یێن بووینە ئەگەرێ ژناڤچوونا قۆناغا ئاشتیێ دڤێت بهێنە دادگەهیکرن
وەزیرێ دادێ یێ بەرێ د حوکمەتا ئەردۆغانی دا راگەهاند، قۆناغا ئاشتیێ بۆ چارەسەرکرنا پرسا کوردی و پرسێن دی یێن تورکیا گەلەک گرنگ بوو، لێ مخابن ژ بەر هندەک ئەگەران قۆناغا ئاشتیێ ژناڤچوو، دڤێت سەبارەت ب ژناڤچوونا قۆناغا ئاشتیێ دادگەهێن تورکیا دەست ب ڤەکۆلینان بکەن و یێن بووینە ئەگەر ژی بهێنە دادگەهیکرن.
سەعدوللا ئەرگین وەزیرێ بەرێ یێ دادێ د کابینا حوکمەتا ئاکپارتیێ دا راگەهاند، بەری نها سەلاحەدین دەمیرتاش د دادگەهێ دا بەحسێ قۆناغا ئاشتیێ و گەلەک ئالۆزیێن ل تورکیا کریە، ئاخڤتنێن دەمیرتاشی یێن سەبارەت ب قۆناغا ئاشتیێ هەموو راستن و د جهێ خوە دانە، قۆناغا ئاشتیێ بۆ تورکیا و چارەسەرکرنا پرسا کوردی گەلەک گرنگ بوو، وی دەمی وەکو وەزیر مە ژی هەڤدیتن هەبووینە، لێ مخابن ژ بەر هندەک ئەگەران و هندەک روودانان قۆناغا ئاشتیێ ژناڤچوو و گۆت: (هەتا نها ژی سەبارەت ب ژناڤچوونا قۆناغا ئاشتیێ گەلەک داخۆیانیێن جودا جودا هاتینە دان و هەر ئالیەک ئالیێ دی تاوانبار دکەت، ژ بەر ڤێ یەکێ ژی نابیت سەلاحەدین دەمیرتاش و هندەک سیاسەتمەدارێن دی ژ بەر رۆلێ وان یێ د قۆناغا ئاشتیێ دا بهێنە دادگەهیکرن، هەکە دادگەهێن تورکیا دخوازن راستیان ئاشکرا بکەن وی دەمی دڤێت هەموو کەسێن دەستێ وان د قۆناغا ئاشتیێ دا هەبوویە دادگەهی بکەن دا هەموو راستی بۆ رایا گشتی بهێنە ئاشکرا کرن).
ناڤهاتی ئەو یەک ژی دیار کر، براستی ژی قۆناغا ئاشتیێ نە تنێ ژ بۆ چارەسەرکرنا پرسا کورد بەلکو ژ بۆ چارەسەریا قەیرانێن دی یێن تورکیا ژی گەلەک گرنگ بوو، مخابن قۆناغا ئاشتیێ ژناڤچوو و هەتا نها ژی بەرپرسێن حوکمەتێ ئەگەرێ ژناڤچوونا قۆناغا ئاشتیێ بۆ رایا گشتی یا تورکیا ئاشکرا نەکرینە، دڤێت هەموو راستی بهێنە ئاشکرا کرن، چونکی پرسەکا گرنگ وەکو پرسا کوردی دڤێت بهێتە چارەسەرکرن، یێن ئاستەنگی ژی دروست کرن دڤێت بهێنە دادگەهیکرن.
سەعدوللا ئەرگین ئەو یەک ژی دیار کر، دڤێت پرسا کوردی ل پەرلەمانێ تورکیا بهێتە چارەسەرکرن، نابیت پرسا کوردی ل پشت پەردەیان و ژ بۆ بەرژەوەندیا هندەک ئالیان ببیتە بابەتەک سیاسی و جودا، پرسا کوردی پرسا سەرەکی و گرنگ یا تورکیا یە، ئەڤرۆکە نەبیت ژی سوباهی تورکیا نەچارە پرسا کورد چارەسەر بکەت، ژ بەر ڤێ یەکێ ژی دڤێت ل پەرلەمانێ تورکیا چاوانیا چارەسەرکرنا پرسا کوردی بهێتە گەنگەشەکرن، هەر کەس دزانیت ب چارەسەرکرنا پرسا کوردی دێ گەلەک پرسێن دی یێن گرنگ ژی ل تورکیا هێنە چارەسەرکرن و دێ گەلەک مەترسی ژی ژناڤ چن، ژ بەر ڤێ یەکێ ژی بابەتێ چارەسەرکرنا پرسا کوردی دڤێت د رۆژەڤا تورکیا دا بیت و گرنگە بەرپرسێن نها یێن تورکیا ژی کار بۆ چارەسەرکرنا ڤێ پرسێ بکەن.
