ڕێبەرێ شۆرەشا ئیسلامی یا ئیرانێ ناهێلیت چو ناکۆکییێن مەزن دروست ببن
دەزگەهێن راگەهاندنا جیهانی بەحسێ کاریگەریا مرنا سەرۆک کۆمارێ ئیرانێ ل سەر سیاسەتا وی وەلاتی دکەن و دیار دکەن عەلی خامنەیی کەسەک بهێزە و پڕانیا چەمکێن دەستهەلاتێ د دەستێ وی دانە و رێ نادەت چو ناکۆکیێن مەزن ل ئیرانێ دروست ببن.
رۆژناما واشنتۆن پۆست د راپۆرتەکێ دا دیار کریە، مرنا ئیبراهیم رەئیسی و هەڤالێن وی کاریگەریەکا وەسا مەزن ل سەر ئیرانێ ناکەت، چونکی رێبەرێ شورەشا ئیسلامی یا ئیرانێ هەر زوو بریار دا کەسەک ل جهێ رەئیسی دەست ب کارێ خوە بکەت و دێ مەها شەش ژی هەلبژارتن هێنە کرن و سەرۆک کۆمارەک نوو دێ هێتە هەلبژارتن، ئانکۆ رێبەرێ شورەشا ئیسلامی یا ئیرانێ رێ نادەت چو ناکۆکیێن وەسا مەزن ل ئیرانێ دروست ببن کو کاریگەریا خوە ل سەر رەوشا ناڤخوەیی یا وی وەلاتی بکەت.
BBC ژی د راپۆرتەکێ دا ئاماژە ب ڤێ یەکێ کریە، هەموو چەمکێن دەستهەلاتێ ل ئیرانێ د دەستێ عەلی خامنەیی دانە و سەرۆک کۆمار ژی فەرمانێن وی بجهـ دئینین، ئانکۆ ل ئیرانێ سەرۆک کۆمار دەستهەلاتدارێ ئێکێ نینە و ب تایبەتی ژی سیاسەتا دەرڤە ژ ئالیێ رێبەرێ شورەشا ئیسلامی یا ئیرانێ ڤە دهێتە دانان و سەرۆک کۆمارێن بەری رەئیسی ژی نەشیاینە بێی رازیبوونا رێبەرێ شورەشا ئیسلامی یا ئیرانێ چو گوهۆڕینەکێ بکەن، ژ بەر ڤێ یەکێ ژی مرنا رەئیسی چو کاریگەریەکا وەسا مەزن ل سەر سیاسەتا دەرڤە یا ئیرانێ نابیت، لێ دبیت ببیتە ئەگەرێ هندەک ناکۆکیێن ناڤخوەیی ل ئیرانێ، چونکی هندەک کەس هەنە دخوازن ب جهێ رەئیسی ببنە سەرۆک کۆمار و رەنگە رێبەرێ شورەشا ئیسلامی یا ئیرانێ پشتەڤانیێ ل وان کەسان نەکەت.
ئاژانسا دویچە یا ئەلمانی ژی دیار کریە، ب مرنا رەئیسی سیاسەتا ئیرانێ ل رۆژهەلاتا ناڤین و جیهانێ ناهێتە گوهۆڕین، چونکی ل وەلاتێن وەکو ئیراقێ، سووریێ، یەمەنێ و لوبنانێ کو کاریگەریا ئیرانێ ل سەر وان وەلاتان گەلەک هەیە، سیاسەتا ئیرانێ ناهێتە گوهۆڕین، چونکی سەرۆک کۆماری چو رۆلەک د دیارکرنا سیاسەتا ئیرانێ ل وان وەلاتان دا نەبوویە، بەلکو سیاسەتا ئیرانێ ل رۆژهەلاتا ناڤین ژ ئالیێ رێبەرێ شورەشا ئیسلامی یا ئیرانێ ڤە دهێتە دیارکرن و کەسێن سەربازی ل وان وەلاتان سیاسەتا ئیرانێ برێڤە دبەن، ژ بەر ڤێ یەکێ ژی مرنا رەئیسی چو کاریگەریا خوە ل سەر سیاسەتا دەرڤە یا ئیرانێ دا نابیت.
ل ئالیێ دی گەلەک ژ دەزگەهێن راگەهاندنا عەرەبی، تورکی و وەلاتێن دی یێن جیهانێ بەحسێ مرنا رەئیسی و کاریگەریا وی ل سەر دەڤەرێ کرینە و ئاماژە ب ڤێ یەکێ کرینە ژ بەر کو ل سیستەمێ ئیرانێ سەرۆک کۆمار دەستهەلاتدارێ ئێکێ نینە، ب مرنا سەرۆک کۆماری چو ئاریشێن وەسا مەزن روو نادەن، چونکی رێبەرێ شورەشا ئیسلامی دشێت د دەمەکێ زوو دا هەموو گوهۆڕینان بکەت.
