پشتی شکەستنا ئاکپارتیێ ئەردۆغان دێ دەست ب گوهۆڕینێن مەزن کەت
رۆژنامەیەکا تورکیا دیار دکەت، پشتی شکەستنا ئاکپارتیێ د هەلبژارتنێن باژێرڤانیان دا ئەردۆغانی د کۆمبوونا سەرکردایەتیا ئاکپارتیێ دیار کریە، ئەڤ شکەستنە دڤێت ببیتە دەستپێکا قۆناغەکا نوو و دڤێت هەم د ئاستێ ئاکپارتیێ و هەم ژی د ناڤ کابینەیا حوکمەتێ دا گوهۆڕینێن مەزن بهێنە کرن.
ئەندامەکێ سەرکردایەتیا ئاکپارتیێ کو نەخواستیە ناڤێ وی بهێتە ئاشکرا کرن، بۆ رۆژناما پۆلیتیک یۆل یا تورکیا دیار کریە، رۆژا ٢ ڤێ مەهێ کۆمبوونا سەرکردایەتیا ئاکپارتیێ ب سەرۆکاتیا ئەردۆغانی هاتیە کرن و د کۆمبوونێ دا ئەردۆغانی دیار کریە، ئەڤە شکەستنەکا گەلەک مەزنە بۆ ئاکپارتیێ و ئێدی ئەو پارتا ئێکێ نینن ل تورکیا، ئەو یەک ژی نیشا ددەت کو قۆناغەکا نوو ل تورکیا دەسپێکریە و دڤێت ئەو ژی دەست ب گوهۆڕینێن مەزن بکەن، دێ هەم د ناڤ ئاکپارتیێ دا گوهۆڕین بهێنە کرن و هەم ژی د کابینا حوکمەتێ دا.
هەمان بەرپرسی ئەو یەک ژی دیار کریە، هندەک ژ ئەندامێن سەرکردایەتیێ یێ ئاکپارتیێ د کارێ خوە دا خەمسار بووینە و کەسێن هەژی بۆ هەلبژارتنێن باژێرڤانیان بەربژار نەکرینە، ئەو یەک ژی بوویە جهێ دلگرانیا ئەردۆغانی، ژ بەر ڤێ یەکێ ژی ئەردۆغان دێ د پێنگاڤا ئێکێ دا هندەک ژ سەرکردێن ئاکپارتیێ ژ کارێ وان دوور ئێخیت و د پێنگاڤا دویێ دا ژی دێ گوهۆڕینان د کابینا حوکمەتێ دا کەت، چونکی ئەردۆغانی د کۆمبوونێ دا دیار کریە، ئێک ژ ئەگەرێن سەرەکی یێ شکەستنا وان وەکو ئاکپارتی قەیرانا ئابووری یە و دڤێت بلەز کار بۆ چارەسەرکرنا قەیرانا ئابووری ل تورکیا بهێتە کرن.
هەمان بەرپرسێ ئاکپارتیێ دیار کریە دێ گوهۆڕینێن گەلەک مەزن هێنە کرن، دێ کاریگەریا خوە ل تورکیا کەت، لێ جارێ دیار نینە کا دێ ئەردۆغان دەست ژ سەرۆکاتیا ئاکپارتیێ بەردەت یان نە، چونکی هندەک ژ ئەندامێن سەرکردایەتیا ئاکپارتیێ دیار کرینە، ژ بەر ئەرکێ خوە وەکو سەرۆک کۆمار ئەردۆغان نەشێت وەکو پێدڤی ئاکپارتیێ برێڤە ببەت و دڤێت گوهۆڕین د ئاستێ بلند دا بهێنە کرن، لێ هەتا نها ژی دیار نینە کا دێ ئەردۆغان دەست ژ سەرۆکاتیا ئاکپارتیێ بەردەت یان نە.
چاڤدێرێن سیاسی ژی ل تورکیا دیار دکەن، ئاکپارتی تووشی شکەستنەکا گەلەک مەزن هاتیە، نها مەترسیەکا دی یا مەزن ژی بۆ ئاکپارتیێ دروست بوویە، چونکی سەرکەفتنا پارتا رەفاه بوویە مەترسی بۆ ئاکپارتیێ، گەلەک ژ ئەندام و رێڤەبەریێن ئاکپارتیێ دخوازن بچنە ناڤ رێزێن پارتا رەفاه و ئەو یەک ژی مەترسیەکا گەلەک مەزنە بۆ ئاکپارتیێ، هەکە ئەردۆغان گوهۆڕینێن مەزن و پێدڤی نەکەت دێ پارچەبوون د ناڤ ئاکپارتیێ دا دروست بیت و ئەو یەک دێ بیتە ئەگەرێ قەیرانەکا نوو بۆ ئاکپارتیێ، چونکی گەلەک ژ ئەندامێن ئاکپارتیێ وەسا دبینن د ئاستێ بلندا گەندەلیەکا مەزن یا هەی و جەماوەرێ ئاکپارتیێ ژ سیاسەتا نها یا ئەردۆغانی و هەڤالێن وی رازی نینن.
