پڕانیا وەلاتیێن تورکیا داخوازا چارەسەرکرنا پرسا کوردی دکەن
ناڤەندا ڤەکۆلینێن سیاسی و جڤاکی یا تورکیا ئەنجامێ ڤەکۆلینا خوە یا ل پڕانیا باژێرێن تورکیا بەلاڤکر و راگەهاند، پتر ژ ٦٠٪ وەلاتیێن تورکیا وەسا دبینن پرسا سەرەکی یا تورکیا پرسا کوردی یە و هەتا پرسا کوردی ل تورکیا نەهێتە چارەسەرکرن پرسێن دی یێن تورکیا ب تایبەتی ژی پرسا ئابووری چارەسەر نابیت.
ناڤەندا ڤەکۆلینێن سیاسی و جڤاکی یا تورکیا ئەنجامێ ڤەکۆلینا خوە یا چەند مەهێن بۆری ل هەموو باژێرێن تورکیا بەلاڤکر و راگەهاند، چەند مەهن ئەو ل هەموو باژێرێن تورکیا دەست ب ڤەکۆلینەکا مەیدانی بۆ رەوشا نها یا تورکیا کرینە و پرسیار ژ وەلاتیان کرینە کا پرسا سەرەکی یا تورکیا چیە، د بەرسڤێ دا پتر ژ ٦٠٪ ژ پشکداربوویان دیار کرینە کو پرسا کوردی پرسا سەرەکی یا تورکیا یە و هەتا پرسا کوردی ل تورکیا دوور ژ شەری و ب رێیێن سیاسی نەهێتە چارەسەرکرن، رەوشا تورکیا دێ هەر یا ئالۆز بیت و ب تایبەتی ژی قەیرانا ئابووری ل تورکیا دێ یا بەردەوام بیت و دڤێت پرسا کوردی ل تورکیا بهێتە چارەسەرکرن.
هەمان ناڤەندێ ئەو یەک ژی دیار کریە، پشکداربوویێن راپرسیێ ئاماژە ب ڤێ یەکێ ژی کرینە سەرۆک کۆمارێ تورکیا رەجەب تەیب ئەردۆغان کەسەک ب هێزە و دشێت پرسا کوردی ل تورکیا چارەسەر بکەت، لێ دڤێت جهێ چارەسەریێ پەرلەمانێ تورکیا بیت، چونکی بەری نها هندەک بزاڤ هاتینە کرن لێ بێی ئەنجام ماینە، دڤێت پرسا کوردی و چاوانیا چارەسەرکرنا وێ ل پەرلەمانێ تورکیا ببیتە مژارەکا سەرەکی و وەسا وەکو پرۆژە بۆ رایا گشتی بهێتە ئاشکرا کرن، چونکی تورکیا یا نەچارە ئێدی پرسا کوردی چارەسەر بکەت، هەتا پرسا کوردی چارەسەر نەبیت قەیرانا ئابووری ل تورکیا ژی بەردەوام بیت و ئەو یەک دێ کاریگەریەکا گەلەک خراب ل ژیانا هەموو وەلاتیێن تورکیا کەت، ژ بەر ڤێ یەکێ ژی دڤێت نها چاوانیا چارەسەرکرنا پرسا کوردی ل تورکیا ببیتە رۆژەڤا حوکمەتێ و هەموو پارتێن سیاسی.
ناڤەندا ڤەکۆلینان یا سیاسی و جڤاکی ئەو یەک ژی دیار کریە، ل باژێرێن مەزن یێن تورکیا ژی رێژەیەکا مەزن ژ پشکداربوویێن راپرسیێ دیار کرینە دڤێت ئێدی پرسا کوردی بهێتە چارەسەرکرن، چونکی ژ بەر کو هەتا نها پرسا کوردی نەهاتیە چارەسەرکرن گەلەک زیان گەهشتیە تورکیا و نها دەم یێ هاتی ئێدی حوکمەت و پارتێن ئۆپۆزسیۆنێ پرۆژێن خوە یێن بۆ چارەسەرکرنا پرسا کوردی بدەنە پەرلەمانێ تورکیا.
هەمان ناڤەندێ ئەو یەک ژی دیار کریە، پرانیا پشکداربوویێن راپرسیێ وەسا دبینن هەکە پرسا کوردی ل تورکیا بهێتە چارەسەرکرن دێ تورکیا بیتە وەلاتێ هەری بهێز و کاریگەر ل رۆژهەلاتا ناڤین، چونکی نها رەوشا ئابووری یا تورکیا گەلەک خرابە و هەتا رەوشا خراب یا ئابووری بەردەوام بیت تورکیا نەشێت ببیتە وەلاتێ هەری بهێز ل دەڤەرێ.
