ئه‌مریکا دێ هێزێن خوه ژ سووریێ ڤه‌کێشیت
نوونەرێ رۆسیا بۆ کاروبارێن سووریێ دیار دکەت، دەمێ ئەمریکا هێزێن خوە ژ ئیراقێ ڤەکێشان ئێدی نەشێت ل سووریێ ژی بمینیت، چونکی هەموو پێدڤیاتێن لەشکری یێن ئەمریکا ل سووریێ ب رێیا بنگەهێن وان یێن ل ئیراقێ دهێنە دابین کرن و هەر دەمێ ئەمریکا هێزێن خوە ژ ئیراقێ ڤەکێشان نەچارە ژ سووریێ ژی دەرکەڤیت.
ئەلێکساندێر لاڤرێنتیێڤ نوونه‌رێ تایبه‌ت یێ رۆسیا بۆ کاروبارێن سووریێ د داخۆیانیه‌کێ دا بۆ دەزگەهێن راگەهاندنا رۆسیا دیار کر، کو نها ل ئیراقێ گه‌نگه‌شه ل سه‌ر ڤه‌کێشانا هێزێن ئه‌مریکا دهێنه کرن و گۆت: (بێگۆمان ده‌مێ ئه‌مریکا هێزێن خوه ژ ئیراقێ ڤه‌کێشیت، نەشێت ل سووریێ ژی بمینیت. ژ به‌ر کو ئه‌مریکا پێدڤیاتێن هێزێن خوه یێن ل سووریێ ب رێیا بنگه‌هێن خوه یێن ل ئیراقێ دابین دکه‌ت و ده‌مێ بنگه‌هێن وێ ل ئیراقێ نه‌مینیت نەشێت ب ئاسانی که‌لوپه‌لێن سەربازی بگه‌هینته هێزێن خوە یێن ل سووریێ و وی ده‌می دێ ب نه‌چاری هێزێن خوه یێن ل سووریێ ژی ڤەکێشیت).
ناڤهاتی هه‌روه‌سا راگه‌هاند ل دووڤ زانیاریان وان هێزێن چەکدارێن شیعە یێن سەر ب ئیرانێ ناخوازن هێزێن ئه‌مریکا ل ئیراقێ بمینن و هه‌ول دده‌ن ئه‌مریکیان رازی بکه‌ن کو د دەمەکێ نێزیک دا هەموو هێزێن خوە ژ ئیراقێ ڤەکێشن و گۆت: (مه ڤه‌کۆلین ل سه‌ر زانیاریان کر و بۆ مه ده‌رکەفت کو هندەک بەرپرسێن ئەمریکا ژی دخوازن ئێدی هێزێن وان ل ئیراقێ نەمینن. لێ ئه‌مریکا پشتی کو ب شکه‌ستی ژ ئه‌فغانستانێ ده‌رکەفت، ڤه‌کێشانا ژ ئیراقێ و سووریێ ژی وه‌ک شکه‌ستنه‌کا مه‌زن بۆ خوە دبینیت و بۆ ڤێ چه‌ندێ سه‌رکرده‌یێن ئه‌مریکا هه‌تا ژ ده‌ستێ وان بهێت دێ ده‌رکه‌فتنا خوه یا ژ ئیراقێ و سوریێ گیرۆ کەن دا وەسا بشێن شکەستنا خوە پەردەپۆش بکەن).
نونه‌رێ تایبه‌ت یێ رۆسیا بۆ کاروبارێن سووریێ د دووماهیا ئاخڤتنا خوه دا ژی راگه‌هاند کو ل سووریێ په‌یوه‌ندیێن وان یێن ل گەل هێزێن ئه‌مریکا د ئاسته‌کی گه‌له‌ک کێم دانه و هه‌ماهه‌نگی د ناڤبه‌را وان دا نینه و گۆت: (په‌یوه‌ندیێن مه و ئه‌مریکا ل سووریێ گه‌له‌ک سنۆردارن و ب تنێ ل رۆژهه‌لاتێ فراتێ هندەک جاران پەیوەندیێن مە ل گەل هێزێن ئەمریکا دروست دبن، لێ ب گشتی پەیوەندیێن مە و ئەمریکا ل سووریێ لاوازن و نها ئەمریکی ژی هەست ب هندێ کرینە پێگەهێ وان ل سووریێ لاواز بوویە و ژ بەر ڤێ یەکێ ژی دخوازن ژ سووریێ دەرکەڤن).
ئەو یەک د دەمەکێ دایە کو بەری نها وەزارەتا بەرگریێ یا ئەمریکا دیار کربوو، هێزێن وان د چارچۆڤێ شەرێ ل دژی داعشێ ل سووریێ دانە و دێ ل سووریێ ژی مینن و جارێ د بەرنامێ وان دا نینە کو هێزێن خوە ژ سووریێ ڤەکێشن.
