ئەمریکا داخوازەکێ ژ هێزێن سووریا دیموکرات دکەت
بەرپرسەکێ هێزێن سووریا دیموکرات کە نەخواستیە ناڤێ وی بهێتە ئاشکرا کرن، دیار کریە بەری دەمەکێ ئەمریکا ب فەرمی داخواز ژ هێزێن سووریا دیموکرات کریە کو ل گەل شامێ دەست ب دانوستاندنان بکەن و هەموو پرسێن هەی د ناڤبەرا خوە دا چارەسەر بکەن، چونکی دێ وی دەمی مەترسیێن هەی ل سەر کوردان کێمتر لێ هێن.
فەرماندارەکێ هێزێن سووریا دیموکرات بۆ مالپەرێ ئەلمونیتەر دیار کریە، بەری دەمەکێ شاندەکێ ئەمریکی سەرەدانا فەرمانداریا گشتی یا هێزێن سووریا دیموکرات کرینە و د سەرەدانا خوە دا بۆ فەرماندارێ گشتی یێ هێزێن سووریا دیموکرات دیار کرینە، دڤێت ئەو ل گەل شامێ دەست ب قۆناغەکا نوو بکەن، چونکی نها مەترسی ل سەر کوردان هەنە و هەکە کورد و شام بشێن پرسێن هەی د ناڤبەرا خوە دا چارەسەر بکەن وی دەمی مەترسیێن هەی دێ کێمتر لێ هێن و نها باشترین دەمە کورد بەرێ خوە بدەنە شامێ، چونکی ژ بلی دانوستاندن و چارەسەریا ل گەل شامێ چو رێیێن دی ل پێشبەری کوردان ل سووریێ نینن.
هەمان فەرمانداری ئەو یەک ژی دیار کریە، بەری نها رۆسیا ژی هەمان داخوازی ژ هێزێن سووریا دیموکرات کربوو، لێ رژێما سووریێ هەتا نها ژی یا بەرهەڤ نینە راستیا کوردان قەبوول بکەت، شامێ دڤێت وەکو بەرێ جارەکا دی حوکمێ ل هەموو سووریێ بکەت و مافێن رەوا یێن کوردان ژی نەدەتێ، ئەو یەک ژی ب چو رەنگەکێ ژ ئالیێ هێزێن سووریا دیموکرات و رێڤەبەریا خوەسەر ڤە ناهێتە قەبوول کرن، ژ بەر ڤێ یەکێ ژی دانوستاندنێن بەری نها یێن د ناڤبەرا رێڤەبەریا خوەسەر و شامێ دا بێی ئەنجام ماینە و هەری دووماهیێ ژی شاندەکێ رێڤەبەریا خوەسەر کو سەرەدانا رۆسیا کربوون بۆ بەرپرسێن وی وەلاتی دیار کربوون، دڤێت رۆسیا فشارێن خوە ل سەر شامێ زێدەتر لێ بکەت دا شام یا نەچار بیت داخوازیێن کوردان قەبوول بکەت.
ئەو یەک د دەمەکێ دایە کو بەری نها سیرگێی لاڤرۆڤ وەزیرێ دەرڤە یێ رۆسیا دیار کربوو، ئەو وەکو رۆسیا پشتەڤانیێ ل مافێن کوردان ل سووریێ دکەن و دڤێت کورد هەموو پرسێن خوە ل گەل شامێ چارەسەر بکەن، لێ ئەمریکا ناهێلیت کورد پرسێن خوە ل گەل شامێ چارەسەر بکەن و ئەمریکا ئاستەنگیان دروست دکەت.
چاڤدێرێن سیاسی ژی دیار دکەن، ئارمانجا ئەمریکا ئەوە دا ب رێیا چارەسەرکرنا ئاریشێن د ناڤبەرا هێزێن سووریا دیموکرات و شامێ دا رەوشەکا نوو بهێتە پێش، چونکی ئەمریکا بەرهەڤیان دکەت و دڤێت ژ سووریێ دەرکەڤیت.
هەژی ئاماژەپێدانێ یە کو پشتی ئێرشێن هێزێن سەر ب ئیرانێ ل سووریێ ل سەر هێزێن ئەمریکا، وەزارەتا بەرگریێ یا وی وەلاتی دیار کربوو ئەو ب چو رەنگەکێ ژ سووریێ دەرناکەڤن، هەتا شەرێ ل دژی داعشێ بەردەوام بیت ئەمریکا دێ ل سووریێ مینیت.
