ژ ئەگەرێ بارانبارینی ل دو جهێن ئاكرێ كەڤر هاتنە خوار
ئاكرێ، رەمەزان زەكەریا:
ل دەمێ دو رۆژێن بۆری ل سنوورێ رێڤەبەریا بەرەڤانیا باژێری ل ئاكرێ ژ ئەگەرێ بارانبارینێ ل دو جهان كەڤر هاتنە خوار و ل ناوچەداریا گردەسێن ژی ئاگر بەربوو مالەكێ.
عەقید ئیبراهیم فەریق، رێڤەبەرێ بەرەڤانیا باژێری ل ئاكرێ بۆ ئەڤرۆ گۆت: “شەڤا بۆری كەڤر و بەرێن دەسپێكا زنجیرا چیایێ گەلی زنتا ل هنداڤی ڕێیا سەرەكی هاتنە خوار و ڕێ هاتە گرتن، تیما بنگەهێ بەرەڤانیا باژێری ل ناوچەداریا بجیل گەهشتنە جهێ روودانێ و ب زووترین دەم جادە هاتە پاقژكرن و ڕێ هاتە ڤەكرن”.
ناڤبری گۆتژی: “ژ لایەكێ دیڤە كەڤرەكێ مەزن ل گرێ شێخماڤێ هاتە خوار و كەفتە د ئاڤڕێژا تاخێ تاقێ یا شێخا د سەنتەرێ ئاكرێ دا و بوو ئەگەرێ بلندبوونا ئاستێ ئاڤێ و مالا وەلاتیەكی بن ئاڤ كەفت، تیما بنگەهێ بەرەڤانیا باژێری ل ئاكرێ گەهشتە جهێ روودانێ و شیان وی كەڤری بشكێنن و ڕێیا ئاڤێ ڤەكەن و مەترسیێ ل سەر مالێن تاخێ ناڤهاتی نەهێلن”.
عەقید ئیبراهیم خویا ژی كر، ژ ئەگەرێ وەڕگەڕیانا سۆپا گازێ ئاگر بەربوو مالا وەلاتی (م. س. ع) ل سەنتەرێ ناوچەداریا گردەسێن یا سەر ب ئاكرێڤە، تیما بنگەهێ بەرەڤانیا باژێری یا گردەسێن گەهشتە جهێ روودانێ و ئاگر ڤەمراند و ب تنێ زیانێن ماددی ل پاش خوە هێلان.
