ئەردۆغان یێ نەچارە خوە ژ پارتا بزاڤا نەتەوەپەرست دوور بکەت
نڤیسەر و ڤەکۆلەرەکێ ناڤدار یێ تورکیا دیار دکەت، د هەلبژارتنێن هەری دووماهیێ دا ل تورکیا دیار بوو، نەتەوەپەرستان پێگەهێ خوە یێ جاران نەماینە، هەروەسا ژ بەر پەیوەندیێن ل گەل پارتا نەتەوەپەرست پێگەهێ ئاکپارتیێ ژی لاواز بوویە.
موراد یێتکین نڤیسەر و ڤەکۆلەرێ ناڤدار یێ تورکیا دیار کر، پشتی هەلبژارتنێن باژێرڤانیان ل ٣١ ئادارا ئەڤسالە دیار بوو، پارت و ئالیێن نەتەوەپەرست ل تورکیا پێگەهێ خوە یێ جاران نەماینە، راستە چەند سالن ئەردۆغان و ئاکپارتی شیان ب رێیا رێککەفتنا ل گەل پارتا بزاڤا نەتەوەپەروست ئانکۆ مەهەپێ بگەهنە گەلەک تشتان و دەستهەلاتا خوە بپارێزن، لێ نها رەوش هاتیە گوهۆڕین و گەلەک ژ ئەندامێن سەرکردایەتیا ئاکپارتیێ د کۆمبوونا هەری دووماهیێ دا داخواز ژ ئەردۆغانی کرینە کو پێداچوونێ د پەیوەندیێن ل گەل مەهەپێ دا بکەت، چونکی ژ بەر هەڤپەیمانیا ل گەل مەهەپێ زیانێن گەلەک مەزن گەهشتینە ئاکپارتیێ و هەروەسا مەهەپە بوویە ئاستەنگەکا مەزن ل هەمبەر پرۆژێن نوو یێن ئاکپارتیێ، ژ بەر ڤێ یەکێ ژی دڤێت ئاکپارتی خوە ژ مەهەپێ دوور بکەت.
ناڤهاتی ئەو یەک ژی دیار کریە، نها ئەردۆغان گەلەک تەنگاڤ بوویە، ژ ئالیەکێ دەنگێن ئاکپارتیێ گەلەک کێم بووینە، پێگەهێ خوە یێ جاران نەمایە، د ناڤ سەرکردایەتیا ئاکپارتیێ دا ژی گەلەک ناکۆکی سەبارەت ب هەڤپەیمانیا ل گەل مەهەپێ هەنە، ژ بەر ڤێ یەکێ ژی ئەردۆغان نەچارە هندەک گوهۆڕینان بکەت، لێ ئەو یەک یا ب ساناهی نابیت، چونکی تێکدانا هەڤپەیمانیا ل گەل مەهەپێ دشێت هندەک کاریگەریێن خوە یێن خراب ژی بۆ ئاکپارتیێ هەبیت، لێ هەر چاوا بیت ئاکپارتی و ئەردۆغان نەچارن هندەک گوهۆڕینێن مەزن بکەن، چونکی نها پتر ژ هەر دەمەکێ پارتا کۆماری یا بهێز دکەڤیت و ل گۆر گەلەک راپرسیان هەکە نها ل تورکیا هەلبژارتنێن پەرلەمانی بهێنە کرن پارتا کۆماری دێ بیتە پارتا ئێکێ و ئەو یەک ژی دهێنە رامانا نەمانا ئاکپارتیێ و ژناڤچوونا دەستهەلاتا ئەردۆغانی.
موراد یێتکین ئەو یەک ژی دیار کریە، مەهەپە ناهێلیت ئاکپارتی ژ بۆ چارەسەرکرنا پرسا کوردی دەست ب چو بزاڤێن نوو بکەت، ژ بەر هەڤپەیمانیا ل گەل مەهەپێ د هەلبژارتنێن ڤێ دووماهیێ دا کوردان دەنگێ خوە نەدانە ئاکپارتیێ، ئانکۆ رێژەیەکا مەزن ژ دەنگدەرێن کورد خوە ژ ئاکپارتیێ دوور کرینە، ژ بەر ڤان ئەگەران ژی ئاکپارتیێ دڤێت دەست ب قۆناغەکا نوو بکەت، دڤێت کوردان نێزیکی خوە بکەت، ژ بەر ڤێ یەکێ ژی گەلەک یا گرنگە ئاکپارتی خوە ژ مەهەپێ دوور بکەت، لێ ئەنجامێن ژناڤچوونا هەڤپەیمانیا ل گەل مەهەپێ دێ بۆ ئاکپارتیێ چ بیت ئەو یەک ژی بابەتەک جودایە، لێ تشتێ نها دیارە سەرکردێن ئاکپارتیێ دخوازن ئێدی هەڤپەیمانیا ل گەل پارتا بزاڤا نەتەوەپەرست بهێتە هەلوەشاندن، لێ تنێ ئەردۆغان دشێت بریارەکا وەسا چارەنڤیساز بدەت.
