پشتی هەلبژارتنان قۆناغەکا نوو یا ئاشتیێ ل تورکیا دێ دەستپێ کەت
چاڤدێرێن سیاسی دیار دکەن، نها ب رەنگەکێ نەراستەوەخوە رێککەفتن د ناڤبەرا ئاکپارتیێ و پارتا دەم دا هەیە، پشتی هەلبژارتنێن باژێرڤانیان ژی دێ قۆناغەکا نوو یا ئاشتیێ ل تورکیا دەستپێ کەت، چونکی ئاکپارتیێ دڤێت رێککەفتنا خوە ل گەل پارتا نەژادپەرەستی ب دووماهی بینیت.
بەری چەند رۆژان غالیب ئەنساری ئۆغلۆ ئەندامێ پەرلەمانێ تورکیا سەر ب ئاکپارتیێ دیار کر، پێدڤیا تورکیا ب قۆناغەکا نوو یا ئاشتیێ و چارەسەرکرنا پرسا کوردی هەیە، هەر کەس ژی باش دزانیت نها ل تورکیا ژ بلی ئاکپارتیێ چو هێزەکا دی یا سیاسی نەشێت پرسا کوردی چارەسەر بکەت، ئاکپارتیێ دڤێت دەست ب قۆناغەکا نوو بکەت، پشتی هەلبژارتنێن باژێرڤانیان دێ هندەک گوهۆڕینێن باش ل تورکیا روو دەن.
ل ئالیێ دی لەیلا زانا سیاسەتمەدارا ناڤدار یا باکورێ کوردستانێ ژی دیار کر، هەر کەس باش زانیت رەوش وەسا بەردەوام نابیت، وەلاتیێن تورکیا ب گشتی ژ رەوشا نها رازی نینن، ئەو یەک ژی نیشا ددەت دڤێت کار بۆ دەستپێکرنا قۆناغەکا نوو بهێتە کرن، ئەردۆغان دشێت جارەکا دی دەست ب قۆناغەکا نوو یا ئاشتیێ و چارەسەرکرنا پرسا کوردی ل تورکیا بکەت، ئەردۆغان کەسەک بهێزە و دشێت کارەکێ وەسا مەزن و دیرۆکی بکەت.
ل ئالیێ دی بەری دو رۆژان سەلاحەدین دەمیرتاش هەڤسەرۆکێ بەرێ یێ هەدەپێ کو نها ل زیندانێ دایە ب رێیا پەیامەکێ سەبارەت ب رەوشا نها یا تورکیا دیار کر، ل تورکیا تنێ ئەردۆغان دشێت دەست ب قۆناغەکا نوو بکەت، رەوشا نها یا تورکیا ژی نیشا ددەت ئاکپارتی ژی دڤێت هندەک گوهۆرینان بکەت، ژ بەر ڤێ یەکێ ژی دڤێت ئەم چاڤەرێ بین دا بزانین کا دێ پشتی هەلبژارتنێن باژێرڤانیان ل تورکیا چ روو دەت.
چاڤدێرێن سیاسی ل تورکیا و باکورێ کوردستانێ ژی دیار دکەن، نها تورکیا د رەوشەکا گەلەک خراب دایە، ب تایبەتی ژی رەوشا ئابووری یا تورکیا گەلەک خرابە، ل ئالیێ دی سەرکردێن ئاکپارتیێ ژ بۆ ئەردۆغانی دیار کرینە ئێدی دڤێت رێککەفتنا ل گەل پارتا بزاڤا نەتەوەپەرست ب دووماهی بینن، چونکی پێدڤیا تورکیا ب قۆناغەکا نوو یا ئاشتیێ هەیە و دڤێت شەڕ و توندوتیژی ب دووماهی بهێت، پارتا نەتەوەپەرست تنێ ل سەر بنەمایێ هەبوونا ئالۆزیان دژیت، دڤێت ئاکپارتی خوە ژ پارتا بزاڤا نەتەوەپەرست دوور بکەت.
دەزگەهێن راگەهاندنا تورکیا ژی دیار دکەن، نها ئاکپارتی ب هەموو شیانێن خوە کار بۆ هەلبژارتنێن باژێرڤانیان دکەت، ب تایبەتی ژی ئەردۆغانی دڤێت هەر دو باژێرڤانیێن مەزن یێن تورکیا ئانکۆ ئەنقەرە و ئستەنبولێ ژ دەستێ پارتا کۆماری دەرخینیت، ڤێجارێ شانسێ ئاکپارتیێ گەلەک زێدە یە، چونکی کورد وەکو هەلبژارتنێن بۆری پشتەڤانیێ ل بەربژارێن پارتا کۆماری ناکەن، ئانکۆ ب رەنگەکێ نەراستەوخوە رێککەفتنەک د ناڤبەرا ئاکپارتیێ و پارتا دەم دا هەیە، ئەو یەک ژی نیشا ددەت پشتی هەلبژارتنان دێ هندەک گوهۆڕینێن مەزن ل تورکیا روو دەن.
