راگەهاندنەك ژ ژۆرا بازرگانی و پیشەسازیا دهۆكێ ل دۆر بایكۆتكرنا بەرهەمێن ئیرانی
ژوورا بازرگانی و پیشەسازیا دهۆكێ راگەهاندنەك بەلاڤكریە و تێدا هاتیە: پشتی هێڕشا بێ بەهانە و ستەمكارانە یا كۆمارا ئیسلامی یا ئیرانێ ل سەر هەولێرا پایتەختێ كوردستانێ ل 15ی ڤێ مەهێ، كو تێدا وەلاتیێن سڤیل بوونە ئارمانج و ب مخابنی ڤە ئێك ژ سەرمایەدارێن ب ناڤودەنگ یێن كوردستانێ بناڤێ (پێشرەو مەجید دزەیی) ل گەل كچەكا خوە شەهیدبوون و سێ ئەندامێن مالباتا وی ژی ب گرانی برینداربوون، هەروەسا ئێك ژ بازرگانێن دیار یێن ئیراقێ ژی د وێ هێرشێ دا شەهیدبوو، كو هەر هەمی خەلكێ بێ گونەهـ و سڤیل بووینە و یا دیارە، ئارمانجا هێرشێ ب تنێ تێكدانا ئاسایش و سەقامگیریا كوردستانێ و رێگرتنە ل پێشڤەچوونێن وێ یێن ئابووری و بازرگانی و پیشەسازی.
دیسا د راگەهاندنا ژوورا بازرگانیا دهۆكێ دا هاتیە: “ئەم ل ژوورا بازرگانی و پیشەیازیا دهۆكێ دوبارە ڤان هێرشێن ستەمكارانە ل دژی خەلكێ سڤیلێ كوردستانێ ب دژواری ئیدانە و شەرمزار دكەین و هەڤخەمیا خوە دگەهینینە مالباتێن قوربانیان و ژوورا بازرگانی و پیشەسازیا هەولێرێ كو ئێك ژ ئەندامێن وێ یێن كارا تێدا شەهیدبوو”.
د راگەهاندنا ژوورا بازرگانی دا هاتیە ژی: “ژ بەركو هەژمارەكا زۆر یا بەرهەمێن ئیرانی د بازارێن مە دا هەنە، ئەم ل ژوورا بازرگانی و پیشەسازیا دهۆكێ ب هووری ڤەكۆلینێ ل سەر دیتنا بازارێن پێگوهۆڕ بۆ بازرگانێن خوە دكەین بۆ وێ یەكێ ل جهێ بەرهەمێن ئیرانی، ب بەرهەمێن خۆمالی و یێن وەلاتێن دی یێن دەڤەرێ و جیهانێ پێدڤیا خەلكێ پارێزگەها دهۆكێ و كوردستانێ پڕ بكەین، دیسا ژ پلان و كارێن مە یێن دەستپێكی یە، كو بەرهەمێن ناڤخوەیی ل دووڤ ستانداردان بینینە ئاستێ بەرهەمێن وەلاتێن جیهانێ بۆ وێ یەكێ د سالێن نێزیك دا ئەم بشێین پشتبەستنێ ل سەر بەرهەم و شیانێن ناڤخوەیی بكەین و بكەینە پێگوهۆڕ بۆ بەرهەمێن بیانی”.
