ئەمریکا و بریتانیا دخوازن رۆژهەلاتا ناڤین تووشی شەڕەکێ دەمدرێژ بکەن
پەیڤدارێ وەزارەتا دەرڤە یا ئیرانێ راگەهاند، نها ل غەزە ب چەکێ ئەمریکا رۆژانە وەلاتیێن سڤیل دبنە قوربانی و جڤاکێ نێڤدەولەتی ل هەمبەر تاوانێن ئسرائیلێ بێدەنگە و رێ ناهێتە دان هاریکاریێن مرۆڤی ژی وەکو پێدڤی بگەهنە دەستێ خەلکێ سڤیل ل غەزە.
ناسر کەنعانی ئەو یەک ژی دیار کر، ئێرشێن ڤێ دووماهیێ یێن ئەمریکا و بریتانیا ل سەر حوسیێن یەمەنێ ژی نیشا ددەت نە ئەمریکا و نە ژی وەلاتێن دی کار بۆ ئارامیێ ل رۆژهەلاتا ناڤین ناکەن، ئەو هەر رۆژ دبێژیت ئارمانجا وان ئاشتی و ئارامی یە، لێ ب کریاری ئەو کار بۆ ئالۆزکرنا رەوشا رۆژهەلاتا ناڤین دکەن و ب تایبەتی ژی ئێرشێن ڤێ دووماهیێ یێن ئەمریکا و بریتانیا دێ رۆژهەلاتا ناڤین تووشێ شەڕەکێ نوو کەت، دڤێت ئێرشێن ل سەر حوسییان بهێنە راگرتن و ل ئالیێ دی دڤێت جڤاکێ نێڤدەولەتی رێ ل ئێرشێن ئسرائیلێ یێن ل سەر غەزە ژی بگریت، مخابن نها ژی رۆژانە ژن و زارۆ ل غەزە دبنە قوربانی.
پەیڤدارێ وەزارەتا دەرڤە یا ئیرانێ ئەو یەک ژی دیار کر، وەکو ئیران وان دڤێت شەرێ نها ب دووماهی بهێت دا ئێدی خەلک نەبنە قوربانی، لێ مخابن ئەمریکا ل گەل هەڤپەیمانێن خوە کار بۆ بەرفرەهبوونا شەڕی دکەن و ناهێلن رەوشا رۆژهەلاتا ناڤین یا ئارام بیت.
ئەو یەک د دەمەکێ دایە دوهی جارەکا دی حوسییان ئێرشی گەمیەکا ئەمریکا ل دەریا سۆر کرن لێ ئێرشا وان بێی ئەنجام ما و وەزارەتا دەرڤە یا ئەمریکا ژی راگەهاند ئەو دێ ب توندی بەرسڤا ئێرشێن حوسییان دەن.
