باژێرڤانیێن دهۆكێ 300 پرۆژە ب گوژمێ پتر ژ 226 ملیار دیناران ئەنجامداینە
ئەمیر ئەترووشی:
رێڤەبەرێ گشتیێ باژێرڤانیان ل پارێزگەها دهۆكێ دیار كر، د ماوەیێ كابینا نەهێ یا حوكمەتا هەرێما كوردستانێ دا 69 پرۆژە ب كوژمێ پتر ژ 54 ملیار دیناران ئەنجامداینە و سێ گرێبەستێن پاقژكرنێ ژی ب كۆژمێ 16 ملیار و 700 ملیۆن دیناران هاتینە دان، سەرجەمێ گشتیێ پارێ سالا 2023ێ دا بیتە 73 ملیار دینار كۆ هاتبونە تەرخانكرن ژلایێ حكومەتا هەرێما كوردستانێ ڤە بۆ باژێرڤانیێن پارێزگەها دهۆكێ «.
ئەندازیار دیار بەحری، رێڤەبەرێ گشتیێ باژێرڤانیان ل پارێزگەها دهۆكێ راگەهاند، ل سالا 2019 هەتا سالا 2023ێ رێڤەبەریا گشتیێ باژێرڤانیا 300 پرۆژە بجهئیناینە دگەل چوار گریبەستێن پاقژكرنێ، ژ سەرجەمێ 300 پرۆژە ژی 195 پرۆژە ب دووماهی هاتنە و كەڤتینە د خزمەتا وەلاتیان دا و 105 پرۆژە ژی ئەو پرۆژە بووینە یێن بەری چەند سالان هاتینە راوەستاندن و نوكە هندەك ژی كەفتینە دكاریدا، هەروەسا ب رێژا 15% ژ داهاتێ باژێرڤانیان بوویە و ب كوژمێ 7 ملیار و200 ملیۆن دیناران ژی پارچەیێن ئەردی هاتبوونە فرۆتن و ئەڤ پارە بۆ ئەنجامدانا پرۆژێن خزمەتگوزاری هاتیە تەرخانكرن».
رێڤەبەرێ گشتیێ باژێرڤانیان ل پارێزگەها دهۆكێ، ئاشكەرا كر، 19 باخچە یێن هاتینە چێكرن، 330 كیلۆمەترێن جادا دناڤ سنوورێ باژێرڤانیێن دهۆكێ دا هاتینە چێكرن و پرۆژێن وەبەرهێنانێ ژی پارچەیێن ئەردی بۆ هاتینە تەرخانكرن وەكو پرۆژەیێن ئاكنجیبوونێ و پرۆژەیێن ژینگەهێ و نەمانگەهان و 22 دونەمێن ئەردی بۆ نەمامگەهەكێ ل تەناهیێ هاتینە تەرخانكرن و نوكە د قوناغێن جێبەجێكرنێ دایە».
