هێزێن سەر ب ئیرانێ ڤە ب چەکێ گران ل دێرازۆرێ خوە جهـ دبن
پشتی ئێرشێن ڤێ دووماهیێ یێن ئەمریکا ل سووریێ و ئیراقێ، هێزێن چەکدارێن سەر ب ئیرانێ ڤە ل دیرازۆرێ و دەوروبەرێن وێ ب چەکێ گران جهێ خوە دبن و فەرماندارەکێ ئەمریکا ژی دیار دکەت، هەکە ئیرانێ بڤێت ل سووریێ بۆ وان ئاریشێن نوو دروست بکەت ئەو دێ ب توندی بەرسڤا ئیرانێ دەن.
فەرماندارەکێ هێزێن سووریا دیموکراتیک دیار کر، پشتی ئێرشێن ڤێ دووماهیێ یێن ئەمریکا ل سەر هێزێن چەکدارێن سەر ب ئیرانێ، نها هێزێن سەر ب ئیرانێ ل دێرازۆرێ و دەوروبەرێن وێ پێگەهێ خوە بهێز دکەن، ب سەدان چەکدارێن نوو ب چەکێ گران ل گەلەک دەڤەران بجه بووینە و ئەو یەک ژی دێ بیتە ئەگەرێ روودانا ئاریشێن نوو ل سووریێ، چونکی بجهبوونا وان چەکداران ل دێرازۆرێ و دەوروبەرێن وێ ژ قەستان نینە و وان دڤێت ل دژی ئەمریکا دەست ب هندەک بزاڤێن نوو بکەن، هەکە رەوش وەسا بەردەوام بیت دێ دێرازۆر بیتە مەیدانا شەڕەکێ نوو و ئەو یەک دێ کاریگەریەکا خوە یا گەلەک خراب ل سووریێ و رۆژئاڤایێ کوردستانێ ژی کەت.
هەمان فەرمانداری ئەو یەک ژی دیار کریە، بەری نها ژی گرۆپێن چەکدارێن سەر ب ئیرانێ ل هندەک دەڤەران ل دێرازۆرێ هەبوون لێ نها هەم هژمارا خوە زێدەتر لێ کرینە و هەم ژی گەلەک چەکێ گران ل گەل وان هێزان هەنە و ئەو یەک ژی جهێ مەترسیێ یە.
سەبارەت ب وێ هێزێن دوهی وەزارەتا بەرگریێ یا ئەمریکا ژی دیار کر، ئەو ل سووریێ کار بۆ ئارامیێ دکەن، ئارمانجا سەرەکی یا ئەمریکا ل سووریێ شەڕێ ل دژی داعشێ یە، چونکی هەتا نها ژی داعش مەترسیەکا گەلەک مەزنە و هەکە تیرۆرستێن داعشێ دەلیڤە ببینن دێ جارەکا دی دەست ب کریارێن تیرۆرستی کەن، ژ بەر ڤێ یەکێ ژی هەتا داعش ل سووریێ هەبیت ئەو دێ ل وێرێ مینن.
وەزارەتا بەرگریێ یا ئەمریکا سەبارەت ب بجهبوونا هێزێن چەکدارێن سەر ب ئیرانێ ل دێرازۆرێ و دەوبەرێن وێ ژی دیار کریە، هەر هێزەکا چەکدار یا سەر ب ئیرانێ ل سووریێ ئاریشان بۆ ئەمریکا دروست بکەت یان ژی بزاڤا ئێرشەکێ ل سەر بنگەهێن ئەمریکا ل سووریێ بکەت دێ ب توندی بەرسڤ هێتە دان.
ئەو یەک د دەمەکێ دایە دوهی ب درۆنان ئێرشی بنگەهەکا سەربازی یا هێزێن سووریا دیموکرات هاتە کرن و شەش شەرڤانان جانێ خوە ژ دەست دان و فەرمانداریا هێزێن سووریا دیموکرات ژی گرۆپێن چەکدارێن سەر ب ئیرانێ ب ئەنجامدانا وێ ئێرشێ تومەتبار دکەت.
چاڤدێرێن سیاسی ژی دیار دکەن، ئیران و ئەمریکا ب رەنگەکێ راستەوەخوە شەرێ هەڤدو ناکەن، بەلکو نها شەڕەک جوداتر هەیە و هەر دو ئالی ژی ب رەنگەکێ سنۆردار ئێرشان دکەن، ژ بەر ڤێ یەکێ ژی ئیرانێ دڤێت ب رێیا گرۆپێن چەکدار ل سووریێ ئاریشێن نوو بۆ ئەمریکا دروست بکەت، بجهبوونا هێزێن چەکدار ل دێرازۆرێ و دەوروبەرێن وێ دشێت ببیتە ئەگەرێ روودانا ئالۆزیێن نوو ل سووریێ، چونکی ئیرانێ دڤێت ل دەرڤەیی سنۆرێن خوە و ب رەنگەکێ جودا شەڕێ ئەمریکا بکەت.
