، گەلەك گوهوڕین ل دەڤ كەسێن دانعەمر پەیدا دبن جودا ژ كەسێن گەنج، وەكو (كێمبوونا شیانا، لاوازبونا چاڤا، گرانیا گوها…، و گۆت: (لەوما ژی گەلەك گرنگە ئەم خوە ل گەل گوهورینێن وان بگونجینین و د بێهن فرەه بین ل گەل وان، پێدڤیە ئەم شانازیێ پێ ببەین و هەموو پێدڤیێن وان بۆ دابین بكەین وەكو خوارن و ڤەخوارنێن گۆنجایی و جلوبەرگ و چاڤدانا ساخلەمی و دەرمانێن وان).
ڤەكۆلەر عەبدولجەبار دیار كر ژی كو هندەك حالەت هەنە ب نەچاری دانعەمر دهێنە ڤەگۆهاستن بۆ ماڵا دانعەمران، ژبەرهندێ گەلەك پێدڤیە ئەڤ ماڵە ب دروستی ب كارێ خو رابن و بەردەوام چاڤدانا وان بكەن و بزاڤێ بكەن هندەك جاران چالاكیا و دەركەفتنا بو رێك بێخن داكو هەر چو نەبیت ئەو ژی جەوێ خو بگوهورن).
