ئۆپۆزسیۆنا تورکیا داخوازا هەلبژارتنێن پێشوەخت دکەت
سەرۆکێ پارتا کۆماریا گەل راگەهاند، دەستهەلاتا نها نەشێت وەلاتی برێڤە ببەت و تورکیا تووشی قەیرانەکا گەلەک مەزن بوویە، دڤێت هەلبژارتنێن پێشوەخت ل تورکیا بهێنە کرن و ل ئالیێ دی هەڤسەرۆکێ پارتا دەم ژی راگەهاند ئەو ژی داخوازا هەلبژارتنێن پێشوەخت یێن پەرلەمانێ تورکیا دکەن.
ئۆزگور ئۆزەل سەرۆکێ گشتی یێ پارتا کۆماریا گەل راگەهاند، رەوشا تورکیا گەلەک خرابە، ب تایبەتی ژی رەوشا ئابووری، وەلاتی د رەوشەکا گەلەک خراب دا دژین، مخابن دەستهەلاتا نها ژی چو پرۆژە ژ بۆ باشکرنا رەوشا ژیانا وەلاتیان نینە، ئەو یەک ژی نیشا ددەت دڤێت وەکو پارتا هەری مەزن یا ئۆپۆزسیۆنێ ئەم ل چارەسەریێ بگەرین، وەکو پارتا کۆماری مە دڤێت هەلبژارتنێن پێشوەخت یێن پەرلەمانێ تورکیا بهێنە کرن و گۆت: (هەکە نها هەلبژارتنێن پەرلەمانی بهێنە کرن، وەکو پارتا کۆماری ئەم دێ بینە پارتا ئێکێ و دێ دەست ب قۆناغەکا نوو ل تورکیا کەین، براستی ژی پێدڤیا تورکیا ب دەستهەلاتەکا نوو، دەستهەلاتەکا بهێز و پاقژ هەیە، بەرپرسێن ئاکپارتیێ ژ بەر گەندەلیێ ئاگەه ژ ژیانا خەلکی نەماینە، ئەو تنێ کار بۆ بەرژەوەندیێن خوە دکەن، ژ بەر ڤێ یەکێ ژی تورکیا د قەیرانەکا گەلەک مەزن یا ئابووری دایە و هەتا نها ژی دەستهەلاتێ چو پرۆژە بۆ چارەسەریێ نینن).
سەرۆکێ گشتی یێ پارتا کۆماریا گەل ئەو یەک ژی دیار کر، د هەلبژارتنێن هەری دووماهیێ یێ باژێرڤانیان دا خەلکێ تورکیا پشتەڤانی ل پارتا کۆماری کرن، ئێدی باوەریا خەلکی ب ئاکپارتیێ نەمایە، ئاکپارتیێ نەشیا قەیرانا ئابووری ل تورکیا چارەسەر بکەت و گەلەک ئاریشێن دی ژی بۆ خەلکی دروست کرینە، ژ بەر ڤێ یەکێ ژی دەم یێ هاتی هەلبژارتنێن پێشوەخت ل تورکیا بهێنە کرن، دڤێت پارتێن دی یێن ئۆپۆزسیۆنێ ژی ل گەل مە بن و ئەم پێکڤە فشارێن خوە ل سەر دەستهەلاتێ زێدە بکەین دا هەلبژارتنێن پێشوەخت یێن پەرلەمانی ل تورکیا بهێنە کرن، چونکی دەستهەلاتا نها نەشێت تورکیا برێڤە ببەت و هەر رۆژ ئاریشێن نوو بۆ وەلاتیان دروست دکەت.
ل ئالیێ دی تونجەر باکرخان هەڤسەرۆکێ پارتا دەم ژی د داخۆیانیەکێ دا بۆ دەزگەهێن راگەهاندنا تورکیا دیار کر، ئاکپارتیێ دڤێت ب زۆرێ جارەکا دی باژێرڤانیان ژ دەستێ کوردان دەرخینیت، دەست ب دانانا قەیومان کرینە، ئەو یەک بنپێکرنا قانوونێ و ئیرادا خەلکی یە، گەلێ کورد ل تورکیا ئێدی قەبول ناکەت بێ رێزی ل ئیرادا وی بهێتە کرن و گۆت: (دەستهەلاتا نها نەشێت چو پرسەکێ چارەسەر بکەت و هەر رۆژ ژیانا خەلکی خرابتر دبیت، وەکو پارتا دەم مە دڤێت هەلبژارتنێن پێشوەخت یێن پەرلەمانێ تورکیا بهێنە کرن، چونکی پێدڤیا تورکیا ب گوهۆڕینێن مەزن هەیە و دەستهەلاتا نها ژی نەشێت چو گوهۆڕینان بکەت).
