ژ نەزانینا من ئەز هاتمە د سەردا برن

ئەڤرۆ، دلشاد عەبدوللا:

گەنجەکی دیار کر کو پشتی وان مالا خۆ بار کری کچا جیرانەکا وان یا دێرین هاتە مالا وان و گۆت: ژبەرکو مە تێکەلیەکا باش یا خێزانی ل گەل ئیکدو هەبوو، لەوا مە وەسا هزر کر کو هاتیە سەرەدانا مە، بەلێ ئەو بۆ فێلبازیێ هاتبو دەف مە و ئەم تووش کرین.

(س، م) ئەو گەنجەیە گۆت: (ئەڤ کچە یا مەزن بۆ، لێ هەڤژینی پێک نەئینا بۆ، پشتی دایکا من پرسیارا حالێ وێ کری گۆت ئەس یا باشم و نوکە ل گەل رێکخراوەکێ کار دکەم و ئەم موچا بو هەژارا چێدکەین و هەکە هوین ژی هندەک پارا بدەن دێ موچا بو هەوە هەموویان چێکەین، ئەم رازی بۆین، ئەوێ گۆت لێ ئەم پێدڤی ب 7دەفتەرێن دولارینە هەتا ئەم موچا بو هەوە چێدکەین هندەکا ئەز دێ دەم و هندەکا هوین بدەن، پشتی بو من ئاخفتی باوەری بو من چێکر و ب بورینا حەفتیەکێ 35 هزار دولار من دانەف وێ) .
ئەڤی گەنجی گۆتژی: (بو زانین من ٦ هزار دولار دەین کربون، ژبەر تەماعیێ خو ل سەرێ من دا و من نەگوتە چ کەسا بەس مالا مە دزانی، من هزر کر ئەڤە خوش شولە و ئەم هەموو دێ بینە خۆدان موچە، پشتی هینگێ ئەو کچە بەرزە بۆ، پشتی دووڤچونەکا باش مە زانی کو یا هاتیە گرتن و ل گەل چ رێکخراوا کار ناکەت و فێلبازی ل مە و گەلەک کەسێن دی ژی کریە و سەردا برینە.
(س، م) د بەردەوامیا ئاخفتنێن خۆدا گۆت: (پشتی هینگێ روژ بو روژێ ناڤ مالا مە نەخوش بو، بابێ من ژ قەهرا دا تووشی نەخوشیا زاهایمەر بو، دایکا من ژی هندی قەهر خوارن ب نەخوشیا مێلاکێ چو بەر دلوڤانیا خودێ، ئەگەر ژی نەزانین و تەماعیا من بو من هەموو تشت ژ دەست دان).
چارەسەری
برایێ هێژا: نوکە گەلەک رێکێن فێلبازیێ هەنە، هەکە مرۆڤ خو نەپارێزیت دێ تووشی کێشێن مەزن بیت، ئەڤجا دڤێت مرۆڤ گەلەک یێ هشیار بیت و پرسیارا کەسانێت شارەزا بکەت و خو خشیم نەکەت.
ئاریشێن ب ڤی رەنگی دهێنە روودان دەما کو مرۆڤ پرسیارا چ کەسێن شارەزا د بوراێ یاسایی دا نەکەت، پشتی تووش دبیت ژنوی دهێتە دادگەهێ و دێ بژیت کا ئەس چ بکەم؟ ئەڤ سەرەدەریە نە یا سەردەمانەیە و رەوشەنبیریا یاسایی نینە، ڕەنگە بڤێ سەرەدەریێ تو بگەهیە مافێ خو، بەلێ ل گەلدا گەلەک تشتێن دی دێ ژ دەست دەی، ئەڤجا بەری هەر گاڤەکێ بهاڤێژی دڤێت دووڤچونەکا باش بو وی کاری بکەی و زانیاریێن دروست ل سەر کاری وەربگری.

کۆمێنتا تە