ئه‌مریکا و ئیران چەندین جاران ب نهێنی کۆمبووینە
ب، سه‌رجان مەحمود:
بەرپرسەکێ وەزارەتا دەرڤە یا ئیرانێ بۆ ئاژانسا ئیرنا یا وی وەلاتی دیار کریە پشتی ئێرشا ئیرانێ بۆ سه‌ر ئسرائیلێ و به‌رسڤا ئسرائیلێ بۆ ئیرانێ، شانده‌کێ ئه‌مریکا ب سه‌رۆکاتیا برێت ماکگورک، ل وەلاتێ عومان ل گەل شانده‌کێ وه‌زاره‌تا ده‌رڤه و به‌رپرسێن ئێمناهی یێن ئیرانێ کۆمبووینە و د کۆمبونێ دا بەحسێ ئالۆزیێن د ناڤبه‌را ئسرائیلێ و ئیرانێ و پرسا بەرنامێ ئەتۆمی یێ ئیرانێ دا کرینە.
هەمان ئاژانسێ ئەو یەک ژی دیار کریە، د کۆمبوونێ دا شاندێ ئەمریکا دیار کریە دڤێت ئیران بەرنامێ خوە یێ ئەتۆمی بدەتە راگرتن، ب چو رەنگەکێ کار بۆ دروستکرنا چەکێ ئەتۆمی نەکەت و هاریکاریا حوسیێن یەمەنێ و گرۆپێن دی یێن چەکدار ژی نەکەت، هەکە ئیران ل سەر هەلوەستێ خوە بەردەوام بیت ئەمریکا دێ ب توندی ئیرانێ سزا دەت.
شاندێ ئیرانێ ژی دیار کریە، دڤێت ئەمریکا سزایێن ل سەر ئیرانێ راکەت و هەروەسا ژ بۆ راگرتنا شەرێ ل غەزە ژی فشارێن خوە ل سەر ئیسرائیلێ زێدەتر لێ بکەت، چونکی نها ل غەزە کارەساتێن مەزن روو ددەن و دڤێت ئەمریکا بێدەنگ نەمینیت.
