ئێکەتیا ئۆرۆپا داخوازەکێ ژ تورکیا دکەت
بەرپرسێ پەیوەندیێن دەرڤە یێ ئێکەتیا ئۆرۆپا راگەهاند، وان دڤێت پەیوەندیێن خوە ل گەل تورکیا باشتر لێ بکەن، لێ دڤێت تورکیا ژی هندەک گوهۆڕینان بکەت و رێزێ ل بریارێن دادگەها ئۆرۆپا و مافێن مرۆڤی بگریت، چونکی نها د بیاڤێ ئازادیا راگەهاندنێ دا ئاریشێن گەلەک مەزن ل تورکیا هەنە.
جۆزپ بۆریل بەرپرسێ پەیوەندیێن دەرڤە یێ ئێکەتیا ئۆرۆپا راگەهاند، تورکیا بۆ ئۆرۆپا وەلاتەک گرنگە و وەکو ئێکەتیا ئۆرۆپا وان دڤێت پەیوەندیێن خوە ل گەل تورکیا بهێزتر لێ بکەن، ژ بەر ڤێ یەکێ ژی دڤێت تورکیا هندەک گوهۆڕینێن بلەز بکەت، بەری نها چەندین جاران دادگەها مافێن مرۆڤی هندەک بریار سەبارەت ب تورکیا داینە، لێ هەتا نها ژی تورکیا پێگیری ب بریارێن دادگەهێ نەکریە، ئەو یەک ژ ئالیێ ئێکەتیا ئۆرۆپا ڤە ناهێتە قەبوول کرن، چونکی هەکە تورکیا بڤێت ببیتە ئەنداما ئێکەتیا ئۆرۆپا دڤێت ئەرکێن ل سەر ملێن خوە بجه بینیت و گۆت: (هەموو وەلاتێن ئەندامێن ئێکەتیا ئۆرۆپا دخوازن پەیوەندیێن خوە ل گەل تورکیا باشتر لێ بکەن، تورکیا جهەکێ خوە یێ گرنگ ل رۆژهەلاتا ناڤین و ئۆرۆپا هەیە، لێ سیاسەتا نها یا تورکیا زیانا خوە بۆ ئۆرۆپا هەبوویە و ژ بەر ڤێ یەکێ ژی پڕانیا وەلاتێن ئێکەتیا ئۆرۆپا د چەند سالێن بۆری دا دژبەریا سیاسەتا حوکمەتا نها یا تورکیا کرینە).
ناڤهاتی ئەو یەک ژی دیار کر، نها ل تورکیا ئاریشێن گەلەک مەزن هەنە، بریارێن دادگەهێن تورکیا ل دۆر کەسێن سیاسی سەربخوە نینن، دەولەتا تورکیا دەستێوەردانێ د بریارێن دادگەهان دا دکەت، ئەو یەک ژی وەکو ئێکەتیا ئۆرۆپا بۆ مە ئاریشەکا گەلەک مەزنە و رێگریێ ل هەمبەر ئەندامەتیا تورکیا دروست دکەت، ل دۆر ڤێ یەکێ ژی وەکو ئێکەتیا ئۆرۆپا مە بەری نها نەرازیبوونا خوە ل هەمبەر تورکیا دیار کریە و گۆت: (تورکیا دشێت ب رێیا هندەک گوهۆڕینان خوە پتر ژ هەر دەمەکێ نێزیکی ئێکەتیا ئۆرۆپا بکەت، خالەکا دی یا گرنگ ژی بابەتێ ئازادیا راگەهاندنێ یە، مخابن فشارێن مەزن ل سەر راگەهاندنا ئازاد و رۆژنامەڤانان ل تورکیا هەیە، ب سەدان رۆژنامەڤان ژ بەر نێرینێن خوە یێن جودا نها ل زیندانان دانە و دڤێت ئەو یەک نەمینیت).
ئەو یەک د دەمەکێ دایە کو بەری نها سەرۆک کۆمارێ تورکیا رەجەب تەیب ئەردۆغان ژی دیار کربوو، نابیت وەلاتێن ئێکەتیا ئۆرۆپا دەستێوەردانێ د بریارێن دادگەهێن تورکیا دا بکەن، چونکی تورکیا وەلاتەک سەربخوە یە و دڤێت وەلاتێن ئێکەتیا ئۆرۆپا رێزێ ل تورکیا بگرن، دڤێت ئێدی ئێکەتیا ئۆرۆپا بریارا خوە یا دووماهیێ ل دۆر ئەندامەتیا تورکیا ژی بدەت، چونکی وەکو تورکیا ئەو نەشێن هەتا هەتای چاڤەرێی ڤێ یەکێ بن کا دێ ئێکەتیا ئۆرۆپا سەبارەت ب ئەندامەتیا تورکیا چ کەت، دڤێت ئێکەتیا ئۆرۆپا د دەمەکێ نێزیک دا هەلوەستێ خوە ل دۆر تورکیا ئاشکرا بکەت.
