سیاسەتا قەیۆمان دێ تورکیا تووشی ئالۆزیێن نوو کەت
هەڤسەرۆکێ باژێرڤانیا مێردینێ راگەهاند، مخابن جارەکا دی دەستهەلاتێ دڤێت ب قەیومان باژێرڤانیێن باکورێ کوردستانێ برێڤە ببەت، سیاسەتا قەیومان بەری نها ژی چو پرسەک چارەسەر نەکریە و ڤێجارێ ژی دێ بیتە ئەگەرێ ئالۆزیێن نوو ل تورکیا.
ئەحمەد تورک هەڤسەرۆکێ باژێرڤانیا مەزن یا مێردینێ راگەهاند، مخابن دەستهەلاتا نها رەوشا هەی ئالۆزتر لێ دکەت، جارەکا دی دەستهەلاتێ دڤێت سەرۆکێ باژێرڤانیان یێن کو ب دەنگ و ئیرادا کوردان هاتینە هەلبژارتن ژ کاری دوور بکەت و جارەکا دی قەیومان ل جهێ وان دانێت، ئەو یەک چو پرسەکێ چارەسەر ناکەت و ب تەمامی ل دژی دیموکراسیێ یە، سیاسەتا قەیومان دێ ناڤێ تورکیا ژی ل ئاستێ نێڤدەولەتی خراب کەت، ل چ جهەکێ ل جیهانێ دا نینە کەسەک ب دەنگێ خەلکی بهێتە هەلبژارتن و پاشی دەستهەلات وی ژ کاری دوور بکەت و کەسەکێ دی ب جهێ وی دانێت، ئەڤە تنێ ل تورکیا هەیە و گۆت: (سیاسەتا قەیومان دێ کوردان پتر ژ ئاکپارتیێ دوور کەت، د هەلبژارتنێن هەری دووماهیێ دا ئاکپارتی تووشی شکەستنەکا مەزن هات و کوردان دەنگێ خوە نەدا ئاکپارتیێ، ب هەلوەست و سیاسەتا خوە یا نها ئاکپارتی دێ پتر کوردان ژ خوە دوور کەت و ئەو یەک ژی دێ پرسێن هەی پتر ئالۆز کەت).
ناڤهاتی ئەو یەک ژی دیار کر، بەرپرسێن ئاکپارتیێ هەر رۆژ بەحسێ قانوونێ دکەن، لێ ئەو بخوە قانوونێ بنپێ دکەن، چاوا دبیت هوون سەرۆکێ باژێرڤانیان ژ کاری دوور بکەن و کەسەکێ دی وەکو قەیومان ب جهێ وی دانێن؟ هەکە هەوە دڤێت ب قەیومان باژێرڤانیان برێڤە ببەن پا بۆچی هوون هەلبژارتنان دکەن؟ براستی ژی رەوشا نها یا تورکیا و ب تایبەتی ژی سیاسەتا دەستهەلاتێ ل هەمبەر کوردان گەلەک خرابە، چونکی قەیوم وەکو کارتەکێ ل دژی ئیرادا گەلێ کورد ل تورکیا دهێتە بکارئینان و ئەو یەک ژی زۆرداریەکا مەزنە کو دەستهەلاتا ئاکپارتیێ ل کوردان دکەت و رێزێ ل ئیرادا خەلکی ناگریت.
هەڤسەرۆکێ باژێرڤانیا مەزن یا مێردینێ ئەو یەک ژی دیار کر، راستە بەری نها ژی قەیوم هاتنە دانان لێ پشتی کو ئەردۆغانی بەحسێ گوهۆڕینان کر، وەکو پارتا دەم و وەکو گەلێ کورد ئەم چاڤەرێ بووین کو ئێدی ئەو دەست ژ سیاسەتا دانانا قەیومان بەردەن، لێ مخابن جارەکا دی شاشیێن بەری نها دوبارە دکەن، قەیومان د چەند سالێن بۆری دا زیانێن گەلەک مەزن گەهاندینە باژێرێن کوردان، قەیومان خزمەتا گەلێ کورد نەکرن و ژ بەر ڤێ یەکێ ژی ئەم سیاسەتا قەیومان ب توندی رەت دکەین و گۆت: (هێڤیدارین دەستهەلاتا نها ئێدی دەست ژ سیاسەتا خوە یا شاش ل دژی گەلێ کورد بەردەت، ب جهێ قەیومان بلا رێزێ ل دەنگێ خەلکی بگرن، ب جهێ شەری و توندوتیژیێ بلا کار بۆ ئاشتیێ و چارەسەرکرنا پرسا کوردی بکەن).
