مرنا سەرۆک کۆمارێ ئیرانێ نابیتە ئەگەرێ چو گوهۆڕینێن مەزن ل وی وەلاتی
چاڤدێرێن سیاسی دیار دکەن، مرنا سەرۆک کۆمارێ ئیرانێ و هەڤالێن وی چو کاریگەریەکا وەسا ل سەر سیاسەتا دەرڤە و ناڤخوەیی یا ئیرانێ نابیت، چونکی رێبەرێ شورەشا ئیسلامی یا ئیرانێ دەستهەلاتدارێ ئێکێ یە و چو گوهۆڕینەک بێی رازیبوونا وی ل ئیرانێ روو نادەت.
د. قادر رەحیمی مامۆستایێ زانکۆیێ و چاڤدێرێ سیاسی راگەهاند، ئیبراهیم رەئیسی وەکو سەرۆک کۆمار دەستهەلاتدارێ ئێکێ ل ئیرانێ نەبوو، بەلکو دەستهەلاتدارێ ئێکێ ل ئیرانێ عەلی خامنەیی رێبەرێ شورەشا ئیسلامی یا ئیرانێ یە، چو تشتەک بێی رازیبوونا وی ناهێتە کرن، ب تایبەتی ژی د سیاسەتا دەرڤە دا، ئانکۆ مرۆڤ دشێت بێژیت ئیبراهیم رەئیسی هەر چ کارەک ئەنجام دابیت بێی رازیبوونا خامنەیی نەبوویە و گۆت: (هەرچەندە مرنا ئیبراهیم رەئیسی و هەڤالێن وی دێ کاریگەریا خوە ل سەر ئیرانێ هەبیت لێ ئەو کاریگەریە دێ یا سنۆردار بیت، چونکی رێبەرێ شورەشا ئیسلامی یا ئیرانێ دێ هەر دیسان سیاسەتا ئیرانێ وەکو بەرێ بەردەوام کەت و ناهێلیت چو ڤالاهیەک دروست ببیت).
سەبارەت ب هندێ کا پشتی مرنا رەئیسی دێ کێ بیتە سەرۆک کۆمارێ ئیرانێ ژی ناڤهاتی دیار کر، ل گۆر قانوونا بنگەهین یا ئیرانێ جێگرێ وی دێ بەروەخت وەکو سەرۆک کۆمار دەست بکار بیت، لێ دڤێت بۆ دەمێ ٥٠ رۆژان هەلبژارتنێن بەروەخت یێن سەرۆک کۆماریێ ل ئیرانێ بهێنە کرن و سەرۆک کۆمار بهێتە هەلبژارتن، چونکی ل گۆر قانوونا ئیرانێ سەرۆک کۆمار ژ ئالیێ خەلکی ڤە هاتیە هەلبژارتن و دڤێت هەر دیسان خەلک سەرۆک کۆمارەکێ هەلبژێریت و ژ بەر ڤێ یەکێ ژی هەتا ٥٠ رۆژێن دی جێگرێ وی محەمەد موخبیر دێ وەکو سەرۆک کۆمارێ بەروەخت کارێ دەولەتێ برێڤە بەت.
رەحمان محەمەدی چاڤدێرێ سیاسی ژی دیار کر، سەرۆک کۆمار ل ئیرانێ دەستهەلاتا وی یا سنۆردارە، چونکی رێبەرێ شورەشا ئیسلامی یا ئیرانێ رێ نادەت سەرۆک کۆمار هەر تشتێ خواست بکەت، ب تایبەتی ژی د سیاسەتا دەرڤە دا سەرۆک کۆمار بێی رازیبوونا رێبەرێ شورەشا ئیسلامی یا ئیرانێ نەشێت چو بریارێن چارەنڤیسساز بدەت، ژ بەر ڤێ یەکێ ژی مرنا رەئیسی کاریگەریەکا وەسا مەزن ل سەر سیاسەتا دەرڤە و ناڤخوە یا ئیرانێ ناکەت، چونکی رێبەرێ شورەشا ئیسلامی یا ئیرانێ هەر زوو د داخۆیانیەکێ دا دیار کر چو ڤالاهی د برێڤەبرنا وەلاتی دا دروست نابن و دێ کاروبارێن دەولەتێ ب رەنگەکێ باش هێنە برێڤەبرن و گۆت: (ئەو یەک ژی نیشا ددەت بەرهەڤی بۆ قۆناغا پشتی مرنا رەئیسی ل ئیرانێ هاتینە کرن، ژ بەر ڤێ یەکێ ژی ب مرنا سەرۆک کۆمارێ ئیرانێ ئەز چاڤەرێ ناکەم چو گوهۆڕینێن مەزن ل ئیرانێ روو بدەن).
ل ئالیێ دی گەلەک ژ چاڤدێرێن سیاسی یێن ئیرانێ ژی دیار دکەن، ژ بەر کو رێبەرێ ئیرانێ دەستهەلاتدارێ ئێکێ یە و سیاسەتا وی وەلاتی ژ ئالیێ خامنەیی ڤە دهێتە دیار کرن، مرنا سەرۆک کۆمارێ چو کاریگەریەکا مەزن ل سەر پاشەرۆژا ئیرانێ نابیت، چونکی ب سالانە سیاسەتا دەرڤە و ناڤخوە یا ئیرانێ ژ ئالیێ رێبەرێ شورەشا ئیسلامی یا ئیرانێ ڤە دهێتە دیارکرن و سەرۆک کۆمار تنێ وەکو رێڤەبەرەکێ کار دکەت و نەشێت ب سەرێ خوە چو بریارێن گرنگ بدەت، ژ بەر ڤێ یەکێ ژی ب مرنا رەئیسی چو گوهۆڕینێن مەزن ل ئیرانێ روو نادەن.
