دڤێت کورد نەبنە پشکەک ژ شەڕێ نها ل دەڤەرێ
چاڤدێرێن سیاسی دیار دکەن، رۆژهەلاتا ناڤین بەر ب شەڕەکێ نوو ڤە دچیت، شەرێ نها ل غەزە دبیت بەرفرەهتر ژی لێ بهێت و کاریگەریا خوە ل سەر هەموو رۆژهەلاتا ناڤین بکەت، ژ بەر ڤێ یەکێ ژی گەلەک گرنگە کورد نەبنە پشکەک ژ شەڕێ نها، چونکی ئەو یەک د بەرژەوەندیا کوردان دا نینە.
حسێن تایسون نڤیسەر و چاڤدێرێ سیاسی راگەهاند، ئسرائیلێ دڤێت بەردەوامیێ بدەتە شەڕی و ل ئالیێ دی ژ بەر ئێرشێن ئەمریکا و بریتانیا یێن ل سەر حوسیێن یەمەنێ ژی رەوشەکا نوو هاتیە پێش، سەرۆک وەزیرێن ئسرائیلێ دبێژیت هەتا ئەو نەگەهنە ئارمانجێن خوە دێ شەڕ بەردەوام بیت، ئەو یەک ژی نیشا ددەت هەر دو ئالیێن شەڕی خوە بۆ قۆناغەکا نوو بەرهەڤ کرینە، ئانکۆ ب کورتی رۆژهەلاتا ناڤین بەر ب شەڕەکێ نوو ڤە دچیت و دبیت کاریگەریا خوە ل سەر گەلەک وەلاتان ژی بکەت، هەر ژ نها ڤە ل ئیراقێ ئالۆزی هەنە و ل سووریێ ژی رەوش باش نینە، ژ بەر ڤێ یەکێ ژی مەترسی ل سەر گەلێ کورد هەنە و دڤێت هێزێن سیاسی یێن کوردی گەلەک د هشیار بن.
ناڤهاتی ئەو یەک ژی دیار کر، راستە نها وەلاتێ کوردان هاتیە داگیرکرن و کورد ئێکە ژ وان گەلێن هەری کەڤن ل رۆژهەلاتا ناڤین کو نەگەهشتیە مافێن خوە، گەلەک سروشتی کورد شەڕی بۆ دامەزراندنا دەولەتا کوردستانێ بکەن، لێ رەوشا نها وەسا دخوازیت کورد ب رێیێن سیاسی و دبلۆماسیێ پەیوەندیێن خوە ل گەل هەموو وەلاتێن جیهانێ بهێز بکەن و خوە ژ هەر شەڕەکێ نوو ل دەڤەرێ ژی دوور بگرن، چونکی ئەو یەک دێ ئەنجامێن خوە یێن گەلەک خراب بۆ گەلێ کورد هەبیت.
محەمەد مەحمودی چاڤدێرێ سیاسی ژی دیار کر، وەلاتێن داگیرکەرێن کوردستانێ دیسان یێ پیلانان ل دژی گەلێ کورد دگێرن، نها ل هەرێما کوردستانێ رەوشەکا نوو هاتیە پێش، هێزێن سەر ب ئیرانێ دەمەکە ب رێیا درۆنان ئێرشی هەولێرێ دکەن و دخوازن هەرێما کوردستانێ تووشی شەڕەکێ نوو بکەن، لێ سیاسەتا حەکیمانە یا سەرکردایەتیا کورد ل هەرێما کوردستانێ هەتا نها رێ نەدایە تشتەک وەسا روو بدەت، براستی ژی نها د بەرژوەندیا هەرێما کوردستانێ و کوردان دا نینە ببنە پشکەک ژ شەڕێ نها ل رۆژهەلاتا ناڤین، پێدڤیە کورد د بیاڤێن سیاسی و دبلۆماسی د کار بۆ بهێزکرنا پێگەهێ خوە بکەن، ئەو یەک دێ بیتە ئەگەرێ بهێزبوونا پێگەهێ کوردان ل دەڤەرێ، گرنگە کورد نەبنە پشکەک ژ ئالۆزی و شەڕێ نها ل دەڤەرێ، چونکی د راستی دا شەڕێ نها ل دەڤەرێ شەڕێ کوردان نینە و چو مفایێن خوە ژی بۆ کوردان نابیت.
چاڤدێرێ سیاسی ئەو یەک ژی دیار کر، هەکە شەڕەک د ناڤبەرا ئەمریکا و دوژمنێن کوردان دا روو بدەت بلا کورد دیسان ژی نەبنە پشکەک ژ وی شەڕی، چونکی کوردان گەلەک ئاریشێن خوە یێن جودا هەنە، دڤێت بەری هەر تشتەکێ کورد ل هەرێما کوردستانێ ب تایبەتی ژی هەر دو هێزێن سەرەکی ئاریشێن هەی د ناڤبەرا خوە دا چارەسەر بکەن و پێکڤە کار بکەن دا جارەکا دی پێگەهێ هەرێما کوردستانێ د ئاستێ ئیراقێ و رۆژهەلاتا ناڤین دا بهێز بکەن، چونکی نها هەرێما کوردستانێ د ئاستێ نێڤدەولەتی دا نوونەراتیا هەموو کوردان ل جیهانێ دکەت.
دارا ناتق چاڤدێرێ سیاسی ل بەلجیکا ژی دیار کر، هەردەم دوژمنێن گەلێ کورد دخوازن کوردان تووشی شەڕی و ئالۆزیان بکەن، مە دیت کا چاوا بەرێ داعشێ دانە کوردان و گەلەک زیان گەهشتنە گەلێ کورد، نها دیسان دەڤەرا رۆژهەلاتا ناڤین بەر ب شەڕەکێ نوو ڤە دچیت، دوژمنێن گەلێ کوردستانێ بێگومان دێ بزاڤا ڤێ یەکێ کەن دیسان کوردان تووشی شەڕەکی مالوێران بکەن دا کوردان لاواز بکەن، لێ ئەز ب باوەرم سەرکردایەتیا سیاسی یا کوردی ژ هەموو پیلانێن دوژمنان ئاگەهدارە و دڤێت هێزێن کوردی رێ نەدەن ئالۆزیێن نها ل دەڤەرێ کاریگەریەکا خراب ل بەرژەوەندیێن گەلێ کورد بکەن.
ناڤهاتی ئەو یەک ژی دیار کر، هەکە شەڕەک د بەرژەوەندیا کوردان دا نەبیت مەترسیا خوە بۆ گەلێ کورد هەبیت دڤێت کورد هشیار بن و بزانن کا دێ چاوا بەرژەوەندیێن خوە پارێزن، هەکە شەرێ نها بەرفرەهتر لێ هات ژی دڤێت کورد ب تایبەتی ژی ل هەرێما کوردستانێ کورد نەبنە پشکەک ژ وی شەڕی، چونکی ئەو یەک شەڕێ کوردان نینە و چو خێرا وی شەڕی ژی بۆ کوردان نابیت.
