تورکیا مەرجێن خوە بۆ ڤەکێشانێ ژ سووریێ راگەهاندن
وەزیرێ بەرگریێ یێ تورکیا راگەهاند، هندی ل سەر سنۆرێ وان ل گەل سووریێ مەترسی ل سەر تورکیا هەبیت دێ هێزێن وان ل سووریێ مینن، هەکە ڤەکێشانەک ژی هەبیت دڤێت ل سەر بنەمایێ رێککەفتنەکێ ل گەل شامێ بیت و هەتا داخوازیێن تورکیا نەهێنە قەبوول کرن ئەو دێ ل سووریێ مینن.
یاشار گولەر وەزیرێ بەرگریێ یێ تورکیا د داخۆیانیەکێ دا بۆ رۆژناما سەباح یا تورکیا دیار کر، نها ل باکورێ سووریێ بەحسێ هەلبژارتنان دهێتە کرن، ئەو یەک ب چو رەنگەکێ ناهێتە قەبوول کرن، نابیت هێزەکا تیرۆرستی کو هەردەم مەترسیە بۆ تورکیا ل پشکەک ژ ئاخا سووریێ بێی رازیبوونا شامێ و نەتەوەیێن ئێکگرتی هەلبژارتنان بکەت، ئەو یەک مەترسیەکا گەلەک مەزنە و گۆت: (وەکو تورکیا ئەم ب چو رەنگەکێ قەبوول ناکەین هەلبژارتن ل باکورێ سووریێ بهێنە کرن، نها ئەم ژ نێزیکڤە دووڤچوونا رەوشێ دکەین، براستی ژی یا نها ل باکورێ سووریێ روو ددەت مەترسیەکا گەلەک مەزنە، بەری نها ژی وەکو تورکیا مە دیار کریە، هەتا مەترسی ل سەر تورکیا هەبن دڤێت هێزێن تورکیا ل سووریێ بمینن).
یاشار گولەر ئەو یەک ژی دیار کر، جارێ چو بەرنامێن تورکیا نینن کو ژ ئاخا سووریێ دەرکەڤیت، چونکی مەترسی ل سەر ئاسایشا تورکیا هەنە، ل سەر سنۆرێ سووریێ مەترسیەکا مەزن ل سەر ئاسایشا تورکیا هەیە، هێزێن تورکیا ژی ل سووریێ ژ بۆ پاراستنا ئاسایشا تورکیا هەنە، هەتا مەترسی ل سەر تورکیا هەبن ژی دڤێت هێزێن تورکیا ل سووریێ بمینن و گۆت: (هەکە رەوشا سووریێ یا ئارام بیت، هەکە چو مەترسی ل سەر تورکیا نەمان و هەروەسا شامێ جارەکا دی شیا حوکمێ ل هەموو سووریێ بکەت و سنۆرێن خوە بپارێزیت و نەهێلیت چو مەترسی ل سەر ئاسایشا تورکیا هەبن وی دەمی وەکو تورکیا ئەم دشێین ب رێککەفتنەکا نوو ل گەل شامێ هەموو هێزێن خوە ژ ئاخا سووریێ ڤەکێشین، لێ نها رەوشەکا وەسا نینە و ژ بەر ڤێ یەکێ ژی ئەم دبێژین وەکو تورکیا جارێ د بەرنامێ مە دا نینە کو هێزێن خوە ژ ئاخا سووریێ ڤەکێشین).
سەبارەت ب ئۆپەراسیۆنەکا نوو یا تورکیا بۆ سەر باکورێ سووریێ ژی ناڤهاتی راگەهاند، هێزێن مە هەموو دەمەکێ بەرهەڤن، هەر دەمێ پێدڤی بیت دێ ئۆپەراسیۆن هێتە کرن، وەکو تورکیا هەردەم ئەم بۆ پاراستنا سنۆرێ خوە بەرهەڤین، ژ بەر ڤێ یەکێ ژی هەر دەمێ پێدڤی بیت ل باکورێ سووریێ دێ دەست ب ئۆپەراسیۆنەکا نوو هێتە کرن، تورکیا ژ بۆ پاراستنا ئاسایشا خوە دەستووریێ ژ کەسێ وەرناگریت و هەر دەمێ پێدڤی بیت دێ دەست ب ئۆپەراسیۆنەکا نوو ل دژی یەپەگێ و هێزێن سووریا دیموکرات هێتە کرن.
