ئێشانا سەركەفتیێ شكەستی
عەززام حەدبا
وەرگێڕان: عزەت یوسف
د هەڤپەیڤینەكا زیندی دا، رێزدار دێڤید داڕژیا سەر سەرێ پێشكێشكارێ و گۆت:
– خانما من، پرسیارا تە یا بەلاخازە، ئەز ژی بەرسڤێ نادەم.
پێشكێشكار ژ كارڤەدانا ژەنەرالی حێبەتی بوو، و گۆت:
– ئەڤ پرسیارە نوینەراتییا تەخەكا نە یا كێما خەلكی دكەت.
– تەخەكا تێكدەر و هەڤسۆزێن وان، من گۆمان نینە تو ژی ئێكی ژ وان.
پێشكێشكارێ ب سەرسۆرمانی پرسیار كر:
– ئەز؟
– ئەرێ تو.. جلكێن تە ژی د ئازراندینە.
– ئازراندی؟ چەند سەیرە؟ بۆچی؟
– هەلگرێ رەنگێن ئالا و درویشمێ وانە.
پێشكێشكارێ كرە كەنی و گۆت:
– ئەڤ جلكە ل وەلاتێ مە كەڤنەشۆپینە و هیچ تێكهەلی د گەل مژارا ئەز ل گەل تە گەنگەشە دكەم هەر نینە.
– جلكێن تە د ئازراندی و رەتكرینە.. هەروەسا شرۆڤە و پرسیارێن تە ژی.
پێشكێشكارێ ب ئاوایەكێ رەق گۆت:
– هەر جلكێ دلێ من بخوازیت لبەر خۆ دكەم، و پرسیارا من دڤێت ژی ئاراستەی تە دكەم.
– باشە، پا ئەز دێ خۆ ڤەكێشم.
دێڤیدی وەشانا گشتی ژ ئوفیسا خۆ بڕی.
چەند خولەكەك بسەرڤە نەچوون، هەتا روجەرزێ هاریكارێ وی دەرگەهـ قوتا، پاش رێپێدانێ ب ژۆر كەفت. روجەرزی ب گەشبینی گۆت:
– نامەیێن پشتگیریێ ژ هەمی ئالی و دەران یێن بۆ مە دهێن.. و فیلویێن جیهانا ئازاد ژ بۆ سەركەفتنا مە دەست بلڤینێ كرن.
– ئەڤە چ سەركەفتنە؟ ئەم یێ ل گەل ئەهریمەنێ هایدرا شەڕی دكەین.. هەرگاڤا ئەم سەرەكی دبڕین دو سەرێن دی شین دبن.
روجەرز نێزیكی دێڤیدی بوو و دەستێ خۆ دانا سەر ملی و گۆت:
– بێ خەمبە؟ ئەڤێ جارێ ئەم دێ وان قوتبڕ كەین.
دێڤیدی ب خەمگینی گۆت:
– هێز ل گەل وان یا ژ خۆیە.. گەلەك جاران بەریا نها مە ئەو یێن جەرباندین.
روجەرزی ددانێن خۆ ل سەر ئێك سیركاندن و گۆت:
– ئەگەر هێز ل گەل وان یا بێ مفا بیت، پتریا هێزێ دێ یا ب مفا بیت.
دێڤیدی وەك نەرازیبوون سەرێ خۆ لەقاند و گۆت:
– قەدەرا مە یە چ كۆپێ تالە ڤەخوین؟ ئەم كەڤری ددانینە سەر پشتا خۆ و هەرجارا دگەهینە گوپیتكێ دیسا گرێل دبیتە خارێ.. ئەم كەله و ئاسێگەهان ئاڤا دكەین، دكەڤنە بەر برویسی یێن دژوار وەكی قەسرێن كاغەزێ دكەڤن.. ئەم ل دویڤ كانیا ژینێ دگەڕن دا تێهنا خۆ بشكێنین، لێ دەما دگەهینێ دبینین سەرابن.. چ تشت ل گەل وان فایدە ناكەت.. مە خانیێن وان وێران كرن.. ئاگر و ئاسن ب سەردا باراندن.. هەمی سەركردە رازی كرن كو ئەم یێ ل سەر راستیێ.. د سەر ڤێڕا هەرجار سەركەفتن ژ لەپێن مە دەردكەڤیت.. دەستێ مە ژ ئاسنی یە ئەی روجەرز، لێ ئەم ل خیزی.. ل ئاڤێ .. ل بای دوەرینین.
– خۆ ئارام بكە بەرێز..
دێڤیدی بۆینباخا حەفكا خۆ سست كر و گۆت:
– چیڕۆكێن خۆڕاگریا وان ل هەمی دران هێرشێ ل سەر من دكەن.. د خەون و هشیاریێ دا.. ل ئەردی و دەریایێ و ئاسمانی.. رەنگێن ئالایێ وان یێ بەلەنگاز د جلكێن پەیادەیان دا دبینم.. كەنیا وان یا تڕانەكار ب دفنبلندیا مە دبهیسم، كو ل هەمی دەڤەران دەنگڤەددەت.. قێڕینا وان ل بن هەڕفتان ژ بۆ هاریكاریێ گوهێن من كەڕ دكەن.. هەولددەم ب تبلێن خۆ بگرم.. لێ یا بێ مفایە.. دەنگ هەمی تشتی د سمیت.. هەروەكی ژناڤدا دهێت.. د كویراتیا هناڤێن خۆ دا، باش تێدگەهم كو ئەز سەركەفتیەكێ شكەستیمە.
