رۆسیا ب توندی هۆشداریێ ددەتە وەلاتێن ئێکەتیا ئۆرۆپا
پەیڤدارا وەزارەتا دەرڤە یا رۆسیا راگەهاند، بەری نها ئێکەتیا ئۆرۆپا سزا ل سەر گەلەک کۆمپانیێن رۆسیا سەپاندن و پارەکێ گەلەک زێدە یێ رۆسیا ل وەلاتێن ئێکەتیا ئۆرۆپا هاتینە بلۆکە کرن و نها ژی وەلاتێن ئێکەتیا ئۆرۆپا بریارەک داینە و دخوازن وی پارەیی بۆ بەرژەوەندیێن خوە بکار بینن، ئەو یەک ب چو رەنگەکێ ژ ئالیێ رۆسیا ڤە ناهێتە قەبوولکرن و گۆت: (وەکو رۆسیا ئەم ب توندی هۆشداریێ ددەینە وەلاتێن ئێکەتیا ئۆرۆپا کو چو شاشیێن وەسا نەکەن، چونکی ئەو یەک دێ کاریگەریەکا گەلەک خراب ل پەیوەندیێن رۆسیا ل گەل ئێکەتیا ئۆرۆپا کەت و رۆسیا دێ ب توندی بەرسڤا هەر بزاڤەکا وەسا یا مەترسیدار دەت).
ماریا زاخارۆڤا ئەو یەک ژی دیار کر، بەری نها ئێکەتیا ئۆرۆپا سزا ل سەر گەلەک کەرتێن رۆسیا سەپاندینە تایبەتی ژی کەرتێ پەترۆلێ، لێ سزایێن وەلاتێن ئێکەتیا ئۆرۆپا هەتا نها چو کاریگەری نەبووینە و رۆسیا رۆژ ب رۆژێ یا بهێز دکەڤیت، ژ بەر ڤێ یەکێ ژی نابیت وەلاتێن ئێکەتیا ئۆرۆپا هزر د هندەک کارێن شاش دا بکەن، چونکی ئەو یەک دێ ئەنجامێن خوە یێن گەلەک خراب هەبن.
ئەو یەک د دەمەکێ دایە کو بەری دو رۆژان سکرتێرێ گشتی یێ ناتۆ راگەهاند، دڤێت وەلاتێن ئێکەتیا ئۆرۆپا خوە بۆ شەڕێ رۆسیا بەرهەڤ بکەن، چونکی رۆسیا دڤێت پشتی ئۆکرانیایێ ئێرشی هندەک وەلاتێن دی یێن ئەندامێن ناتۆ ب تایبەتی ژی وەلاتێن ئێکەتیا ئۆرۆپا بکەت، ژ بەر ڤێ یەکێ ژی گەلەک یا گرنگە هەموو وەلاتێن ئێکەتیا ئۆرۆپا خوە بۆ شەڕەکێ دژوار ل گەل رۆسیا بەرهەڤ بکەن، چونکی رۆسیا ئارمانجێن گەلەک خراب هەنە و ئەو یەک دێ کاریگەریەکا خراب ل هەموو جیهانێ کەت، لێ وەلاتێن ئێکەتیا ئۆرۆپا دڤێت خوە بۆ هەر پێشهاتەکا مەترسیدار بەرهەڤ بکەن، چونکی سەرکەفتنا رۆسیا ل ئۆکرانیایێ دێ بیتە پالدەرەک مەزن دا رۆسیا ئێرشی هندەک وەلاتێن دی یێن ئەندامێن ناتۆ بکەت، مەترسی ل سەر هندەک وەلاتێن ئێکەتیا ئۆرۆپا هەنە و ژ بەر ڤێ یەکێ ژی گرنگە هەموو وەلاتێن ئێکەتیا ئۆرۆپا خوە بۆ شەڕەکێ دژوار ل گەل رۆسیا بەرهەڤ بکەن.
