فرەنسا: رێ نادەین لوبنان ببیتە ناڤەندا شەڕەکێ نوو
ئیمانوێل ماکرۆن سەرۆکێ فرەنسا راگەهاند، حزبوللا لوبنانێ هەست ب بەرپرسیاریا خوە ل هەمبەر خەلکێ لوبنان ناکەت و ئالۆزیێن ڤێ دووماهیێ د ناڤبەرا حزبوللاهێ و ئسرائیلێ دا ژی مەترسیەکا خوە یا مەزن بۆ پاشەرۆژا لوبنانێ یا هەی، دیارە بۆ حزبوللا لوبنانێ گەلەک یا ئاسایی یە کو لوبنانێ بکەتە مەیدانا شەڕەکێ نوو، لێ وەکو فرەنسا ئەو ب چو رەنگەکێ رێ نادەن تشتەک وەسا روو بدەت و دێ دەست ب بزاڤەکا مەزن کەن دا لوبنان نەبیتە ناڤەندا شەڕەکێ نوو.
ل ئالیێ دی وەزیرێ دەرڤە یێ فرەنسا ژی گەهشتە لوبنانێ و ل گەل بەرپرسێن وی وەلاتی کۆمبوو و راگەهاند، وەکو فرەنسا وان دەست ب بزاڤەکا مەزن کرینە دا چو شەڕ د ناڤبەرا ئسرائیلێ و حزبوللا لوبنانێ دا روو نەدەن، چونکی ئەو یەک دێ زیانەکا خوە یا گەلەک مەزن بۆ لوبنانێ هەبیت، لوبنان د رەوشەکا خراب دایە و دڤێت هەموو ئالی کار بکەن دا چو شەڕ روو نەدەن.
