ل رۆژئاڤایێ کوردستانێ ئێرشی بنگەهەکێ سەربازی یێ ئەمریکا هاتە کرن
بەری دو شەڤان گرۆپێن چەکدارێن سەر ب ئیرانێ ڤە ئێرشی بنگەهێ سەربازی یێ ئەمریکا ل رۆژئاڤایێ کوردستانێ کرن، فەرماندارەکێ ئەمریکا ژی دیار کر وان ب توندی بەرسڤا ئێرشێ داینە و هۆشداریێ ژی ددەینە گرۆپێن چەکدار هەکە جارەکا دی ئێرشی هێزێن ئەمریکا بکەن دێ بەرسڤا ئەمریکا گەلەک یا دوژار بیت.
ژێدەرێن میدیایی ل رۆژئاڤایێ کوردستانێ دیار دکەن، بەری دو شەڤان گرۆپێن چەکدارێن سەر ب ئیرانێ ڤە ژ ئاخا ئیراقێ ب مۆشەکان ئێرشی بنگەهەکێ سەربازی یێ ئەمریکا ل رۆژئاڤایێ کوردستانێ کرینە و پشتی ئێرشی ژی فرۆکێن شەری یێن ئەمریکا ئێرشی بنگەهەکێ گرۆپێن چەکدار کرینە و فەرماندارەکێ ئەمریکا ل رۆژئاڤایێ کوردستانێ ژی دیار کریە، وان ب توندی بەرسڤا ئێرشا وێ گرۆپێ داینە و هەکە جارەکا دی ژ ئاخا ئیراقێ ئێرشی بنگەهێن سەربازی یێن ئەمریکا ل سووریێ بهێتە کرن، دێ ئەمریکا گەلەک ب دژواری بەرسڤا هەر ئێرشەکێ دەت.
ل ئالیێ دی فەرماندارەکێ هێزێن سووریا دیموکرات ژی دیار کر، بەری نها ژی ئێرشی بنگەهێن سەربازی یێن ئەمریکا ل رۆژئاڤایێ کوردستانێ هاتینە کرن، لێ ڤێجارێ ژ پارێزگەها نەینەوا گرۆپێن سەر ب ئیرانێ ڤە ب مۆشەکان ئێرشی بنگەهەکێ سەربازی یێ ئەمریکا ل باژیرێ رمیلان یێ رۆژئاڤایێ کوردستانێ کرینە، زیان گەهشتینە بنگەهێ سەربازی یێ ئەمریکا، پشتی ئێرشا مۆشەکی ژی فرۆکێن شەری یێن ئەمریکا ئەو جهێ مۆشەک ژێ هاتین بۆمبەباران کرینە و زیانێن مەزن گەهشتینە گرۆپێن چەکدار یێن سەر ب ئیرانێ ڤە.
ئەو یەک د دەمەکێ دایە کو حەفتیا بۆری بەرپرسەکێ وەزارەتا بەرگریێ یا ئەمریکا دیار کر، ئیرانێ دڤێت ب رێیا گرۆپێن چەکدار ئاریشان بۆ هێزێن ئەمریکا ل سووریێ دروست بکەت، ئیران و رۆسیا دەمەکە کار دکەن دا ئەمریکا نەچار بیت هەموو هێزێن خوە ژ رۆژئاڤایێ کوردستانێ ڤەکێشیت، لێ هەتا مەترسیا تیرۆرێ ل سەر ئەمریکا ل سووریێ هەبیت، دێ هێزێن ئەمریکا ل سووریێ مینن و هەر بزاڤەکا ئیرانێ و گرۆپێن سەر ب وێ ژی ڤە دێ بێی ئەنجام بن، چونکی ئەمریکا یا بەرهەڤە ب هەموو شیانێن خوە بەرەڤانیێ ل بەرژەوەندیێن خوە ل سووریێ بکەت، د رەوشا نها دا ئەمریکا سووریێ بۆ چو هێزەکا دی چۆل ناکەت.
