نابیت گوهۆرین د یاسایا ڕزگاربوویێن دەستێن تیرۆرستێن داعشێ دا بهێنەكرن
ڕێڤەبەرێ گشتیێ كاروبارێن ئێزدیان دیار كر، هەر دەستكاریەك د یاسا رزگاربوویێن دەستێ داعش دا بهێتە كرن، پێشیلكاریە هەمبەر مافێ كچ و ژنێن ژ دەستێن تیرۆرستێن داعش رزگاربووین و گۆت: ئەڤ یاسایە بەرسڤدانەك بوو بۆ ئەو قوربانیا كچ و ژنێن ئێزدی دایی و ل سەر وی بنەمایی ژی یا هاتیە دارشتن.
سعود مستۆ، ڕێڤەبەرێ گشتیێ كاروبارێن ئێزدیان بۆ رۆژنامەیا ئەڤرۆ راگەهاند، یاسایا ڕزگاربوویان ئەگەر ب ئازایی و وێرەكی و بەرخودان و قوربانیا كچ و ژنێن ئێزدی و پشتەڤانیا مالباتێن وان و جڤاكا ئێزدی و میر و جڤاتا رۆحانی نەبا، ڤێ یاسایێ هەبوون نەدبوو، لەورا وەك جڤاكێ ئێزدی نەرازیبوونا خۆ دیار دكەن بۆ هەر دەستكاریەكا بهێتە كرن د یاسا رزگاربوویێن دەستێ داعش دا. ئەڤ یاسایە بەرسڤدانەك بوو بۆ ئەو قوربانیا كچ و ژنێن ئێزدی دایی و ل سەر وی بنەمایی ژی یا هاتیە دارشتن و ئەو ژینگەهـا ل ئیراقێ چێبوویێ و فشارەكا نێڤدەولەتی ل جڤاتا ئاساییشێ و ب پشتەڤانیا پەرلەمانتارێن كورد ئەڤ یاسایە دەرباز بوو، ژبەر هندێ ژی ئەم دبێژین هەر دەستكاریەك د ڤێ یاسایێ دا بهێتە كرن، ئەڤە پێشیلكاریە بۆ وێ مافێ تایبەتمەند ب تەخەكا گرنگا جڤاكا ئێزدی ڤە و ئەو ژی كچێن ژ دەستێ داعش قورتالبووین و وەك جڤاكا ئێزدی نەرازیبوونا خۆ دیار دكەین.
سعود مستۆ گۆت: یا خویایە پەرلەمانێ ئیراقێ نیازەكا خراب پێ هەیە، ئەگەر نە یاسایا ڕۆن و ئاشكرایە كو ب مێژوویەكا دەستنیشانكری ل ڕێككەفتی 3/8/2014دەست پێ دكەت كو مفاداربن ژ ڤێ یاسایێ و ناڤێن پێكهاتێن دی ژی وەكو توركمان و شەبەك و مەسیحی یێن هاتین، ئەگەر نە وان چ زەرەرێن دی هەنە ژبلی ڤالاكرنا ڤێ یاسایێ ژ ناڤەرۆك و بۆ چاڤكرنێ یا بۆ جڤاك و ژنا ئێزدی دەستنیشانكری”.
ئاشكەرا كر، باوەریا جڤاكێ ئێزدی ب حوكمەتا ئیراقێ و یاسادانەرێن وێ یا لاوازە، ئەڤ یاسایە پێنگاڤەكا گەلەك باشبوو ئەم ل گەل هندێ نە هەر كەسەكێ زەرەرمەند بیت ل سەر دەستێ تیرۆرستێن داعش چ هەر كچ و ژنەك و پێكهاتەكێ عئیراقێ بیت، بگەهیتە مافێ خۆ، ژ بەر هندێ ژی ئەڤ یاسایە یا هاتیە دانان بۆ وێ كۆمكوژیا ب سەرێ ئێزدیان دا هاتی”.
ڕێڤەبەرێ گشتیێ كاروبارێن ئێزدیان زێدەتر گۆت: هەتا نۆكە پەرلەمانێ ئیراقێ وەكو پەرلەمانێن دی ڕوونشتنەك ل سەر كۆمكوژیێ و دانپێدان ژی پێ نەكریە، ژبلی د ڤێ یاسایێ دا د ئێك برگەیێ دا ئاماژێ دكەت كو ئەڤا ب سەرێ ئێزدیان دا هاتی كۆمكوژییە و ئەو خالێن پەرلەمانێ ئیراقێ دڤێت دەستكاریێ تێدا بكەت و د بنەرەت دا ئەڤ یاسایە ژ سێ برگەیان پێك دئێت، ئەو ژی ناڤێ یاسایا ژنا ئێزدی و ژ مێژوویا 10/6/2014 ژێ مفادارن و هەموو زارۆیێن ئێزدی ب شێوەكێ گشتی ب خۆ ڤە دگرت و مخابن ژینگەهەك ل بەغدا یا دروستكری بیێ كو ڕاوێژ و بۆچوونا ئێزدیان و كەسوكارێن قوربانیان وەربگرن كو ڤێ یاسایێ دێ ڕاستڤەكەن”.
رۆهنكر ژی، ب مخابنی ڤە چو دۆسەیێن ئێزدیان د ئەولەویەتێن حكومەتا فیدرال دا نینن و ئاگەهـ ل ڕەوشا ئێزدیان نینە و نیازا وان ئەوە ڤێ یاسایێ بگوهۆرن و چ گرنگیدان بۆ جڤاكا ئێزدی نەكریە.
لژنەیا شەهیدان و قوربانیان و زیندانیێن سیاسی ل پەرلەمانێ عیراقێ پێشنیارەك بۆ سەرۆكاتیا جڤاتێ بلندكریە و داخواز دكەن یاسایا تایبەت ب ڕزگاربوویێن ئێزدی ڤە بێتە هەمواركرن، ڤێ چەندێ ژی ئێزدی دلگران كرینە.
