نەخۆشترین شەڕێ دژیانا خوە دا كەفتیمێ داستانا دێرەلۆكێ بوو
دیدار، سالار محەمەد دۆسكی:
پێشمەرگەیێ چاڤ نەترسێ شۆرەشا 26ی گولانێ (سەلیم تاها خالد) یێ بەرنیاس ب (سەلیم زێوەی) ل سالا 1969ێ ل گوندێ زێوا شێخ پیرامیس ل دەڤەرا دۆسكیا ژ دایك بوویە، هێشتا ل ژیێ زاروكینیێ دەست ب خەبات و بەرخودانا مللەتی كریە.
پێشمەرگێ شۆرەشا گولانێ سەلیم زێوەی، د دیدارەكێ دا ل گەل رۆژناما ئەڤرۆ گۆت: من خواندنا خوە یا سەرەتایی ل گوندێ بامەرنێ ب دووماهی ئینایە وی دەمی برایێ من (قادر زێوەی) پێشمەرگە بوو و گەلەك چالاكی ل دەڤەرێ ئەنجام د دان و دەنگ و باس دگەهشتنە ئەمنێ و رۆژەكێ ل قوتابخانێ بووم رێڤەبەرێ قوتابخانێ(سەعید رەجب) هات و كەسەكێ ئەمنێ ل گەل بوو و گازی من كر و گۆت بلا ب شەڤ قادر زێوەی جندیێن مە ب كوژیت و توژی سپێدێ وەرە قوتابخانا سەدامی بخوینە گۆت بلا پەرتووكێن تە ل قوتابخانێ بن و هەرە ل قوتابخانا قادری ب خوینە ل (قلینگەهێ) و نەچاربووم دەست ژ خواندنێ بەردەم و نەچاربووین مە بخوە كارێ چاندنێ كر و سالا 1986ێ هاتمە داخازكرن بچمە لەشكری یا ب زووری ل ئیراقێ لێ من پێشمەرگایەتی هەلبژارت و من لەشكری یا ب زووری یا رژێمێ رەدكر.
هەمان پێشمەرگەی گۆت: رێكخراوەك هەبوو وی دەمی سەلمان محمود بامەرنی بەرپرسێ وێ رێكخراوێ بوو، پشتی بورینا هەیڤەكێ ل گەل وێ رێكخراوێ نڤیسارەك ژ لقێ هات و (خسرۆ بامەرنی) بۆ بەرپەرسێ وێ رێكخراوێ وی دەمی گوندێ (داودیێ) هاتە بەردان و بارەگایێ مە ل وی گوندی هاتەدانان و سێ شەڤان ماینە ل گوندێ ناڤبری و رۆژەكێ نڤیسارەك ژ لژنا ئامێدیێ هات و گۆت پێدڤی یە هەر رێكخراوەكێ (10) پێشمەرگە بهێنەژێگرتن و وی دەمی من سەربور و شارەزایی ل شەران دا نەبوو و رێكخراوێ ناڤێ من ژی دانا ل گەل ئەوان پێشمەرگێن هاتینە ژێگرتن و ئەڤە بۆ راكرنا فەوجەكا لەشكرێ ئیراقێ هاتبوونە راسپاردن، ل سالا 1987ێ ئەم چووینە چیایێ (مەتینی و قولپینە گوندێ بازێ) ملازم عەلی و د. رۆژ هەر دو هاتبوونە دەڤەرێ بۆ ئەنجامدانا هندەك كریارا وی دەمی شەر پارتیزانی بوو و بتنێ شیانێن پێشمەرگەی دانانا كەمینەكێ بوو یان هاڤێتنا رەبیەكێ بوو لێ هاتنا هەر دو بەرێزێن من سەری ئاماژە پێكرین بۆ ئەنجامدانا هندەك كریارێن مەزن بوو ل دەڤەرێ و راكرنا فەوجەكێ ناڤەەكێ مەزن بوو، وێ رۆژێ مەغرەب د. رۆژ ل گەل مولازم عەلی هاتن و كومبوونەك ل گەل مە ئەنجامدا و دیاركرن كو رێكخراوێن لژنێن زاخۆ و شێخان و ئامێدی و ئەڤ پێشمەرگێن چاف نەترس هاتینە ژێكگرتن بۆ وێ چەندێ ئەڤ چالاكیا پێشمەرگەی سەر بگریت و مە چ رێك نینن دڤێـ ئەڤ فەوجە بهێتە راكرن و هەمان دەم پێشمەرگە ژ لقێ ژی هاتبوون، ئەم ژ بازێ دەربازبووینە گوندێ(جمبلكی) و دەربازبووین مە سیمێ لەشكری دیت و مە پێستركەك ئینا و چووینە ناڤ فوجێ و مە خوە گرت هەتا دەمژمێر سفر دەست پێ بكەت كو دەمژمێر ئێك بوو و هندە رەبیە ل دەر دوران ژی هەبوون و پێشمەرگە هاتبوونە دەست نیشانكرن كو بۆ هەر ئەگەرەكێ ب هاڤێژنێ لێ چالاكی و لڤینا پێشمەرگە دڤێت ژ دەف مە دەست پێ بكەت چونكە بارەگایێ فەوجێ ل دەف مەیە و دەمێ دەژمێر ئێك زێرەڤان هاتی و ئێئتەك د دەستی دا وی دەمی راستی ئەم ترسیاین و ئەڤە ئێكەم شەر بوو ئەز پشكداریێ تێدا بكەم وی دەمی (قادری) گۆت نە ترسن ئەو خالەكا زێرەڤانیێ یە ئەو زێرەڤان دێ ئێكو دو گوهورن و ل گەل گوهورینێ ئارپیچەك هاڤێتنێ و ل گەل هاڤێتنێ ئەز ل گەل جەمشید و ئەمین ئەم بن كەتین ومە سەربور دشەران دا نەبوو و پێشمەرگە ژ هەمی لایەكی ڤە لدیف پلانا هاتیەدانان دەربازبوو و ئەم بن كەتین و كەفتینە بن گری و فەوج ژی هاتبوونە بن گری دا و ئەم كەفتینە دناڤا فەوجێ دا و من گۆتە هەڤالێ خوە بچاڤا ئەم د شاشین و پێشمەرگە یێ رەمیێ دكەت و مە گازیكر و كەسەكێ هاژ مە نینە و هەڤالێ من گۆتێ ئەڤە هولەكە چەند مرۆڤێن تێدا و دێ نارنجوكا هاڤێنیێ و پشتی مە هاڤێتینێ هەڤالێن مە گازیكرن ئەو كینە وێرێ؟ مە گۆتێ ئەمین وی دەمی (سەید بەهجت بانكی) وێرێ بوو و دەنگێ مە نیاسی و گۆتە هەڤالێن خوە ئەڤە پێشمەرگێن مە نە و بچاڤا ب خەلەتی هاتینە ڤێرە و ژووردا هاتنە دەف مە و سوپاس بۆ خودێ چالاكیا مە ب سەركەفتیانە دەربازبوو و ئەو فەوج هاتە راكرن و گەلەك دەسكەفتی ب دەست ڤە هاتن و گەلەك دەنگ ڤەدا و هەتا چەندین رۆژان ئێزگێ دەنگێ كوردستانێ بەحسێ وێ چالاكیێ دكر و دو فرۆكە هاتن و هەڤالێن مە گۆتن بلا هێنە پێشمەرگە بچنە وی باسكی دەرسوكێن خوە ب لڤ لڤینن دا فرۆكە رەمیێ ل دەڤەرێ بكەن و كەسەكی گۆتە من تو هەرە وی باسكی دەرسوكا خوە ب لڤینە و ئەز و جەشمید چووینە و هەمان دەم فرۆكا ئەم دیتین و ئێك سەر بەرێ سینگێ خوە دامە و ئێكسەر هاتنە مە و هەڤالێن ئەم راسپاردین ئێكسەر ساروخەك هاڤێتە فرۆكەكێ و لێدا و ئەو فرۆكە بۆ چار پرت و هاتە خوار و دەنگڤەدانا چالاكی یا پێشمەرگەی یا فرۆكێ بوو و ئێدی فرۆكە نەدوێریان ب ئازادی و ر رحەتی ل سەر دەڤەرێ ب فرن و بتنێ فرۆكێن شەرەك بهێن و ئەو فرۆكا كەفتی گەلەك جندی ژی تێدا بوون و هەمی ل ئەسمانی هاتە ژنافبرن، دووڤ دا هاتین و پشتی ماوەكی پلان بۆ راكرنا فەوجا بامەرنێ هاتەدانان و ئەو ژی هاتەراكرن وێ چالاكیێ ژی دەنگڤەدانەكا مەزن هەبوو ل دەڤەرێ.
