سەرۆکێ جەهەپێ دێ سەرەدانا دەمیرتاشی کەت
ئوزگۆر ئۆزەل سەرۆکێ گشتی یێ پارتا کۆماریا گەل دوهی راگەهاند کو ئەو دێ د دەمەکێ نێزیک دا سەرەدانا سەلاحەدین دەمیرتاشی ل زیندانێ کەت، چونکی سزایێ ل سەر دەمیرتاشی هاتیە سەپاندن سیاسی یە و ئەو یەک شەرمەکا مەزنە بۆ تورکیا و دڤێت دەمیرتاش و هەڤالێن وی بهێنە ئازاد کرن.
سەرۆکێ گشتی یێ پارتا کۆماریا گەل ئەو یەک ژی دیار کر، وەکو پارتا کۆماری وان بەری نها ژی دیار کرینە بریارێن دادگەهێ یێن سەبارەت ب دەمیرتاشی و هەڤالێن وی بنپێکرنا قانوونێن تورکیا یە و دڤێت دادگەه پێداچوونێ د بریارێن خوە دا بکەت، مخابن چونکی دادگەه ژی کەفتینە ژێر کۆنترۆلا ئەردۆغانی بریارێن دادگەهێ ژی مخابن سەربخوە نینن.
چاڤدێرێن سیاسی ژی ل تورکیا دیار دکەن، ئارمانجا سەرەکی یا پارتا کۆماری ئەوە دا بشێت پتر پشتەڤانیا کوردان بدەستڤە بینیت، چونکی د هەلبژارتنێن ٣١ ئادارێ پارتا کۆماری شیا ب دەنگێن کوردان ل گەلەک باژێرێن مەزن یێن تورکیا سەرکەفتنێن مەزن تۆمار بکەت، هەلوەستێ نها یێ پارتا کۆماری ژی بۆ بدەستڤەئینانا دەنگ و پشتەڤانیا کوردانە.
