نها ژ هەر دەمەکی پتر ئاکپارتیێ پێدڤی ب کوردان هەیە
ئەندامەکێ پەڕلەمانێ تورکیا دیار دکەت، سەرکەفتنا پارتا کۆماری د ڤان هەلبژارتنان دا نیشانا دەستپێکرنا قۆناغەکا نوو یە ل تورکیا، دڤێت ئێدی کار بۆ چارەسەرکرنا پرسا کوردی ل تورکیا بهێتە کرن و نها پتر ژ هەر دەمەکێ ئاکپارتی ژی پێدڤی ب کوردانە.
جەنگیز چاندار ئەندامێ پەرلەمانێ تورکیا دیار کر، هەلبژارتنێن ڤێجارێ ل تورکیا سەلماند کو خەلکێ تورکیا ئێدی ل دژی شەڕی یە، خەلکی ئارامی و ژیانەکا خوەش دڤێت، خەلکی دڤێت قەیرانا ئابووری بهێتە چارەسەرکرن، راستە نها پارتا کۆماری سەرکەفتنەکا مەزن بدەستڤەئینایە، لێ ئەو یەک رامانا هندێ نادەت دێ شێت گەلەک تشتان کەت، پارتا کۆماری دڤێت خوە بۆ چارەسەرکرنا پرسێن تورکیا بەرهەڤ بکەت و گۆت: (بێگومان نها پتر ژ هەر دەمەکێ ئاکپارتییێ پێدڤی ب کوردانە، دەمەکە بەرپرسێن ئاکپارتیێ بەحسێ دستوورەکێ نوو دکەن، ئەو بێی رازیبوونا پارتا دەم و کوردان نەشێن چو گوهۆڕینان د دستووری دا بکەن، ئانکۆ ئەو نها پتر ژ هەر دەمەکێ پێدڤی کوردانە، ژ بەر ڤێ یەکێ ژی دڤێت ئاکپارتی وانەیێن دیرۆکی ژ ڤان هەلبژارتنان وەربگریت، نابیت ئەردۆغان و هەڤالێن وی وەکو تۆلڤەکرن سەرەدەریێ ل گەل کوردان بکەن، ئەوێ یەکێ چو ئەنجام بۆ ئاکپارتیێ و تورکیا ب گشتی نابیت، ژ بەر ڤێ یەکێ ژی دڤێت بەری هەر تشتەکێ ئەردۆغان کار بۆ چارەسەرکرنا پرسا کوردی ل تورکیا بکەت).
سەبارەت ب دستوورەکێ نوو ژی ناڤهاتی راگەهاند، دستوورێ نها یێ تورکیا نەشێت ببیتە بەرسڤ بۆ چارەسەرکرنا پرسێن نها یێن تورکیا، چونکی دستوورێ نها بەرهەمێ کۆدەتایا سالا ١٩٨٠ یە، ژ بەر ڤێ یەکێ ژی پێدڤیا تورکیا ب دستوورەکێ نوو و دیموکراتی هەیە، ژ بۆ دستوورەکێ نوو ژی دڤێت بەری هەر تشتەکێ داخوازیێن کوردان ل تورکیا ل بەرچاڤ بهێنە وەرگرتن، چونکی بێی چارەسەرکرنا پرسا کوردی ئامادەکرنا دستوورەکێ نوو چو رامانا خوە نابیت و گۆت: (ب شەڕی و ئۆپەراسیۆنێن سەربازی چو پرسەک ناهێتە چارەسەرکرن، مخابن پشتی کو ئەنجامێن هەلبژارتنان دیار بووین، سەرۆک کۆمارێ تورکیا دیسان بەحسێ ئۆپەراسیۆنێن سەربازی کر، ئەو یەک ژی نیشا ددەت د بەرنامێ ئاکپارتیێ دا چو تشتەک بۆ چارەسەرکرنا پرسا کوردی نینە، مخابن ئاکپارتی و ئەردۆغان دێ وەسا تورکیا تووشی کارەساتێن گەلەک مەزن کەن).
جەنگیز چاندار ئەو یەک ژی دیار کر، ئەنجامێ هەلبژارتنان ئەو یەک نیشا دا خەلکی شەڕ نەڤێت، بەلکو خەلکی ژیان دڤێت، خەلکی ئاشتی دڤێت، دڤێت ئەردۆغان و هەڤالێن وی خواندنەکا راست بۆ ئەنجامێن هەلبژارتنان بکەن، رژدبوونا ئەردۆغانی ل سەر ئۆپەراسیۆنێن سەربازی چو مفایێن خوە بۆ تورکیا نابیت، بەلکو دی تورکیا تووشی قەیرانێن مەزنتر بیت، چونکی دڤێت کارێ هەری سەرەکی یێ دەستهەلاتێ چارەسەرکرنا پرسا کوردی بیت، چونکی ب چارەسەرکرنا پرسا کوردی دێ قەیرانا ئابووری ژی ل تورکیا هێتە چارەسەرکرن.
