پێشمەرگە دێ ھاریکاریا حەشد شەعبی کەت
ئەڤرۆ:
بەرپرسەکێ پارتی دیموکراتی کوردستان ل کەرکووکێ راگەھاند، دوھی ھێزێن پێشمەرگەی سێ گوندێن گرنگ یێن کوردان ژ تیرۆرستێن داعشێ رزگارکرن و بڕیارە بۆ کۆنترۆلکرنا گوندێ بەشیر یێ شیعەیان ژی، پێشمەرگە ھاریکاریا حەشد شەعبی بکەت.
مەحەمەد کەمال، بەرپرسێ لقا سێ یا پارتی دیموکراتی کوردستان ل کەرکووکێ بۆ رۆژناما ئەڤرۆ گۆت” دوھی ھێرشێن ھێزێن پێشمەرگەی بۆ سەر دەڤەرێن بن کۆنترۆلا داعشێ ل سنورێ دەوروبەرێ کەرکووکێ بەردەوامی ھەبوو، ئەڤ ھێرشا دوھی یا گرنگبوو بۆ کۆنترۆلکرنا وان سێ گوندێن سەر ب قەزا داقووقێ ڤە، ژ بەر کو ئێک ژوان گوندان ب ناڤێ (وەحدە) ب تنێ ٣٠٠ مەتران ژ جادەیا سەرەکیا (کەرکووک – بەغدا) یێ دوور بوو، دڤێ ھێرشێ دا پێشمەرگەی ب ھەڤکاریا فرۆکێن ھەڤپەیمانان شیا ددەمەکێ کێم دا، ھەرسێ گوندێن (وەحدە – سەعد و خالد) ژ تیرۆرستێن داعشێ پاقژ بکەن و ئەو ھەر سێ گوند ئەردێ کوردانە و ل سالا ١٩٧٣ ھاتبوونە تەعریبکرن ژ لایێ رژێما بەعس ڤە، لەوما پشتی کۆنترۆلکرنێ ناھێنە چۆلکرن ژلایێ ھێزێن پێشمەرگەی ڤە و ناھێلین جارەکادی عەرەب بھێنە وان گوندان”.
ل دۆر کۆنترۆلکرنا قەزا حەویجە و ناحیێن ریاز و رەشاد، ڤی بەرپرسێ پارتی گۆت” پێدڤیە ئەو دەڤەرێن ھەتا نوکە ل بن کۆنترۆلا تیرۆرستێن داعشێ ماین بھێنە رزگارکرن، پلانا کۆنترۆلکرنا قەزا حەویجە و ناحیێن ریاز و رەشاد ھێشتا نەھاتیە دانان، بەری نوکە پلانەک ھەبوو ژلایێ تکریتێ و دۆز ڤە بھێنە دناڤ حەویجە دا، بەلێ ئەو پلان یا سەرکەفتی نەبوو، جارێ ھێشتا چو پلانێن دی نینن و قۆناغا پشتی رزگارکرنا گوندێن نێزیکی کەرکووکێ دێ بۆ کۆنترۆلکرنا وان دەڤەران بیت یێن من ئاماژە بۆ کری”.
مەحەمە کەمال دیارکر، ئەڤە بۆ دەمێ چەند رۆژانە میلیشیاتێن شیعی و حەشد شەعبی گوندەکێ شیعەنشین ب ناڤێ (بەشیر) یێ دۆرپێچکری و نەشێن کۆنترۆل بکەن کو یێ نێزیکی باژێرێ کەرکووکێ یە و ھێلینا تیرۆرستێن داعشە، بەلێ ھێشتا میلیشیاتێن شیعی و لەشکرێ عیراقێ نەشیاینە بچنە دناڤ گوندی دا، ئەڤە سەرەرای پشتەڤانیا فڕۆکێن عیراقێ، لێ شیانێن کۆنترۆلکرنێ نینن و پێدڤی ب پشتەڤانیا ھێزا پێشمەرگەی یا ھەی، لەوما دڤێت پێشمەرگە ھەڤکاریا (حەشد شەعبی) بکەن و بڕیارە ژی بۆ کۆنترۆلکرنا گوندێ (بەشیر) ھێزێن پێشمەرگەی ھاریکاربن، ئەگەرێ سەرەکیێ کۆنترۆلنەکرنا بەشیر بۆ نەبوونا ئەزموونا شەڕێ داعشێ یە، چونکو چەکدارێن داعشێ تەکتیکا خوە یا شەڕی یا ھەی و ھێزێن پێشمەرگەی، ھەتا نوکە ب شارەزایی شیاینە شەڕێ داعشێ بکەن و سەرکەفتنێ ل سەر تۆمار بکەن”.