هەمان پێشمەرگێ شۆرەشا گولانێ گۆت: دووڤ دا پلانا راكرنا فەوجەكێ ل گوندێ (بێبادێ) هاتەدانان دناڤبەرا (قدش و ئامێدی) و دەمێ ب سەر كەفتین چەند رەبیەك ل سەرێ چیایی بوون و گۆتن ئەف رەبیەلادەی ناكەن و رەبیەك دناڤبەرا جادا پشت بێبادێ و گۆتن ئەف رەبیە دەنگی ناكەت و مە پەیوەندی ل گەل هەیە و چووینە دناڤبەرا فەوجێ و رەبیێ دا و گەلەك ب ساناهی ئەو فەوج هاتەراكرن.
هەمان پێشمەرگێ شۆرەشا گولانێ ئەو ژی گۆت: پشتی سەركەفتنا پێشمەرگەی ل ناحیا مانگێشكێ، پێشمەرگێ چاف نەترس پلانا ستاندنا كانی ماسێ دانا و دەڤەر گەلەك یا گرنگ بوو بۆ پێشمەرگەی چونكە دەڤەرەكا بەرفرەهـ بوو و دڤیا ستاندبا و كانی ماسێ تێدا بمینن و هوسا پلان هاتبوو دانان، رۆژەكێ ل كانی مەزنێ بوو و زێرەڤانیا من دناڤبەرا چار بۆ شەشێ دا بوو و ئەز ل سەر بانی بووم من تەماشەكرێ ل هنداف گوندێ ئەردنا برسییێن چەكی یێ ڤەدەن و من ژی هەڤالێن خوە هشیاركرن و مە دا رێ و ئەم ل نێزیك گوندێ دیلكا ب سەركەفتین و (حوزەیفی) گازی كر وی دەمی بەرگێری مللی بوو و داخازا هاریكاریێ كر و دیاركر كو لەشكری دورپێچ كرینە، ئەم سەر كەفتین و نێزیك كوپی وی دەمی دو رێكخراو هاتبوونە دورپێچ كرن و (خسرو بامەرنی) بەرپرسێ رێكخراوێ بوو و (جەهوەر ئەرەدنی) هاریكارێ رێكخراوێ بوو و پشتی گەهشتینە دەڤەری مە دیت لەشكرێ ئیراقێ گەلەك بەر بەلاف بوویە و ل سەر ئەوان كوپان بەلاڤ بووینە و دنیا گەلەك یا تەزی بوو و ئەوا هزر كر چالاكیا خوە ب دووماهی ئینایە و ئەگەر بوو رۆژ بهێنە ناڤ گوندێ ئەردنا و ئەگەر هاربەك یان پێشمەرگەك تێدا بیت ئێكسەر دەستە سەربكەن، وی دەمی ژیان گەلەك یا بزحمەت بوو.
