دڤێت پەیوەندیێن خوە ل گەل تورکیا باش بکەین
فەرماندارێ گشتی یێ هێزێن سووریا دیموکرات راگەهاند دەستێوەردانێن دەرەکی رەوشا سووریێ ئالۆزتر لێ کریە، وان دڤێت پەیوەندیێن خوە ل گەل هەموو وەلاتێن جیران ب تایبەتی ژی تورکیا باش بکەن و ئەو یەک د خزمەتا هەموو سووریێ دایە.
مەزلوم عەبدی فەرماندارێ گشتی یێ هێزێن سووریا دیموکرات ل باژێرێ حەسەکێ یێ رۆژئاڤایێ کوردستانێ د کۆمبوونەکێ دا ل گەل سەرۆک هۆزێن وی باژێری دیار کر، رەوشا سووریێ گەلەک یا هەستیارە، مخابن د چەند سالێن بۆری دا دەستێوەردانێن دەرەکی وەسا کرن کو رەوشا سووریێ خرابتر لێ بهێت، نها پێدڤیا سووریێ ب دەستپێکرنا قۆناغەکا نوو هەیە، پێدڤیا سووریێ و رۆژئاڤایێ کوردستانێ ب ئاشتیێ و ئارامیێ و پێشڤەچوونا رەوشا ئابووری هەیە، ژ بۆ ڤێ یەکێ ژی گەلەک یا گرنگە هەموو وەلاتێن دەڤەرێ رێزێ ل داخوازیێن گەلێ سووریێ بگرن و ئێدی دەستێوەردانێ نەکەن.
ناڤهاتی سەبارەت ب پەیوەندیێن ل گەل تورکیا ژی راگەهاند، مە دڤێت پەیوەندیێن خوە ل گەل تورکیا باش بکەین، ئالۆزیێن ل گەل تورکیا د خزمەتا مە و تورکیا دا نینن، بەلکو رەوشا نها وەسا دڤێت ئەم پێکڤە دەست ب قۆناغەکا نوو بکەین، تورکیا ب شەڕی و ئۆپەراسیۆنێن سەربازی نەشێت هاریکاریا سووریێ بکەت، بەلکو هەلوەستێ چەند سالێن بۆری یێن تورکیا وەسا کر رەوشا سووریێ گەلەک ئالۆز ببیت و گۆت: (ئەز باوەرم بەرپرسێن تورکیا ژی نها باش دزانن ئالۆزبوونا رەوشا سووریێ د خزمەتا وان دا نینە، ژ بەر ڤێ یەکێ گەلەک یا گرنگە تورکیا ژی پێداچوونێ د سیاسەتا خوە ل هەمبەر سووریێ و رۆژئاڤایێ کوردستانێ دا بکەت، مە نەڤێت دژبەریا تورکیا بکەین، بەلکو مە دڤێت ل گەل تورکیا دەست ب قۆناغەکا نوو بکەین، دڤێت تورکیا ژی کار بۆ دەستپێکرنا قۆناغەکا نوو ل گەل رۆژئاڤایێ کوردستانێ بکەت و راستیا هەی ژی قەبوول بکەت).
فەرماندارێ گشتی یێ هێزێن سووریا دیموکرات د دووماهیا ئاخڤتنا خوە دا ئەو یەک ژی دیار کر، ئالۆزی و شەڕێ چەند سالێن بۆری ل سووریێ کاریگەریا خوە یا گەلەک خراب ل هەموو دەڤەرێ کریە، هەموو وەلاتێن دەڤەرێ دیتن شەڕ و ئالۆزی د بەرژەوەندیا وان دا نینە، ب تایبەتی ژی ئالۆزیێن ل سووریێ گەلەک کاریگەریا خوە ل رەوشا ناڤخوەیی یا تورکیا ژی کریە، ژ بەر ڤێ یەکێ ژی ئەم دبێژین دڤێت هەموو وەلاتێن جیهانێ ب تایبەتی ژی وەلاتێن رۆژهەلاتا ناڤین و وەلاتێن جیرانێن سووریێ کار بۆ دەستپێکرنا قۆناغەکا نوو ل گەل سووریێ و رۆژئاڤایێ کوردستانێ بکەن، ژ بۆ ڤێ یەکێ مە دڤێت ل گەل تورکیا پەیوەندیێن خوە باش بکەین و هەموو پرسێن هەی ژی چارەسەر بکەین، ئەو یەک د بەرژەوەندیا تورکیا و هەموو وەلاتێن رۆژهەلاتا ناڤین دایە.
