پارێزگارێ هەولێرێ سوپاسیا جەماوەرێ پارێزگەها دهۆكێ دكەت
جەماوەرێ دهۆك و سێمیلێ: هێڕش و كریارێن ترسنۆكانە نەشێن ئیرادا خەلكێ هەرێمێ بشكێنن
ئەڤرۆ:
وەكو هەلویستەكێ نەرزایبوونێ ل رۆژا 18ی كانوونا دویێ 2024ێ ب هزاران ژ كەسایەتیێن جەماوەرێ دهۆك و سێمێلێ، خوەنیشادانەكا ئێمنانە ل سەنتەرێ باژێڕێ دهۆكێ ئەنجامدا و هێڕشا سۆپایێ پاسدارێن ئیرانێ بۆ سەر هەولێرێ شەرمزار كر.
د خوەنیشادانێ دا، ب سەدان درووشمێن نەرازیبوونێ هاتنە بلندكرن و پەیڤا جەماوەرێ خرڤەبوویی ژ لایێ مامۆستایێ ئایینی مەلا “زاهد گۆهەرزی” ڤە ب زمانێ كوردی هاتە خواندن، هەروەسا “د. رەشید فندی” یاداشتناما نەرازیبوونێ ب زمانێ عەربی خواند”د. داود سلێمان” سەرۆكێ زانكۆیا دهۆكێ یاداشتنامە ب زمانێ ئنگلیزی پێشكێش كر.
د هەر سێ یاداشتنامان دا، هێڕشا پاسدارێن ئیرانێ و مۆشەكبارانكرنا هەولێرا پایتەخت و شەهیدكرنا سڤیلێن بێ گونەه شەرمزاركرن و داخواز ژ جڤاكێ نیڤدەولەتی و حوكمەتا ئیراقا فیدرال كرن، كو ڤان تاوانا شەرمزاركەن، دیسا توخیبەكی بۆ ڤان دوژمنكاریان بۆ سەر ئاخا هەرێما كوردستانێ دانن و تەكەزكرن، كو ئەڤ كارێن ترسنوك نەشێن ئیرادا خەلكێ هەرێمێ بشكێنن. پاشی هەرسێ یاداشتنامە رادەستی بەرێز پارێزگارێ دهۆكێ هاتنە كرن.
ژ لایێ خوەڤە، د. عەلی تەتەر، پارێزگارێ دهۆكێ د پەیڤەكێ دا دوبارە هێڕشا پاسدارێن ئیرانێ بۆ سەر پایتەختێ هەرێما كوردستانێ و شەهیدكرنا ئافرەت و زارۆك و سڤیلان شەرمزار كر و داخواز ژ جڤاكێ دەولەتی و حوكمەتا ئیراقا فیدرال كر كو هەلویستێن توند هەمبەر ڤان كریارێن نەمرۆڤایەتی وەرگرن و سەرخوەشی گەهاندنە قۆربانیێن هێڕشێ و دەستخۆشی ل وان هەموو وەلاتی و لایەنان كر یێن ئەڤ تاوانە شەرمزاركرین.
دیسا پشتی خرڤەبوونا جەماوەرێ پارێزگەها دهۆكێ، ئومێد خوشناو، پارێزگارێ هەولێرێ سوپاسیا جەماوەرێ دهۆك و سێمێلێ كر و گۆت: “سوپاسیا دهۆكا رەنگین و باژێرێ هەلوست و مێرخاس و عەگیدان دكەین، هەڤخەمیا هەوە مە دلگەرمتر دكەت بۆ خەمێن نیشتمانی و پشكەكا گرنگ بوو، بۆ كێمكرنا خەم و كەسەرێن مە”.