چاڤدێرێن سیاسی ژی دیار دکەن، نها سووریێ بوویە مەیدانا شەڕێ ئەمریکا ل گەل ئیرانێ و رۆسیا، ئیران نها ب رێیا گرۆپێن چەکدار دڤێت ئاریشان بۆ ئەمریکا دروست بکەت، ئیرانێ بەری نها هەمان کار ل دژی ئەمریکا ل ئیراقێ ژی کرینە، لێ ئەمریکا نەڤێت ب چو رەنگەکێ هێزێن خوە ژ سووریێ ڤەکێشیت، چونکی ئەمریکی باش دزانن د رەوشا نها دا هەبوونا ئەمریکا ل سووریێ گەلەک یا گرنگە، هەکە ئەمریکا هێزێن خوە ژ سووریێ ڤەکێشیت دێ رەوش گەلەک یا ئالۆز بیت، رۆسیا، ئیران و ل ئالیێ دی ژی تورکیا دێ دەست ب هندەک پێنگاڤێن نوو ل سووریێ ب تایبەتی ژی ل باکورێ سووریێ و رۆژئاڤایێ کوردستانێ کەن کو ئەو یەک دێ کاریگەریەکا خوە یا گەلەک خراب بۆ هەڤپەیمانێن ئەمریکا ل سووریێ هەبیت، ژ بەر ڤێ یەکێ ژی هەتا نها ئەمریکا چو پرۆژە بۆ ڤێ یەکێ نینن هێزێن خوە ژ سووریێ ڤەکێشیت.
ئەو یەک د دەمەکێ دایە بەری چەند رۆژان بەرپرسەکێ رێڤەبەریا خوەسەر یا رۆژئاڤایێ کوردستانێ ژی دیار کربوو، پشتی ئێرشا ڤێ دووماهیێ ل رۆسیا، شاندەکێ رۆسیا سەرەدانا رۆژئاڤایێ کوردستانێ و سووریێ کرینە، ل گەل بەرپرسێن رێڤەبەریا خوەسەر و فەرماندارێ گشتی یێ هێزێن سووریا دیموکرات کۆمبووینە و هەروەسا شاندێ رۆسیا ل شامێ ژی ل گەل بەشار ئەسەدی کۆمبووینە و داخواز ژێ کرینە ب رێیا دانوستاندنێن پرسێن هەی ل گەل رێڤەبەریا خوەسەر چارەسەر بکەن.
ل ئالیێ دی بەری دو رۆژان بەشار ئەسەدێ سەرۆکێ رژێما سووریێ ژی بۆ دەزگەهێن راگەهاندنا وەلاتێ خوە دیار کر، هەتا نها سێ جاران ئەو ل گەل بەرپرسێن ئەمریکا کۆمبووینە، لێ کۆمبوونێن وان ل بەرپرسێن ئەمریکا بێی ئەنجام بووینە، چونکی ئەمریکا پشکەک ژ ئاخا سووریێ یا داگیر کری و د رەوشا نها دا ژی ئەمریکا یا بەرهەڤ نینە هێزێن خوە ژ ئاخا سووریێ ڤەکێشیت، ئەمریکا داگیرکەرە و دڤێت ژ سووریێ دەرکەڤیت، هەبوونا ئەمریکا ل سووریێ بوویە ئەگەرێ گەلەک ئاریشان و وەکو سووریێ وان داخواز ژ ئەمریکا کرینە هەموو هێزێن خوە ڤەکێشیت.
سەرۆکێ رژێما سووریێ ئەو یەک ژی دیار کریە، ئەمریکی هەردەم بەحسێ هەبوونا داعشێ و گرۆپێن دی یێن تیرۆرستی ل سووریێ دکەن و دبێژن ئەو ژ بۆ شەرێ ل دژی داعشێ ل سووریێ ماینە، لێ د هەمان دەمی دا ئەمریکا نەڤێت داعش و گرۆپێن دی یێن تیرۆرستی ژناڤ بچن، چونکی هەبوونا وان گرۆپان د رەوشا نها دا د بەرژەوەندیا ئەمریکا دایە و ئەمریکا ئەو گرۆپە کرینە بەهانە و وەسا نەڤێت ژ سووریێ دەرکەڤیت.
