پارێزەرەكی سكالا ل سەر تیك تۆكچیان تۆمار كریە
هەولێر، قائید میرۆ:
نوكە هژمارەكا زۆر یا وەلاتیێن هەرێما كوردستانێ تۆڕا جڤاكیا تیك تۆكی بكار دئینن و پارێزەرەكی ژی سكالا ل سەر وان كەسێن ب رێیا تیك تۆكی زیان هەنە بۆ جڤاكی تۆمار كریە و گۆت: خەلك هەیە خانی و ترۆمبێل و زێڕێن هەڤژینا خوە بۆ كڕینا پۆینتێن تیك تۆكی فرۆتینە.
پارێزەرێ شیرەتكار رێبین سەباح بۆ رۆژناما ئەڤرۆ گۆت: (من یاداشتەك ئاراستەی دادگەهێ كریە دژی وان كەسێن دبێژنێ تیك تۆكچی ئەو ژی ب دو رێیا دێ رێگری ل ئەڤان كەسان بهێتە كرن یێن ب رێیا تیك تۆكی خەلكی سەردا دبەن یا ئێكێ داخوازكارێ گشتی سكالایێ تۆمار بكەت ل سەر هەر كەسەكێ بڤێت ب رێیا تۆڕا جڤاكیا تیك تۆكی خەلكی سەردا ببەت و جڤاكێ مە بەر ب تشتێن خراب ببەت، دو داخواز دكەم جهێن فرۆتنا پۆینتێن تیك تۆكی ژی بهێنە گرتن ل هەرێما كوردستانێ، چونكە هەبوونا جهێن فرۆتنا پۆینتێن تیك تۆكی زیان هەنە بۆسەر جڤاكێ مە).
رێبین گۆتژی: (خەلك هەبوویە خانی و ترۆمبێل و زێڕێن هەڤژینا خوە فرۆتینە ب مەرەما كڕینا پۆینتێن تیك تۆكی ئەڤە ددەمەكی دایە كو چو مفا نینە، تنێ زیان هەنە و مینا شەهیانێن بەرێ پۆینتێن تیك تۆكی دكەنە شاباش و ناڤێ خەلكی دهێتە گۆتن).
پارێزەرێ شیرەتكار ئاماژە پێ كر كو ب مەرەما پاراستنا جڤاكێ كوردستانێ و رێگری كرنێ ل زیانێن ئەڤی بابەتی ل سەر جڤاكی و خەلكێ هەرێما كوردستانێ مە داخواز كریە رێگری بهێتە كرن و ئێدی وەلاتی نەهێنە سەردا برن بۆ بابەتێن زیان هەین، مخابن ب رێیا تیك تۆكی و بابەتێن زیان بەخش جڤاك یێ بەر ب پاشەڕۆژەكا نەدیار دچیت و گۆت: (یاداشتا من هاتیە وەرگرتن ژلایێ دادگەهێ و رۆژێن داهاتی ژی دێ ئەنجامێن یاداشتێ بۆ هەموو خەلكی دیار بن).
پارێزەر رێبین ئەو چەندە ژی گۆت: (ل گورەی ماددێن قانوونی هەر تشتەكێ زیان بۆ جڤاكی و تاكێن ناڤا جڤاكی هەبیت سزایێن قانوونی بۆ هاتینە دیار كرن بۆ نموونە ل گورەی مادێ 403 یێ سزایێن عێراقی پێڕابوون دێ ل هەمبەر وان كەسان هێنە وەرگرتن یێن كارەكی دكەن بەرۆڤاژی جڤاكی بیت و زیان هەبن، ماددێن دیژی هەنە و ئەڤە كارێ دادگەهێ و داخوازكارێ گشتیە بۆ ئەنجامدانا پێڕابوونێن قانوونی).
