ژ رۆژانێن من
باڤێ نازێ
37
ـ قه‌هره‌مانا من دبێژه:” هه‌موو ژیانا خوه, ئه‌ز ل هێڤیا گۆتنه‌كێ یان ژی دیاریه‌كێ بووم كو بهشتا ئه‌ز ژ به‌ر
دلپاكیێ بگریم, هیسرێن وه‌ها جاره‌كێ ژ چاڤێن من هاتن خوارێ و جارا پێشین بوو كو من هه‌ست پێ كر ئه‌و هێسر ژ دلێ من دبارن نه كو ژ چاڤێن من.
ئه‌ز ژی وه‌كو قه‌هره‌مانا خوه ل هێڤیا خه‌لاته‌كێ ژ بۆ به‌رهه‌مێن من, لێ مخابن نۆكا ئه‌و هێڤی بوویه خه‌ونه‌ك و ب هشیاربوونێ نایێ دیتن.
ـ د ژیانا من ده, سێ ته‌وه‌رێن خوه گوهه‌رتنێ كه‌تن پێشیا من: یه‌ك ژی ئایینی بوو. ئه‌و ژی ژ زارۆكتیا من هه‌تا بگهێ سنێلتیا من, شۆپا ڤێ ته‌وه‌رێ من ژ بنه‌مالا خوه وه‌رگرتبوو. ژبه‌ر باڤ و كالكێن من كو هه‌موو مه‌لالی بوون, ب ڤێ ژی ئایینی گرتبوو سه‌ر بنه‌مالا مه.
ته‌وه‌رێ دویه‌م ئیدیۆلۆژیا كۆمینیزمێ بوو. ئه‌ڤێ ژ خۆرتانیا من ده‌ست پێ كر و هه‌تا سیه سالیا من درێژكر.
من دا سه‌ر ڤێ شۆپێ ژ به‌ر كو دورووشما سه‌ره‌كه یا ڤێ ئیدیۆلۆژیێ وه‌كهه‌ڤی بوو.
ژ خوه هین د قۆناغا خوه ده یا پێشین ژ باڤێ خوه وه‌كو مه‌لا دپرسی: ” ژ بۆ چ هنده‌ك كه‌س فه‌قیرن و هنده‌ك
دده‌وله‌مه‌ندن؟” ئه‌وی گۆت:” هه‌ر تشت د ده‌ستێ خوه‌دا ده یه, و ل ئاخره‌تێ چیێ فه‌قیرا بهشته”.ته‌وه‌رێ سیه‌م, كو د ژیانا خوه ده, من دا سه‌ر ریا هه‌ستا نه‌ته‌وی و وه‌لاتپارێزی بوو, ژ سیه سالیا خوه من ده‌ست پێ كر.
و هه‌ر ده‌م ئه‌ڤ پرس ب من ره چێ دبوو:” ئه‌ڤه بۆچ مه كوردان مافێن خوه ونداكری و و چ تێته خوه‌ستن ئه‌م ل
خوه ڤه‌گه‌رینن؟ گه‌له‌ك شۆپ دچوون سه‌ر ڤێ رێبازێ و ئه‌ز دبێژم هه‌تا نوها وه‌كو تێته خوه‌ستن من گاڤێن خوه ل سه‌ر ڤێ ریێ نه‌ئاڤێتینه. ژ به‌ر ڤێ چه‌ندێ هین ئه‌ز دخاچه‌رێكه‌كێ ده مه كه ئه‌و ژی نڤیسه‌ریه, و ئه‌و ژی خه‌باتا ل سه‌ر مه‌رۆڤاتیێ یه و ئه‌ڤ ژی پسپۆریا هه‌ری دژواره. ئایا ئه‌ز دشێم ب ڤێ دلێمێ رابم؟
مخابن به‌رسیڤ ل جه‌م من نینه.
ـ ئه‌ز دبێژم بێ ده‌نگی ب هزرا خوه, ژ یا ئاخڤتنێ كوورتره. ژ به‌ر كو دگه‌نگه‌شێ ده, پرێ جاران راستی وندا دبه, لۆما ژی راستی ب مه‌رۆڤێ بێ ده‌نگ ره دمینه, ب هه‌ستێ ژی ژ گری و قێرینێ ب ئێشتره, و ئه‌و بێ ده‌نگیا ڤان خسله‌تان دستینه, گه‌ره‌ك ل گۆرا ده‌می بت.
ـ هه‌زركرنا ژ دل نه پیڤانێن خوه هه‌نه و نه ژی سینۆر. ئه‌ڤه كی دكاره ڤێ ئه‌ڤینێ ڤه‌شێره. ئه‌رێ ئه‌ڤ نایێڤه‌شارتن, لێ هه‌ر سه‌رمۆكی یه, و هه‌موو ته‌مه‌نان دده به‌ر خوه, ب ڤێ ژی ره‌سه‌نیا خوه دستینه. و نه ب ده‌ره‌وا تێته گۆتن ئه‌ڤینا ژ دل. به‌ختیاری بخوه یه. مانه ئه‌ڤین به‌خچێ ژیانێ یه و پێدڤیه ته‌نێ كولیلك تێده شین ببن.
ـ ده‌ما ئازادیا من باسكۆكی دبه, هزرا من شه‌ڤره‌شه‌كی دبه و ئه‌ز د چوونا خوه ده دته‌رپه‌لم.
