ل تورکیا قۆناغەکا نوو یا سیاسی دەستپێکریە
سەرۆک کۆمارێ تورکیا پشتی هەڤدیتنا ل گەل سەرۆکێ پارتا کۆماری راگەهاند، قۆناغەکا نوو یا سیاسی ل تورکیا دەستپێکریە، وەکو تورکیا وان دڤێت هەلوەستێ توند د مەیدانا سیاسی دا نەمینن و هەموو ئالی کار بۆ چاەرسەریا پرسێن هەی بکەن.
رەجەب تەیب ئەردۆغانێ سەرۆک کۆمارێ تورکیا، پشتی هەڤدیتنا ل گەل ئۆزگور ئۆزەل سەرۆکێ پارتا کۆماری راگەهاند، نها پتر ژ هەر دەمەکێ پێدڤیا تورکیا ب سەقایەکێ نوو و نەرم یێ سیاسی هەیە، چونکی گەلەک پرس هەنە دڤێت بهێنە چارەسەرکرن، هەڤدیتنا ل گەل سەرۆکێ پارتا کۆماری ژی هەر ژ بۆ ڤێ مەبەستێ بوو، مە دڤێت هەلوەستێن توند یێن سیاسی نەمینن، بەلکو نها پێدڤیا مە وەکو تورکیا ب هەلوەستێن نەرم یێن سیاسی هەنە، دڤێت دەست ب قۆناغەکا نوو بکەین، ژ بۆ ڤێ یەکێ ژی دێ کار کەین و هێڤیدارین هەم پارتا کۆماری و هەم ژی ئالیێن دی یێن سیاسی ل گۆر بەرژەوەندیێن تورکیا کار بکەن.
سەرۆک کۆمارێ تورکیا ئەو یەک ژی راگەهاند، نها پێدڤیا تورکیا ب دستوورەکێ نوو هەیە، سەرۆکێ پەرلەمانی ژی دێ سەرەدانا فراکسیۆنێن ناڤ پەرلەمانی کەت، ئەم ژی دێ ل گەل هێزێن سیاسی ل تورکیا دانوستاندنان کەین، هێڤیدارین هەموو ئالی پشتەڤانیێ ل دستوورەکێ نوو بکەن کو ببیتە ژێدەرێ چارەسەریا گەلەک پرسێن نها یێن وەلاتی.
ل ئالیێ دی دوهی هەڤسەرۆکێن پارتا دەم سەرەدانا سەرۆکێ گشتی یێ پارتا کۆماری کرن و د پرێس کۆنفرانسەکێ دا سەرۆکێ گشتی یێ پارتا کۆماری راگەهاند، دڤێت باوەری د ناڤبەرا هێزێن سیاسی ل تورکیا دا بهێتە دروست کرن، چونکی د چەند سالێن بۆری دا گەلەک ئالۆزی دروست بووینە، لێ نها رەوشەکا نوو هاتیە پێش، دڤێت ئەم کار بکەین دا تورکیا ژ ڤێ قەیرانێ قورتال بکەین، چونکی ژیانا پرانیا وەلاتیان ل تورکیا خرابە، وەلاتی گازندان دکەن، دڤێت رەوشا ژیانا خەلکێ خوە باش بکەین، ئەو یەک ژی ئەرکێ حوکمەتێ یە و دڤێت ئەم وەکو هێزێن سیاسی ژی پشتەڤانیێ ل پرۆژەیێن حوکمەتێ بۆ چارەسەریێ بکەین.
تونجەر باکرخان هەڤسەرۆکێ پارتا دەم ژی راگەهاند، دەستهەلاتا تورکیا د دەمێن بۆری دا گەلەک شاشی کرینە، نها باوەری د ناڤبەرا دەستهەلاتێ و هێزێن دی دا نەمایە، دڤێت وەکو هێزێن ئۆپۆزسیۆنێ ئەم بەرەیەکێ بهێز ل دژی حوکمەتێ ئاڤا بکەین، نابیت ئەم ل هەمبەر کریارێن نەقانوونی یێن دەستهەلاتێ بێدەنگ بین، ئەو یەک دێ زیانەکا خوە یا گەلەک مەزن بۆ تورکیا هەبیت، دڤێت دستوورێ نوو ژی دستوورەکێ دیموکراتی بیت، دڤێت دستوورەک بیت کو ببیتە ژێدەرێ چارەسەریێ بۆ هەموو پرسێن تورکیا، چونکی دستوورێ نها بخوە بوویە ئاستەنگ ل هەمبەر چارەسەرکرنا گەلەک پرسێن هەی، ژ بۆ دستوورەکێ نوو ژی دڤێت باوەری د ناڤبەرا هەموو ئالیان دا هەبیت، لێ نها تشتەک وەسا نینە.
