پارێزگارێ دهۆكێ: دڤێت هەلبژارتن ل دووڤ یاسایێن كومسیۆنێ و ب رەنگەكێ ئازاد بهێنە ئەنجامدان
د. عەلی تەتەر، پارێزگارێ دهۆكێ دوهی 18/9/2024 پێشوازی ل شاندەكێ لیژنا سەرپەرشتیكرنا هەلبژارتنان ل پارێزگەها دهۆكێ كر، كو پێكهاتبوو ژ د. فەتاح محەمەد حسێن، ئەندامێ جڤاتا كومسیۆنێ و سەرۆكێ لژنێ و عەلی فەیسەل دەحام، ئەمیندارێ گشتی یێ جڤاتا كومسیۆنێ یێ لیژنا سەرپەرشتیكرنا هەلبژارتنان ل پارێزگەهێ و خالد عەباس، بەرپرسێ لقێ دهۆك یێ كومسیۆنا بلندا هەلبژاتنان كر.
د هەڤدیتنەكێ دا بەحسێ رەوشا پارێزگەها دهۆكێ و بەرهەڤیێن دهێنە كرن بۆ هەوا ئەنجامدانا هەلبژارتنێن پەرلەمانێ كوردستانێ و پێرابوونێن ئەمنی و كارگێری ل سنوورێ پارێزگەهێ بۆ سەرئێخستنا وێ پرۆسێسا دیموكراتی هاتە كرن.
نوونەرێن كومسیۆنێ خوشحالیا خۆ هەمبەر وێ هەڤكاری و هاریكاریا د ناڤبەرا لقێ دهۆك یێ كومسیۆنێ و پارێزگەها دهۆكێ دا هەی دیاركر و خواست، ئاستێ وێ هەڤكاریێ پتر لێ بهێت بۆ وێ یەكێ پارێزگەها دهۆكێ هەر بمینیت ل ئاستێ نایاب وەكو هەلبژاتنێن سالێن دەربازبووی، كو پاقژترین هەوێن هەلبژارتنان لێ هاتبوونە ئەنجامدان.
پارێزگارێ دهۆكێ خوشحالیا خۆ ب سەرەدانێ دیاركر و تەكەزكر، كو ل دووڤ راسپاردێن حوكمەتا هەرێما كوردستانێ، دڤێت هەلبژارتن ل دووڤ یاسا و رێنمایێن كومسیۆنا بلند یا سەربخۆ یا هەلبژارتنان ب رەنگەكێ ئازاد و دیموكراتی بهێنە ئەنجامدان و بەرهەڤیا پارێزگەهێ بۆ هەر هاریكاریەكێ دیاركر.
دیسا هەر دوهی 18/9/2024 ل كۆچكا مێهڤانداریان د. عەلی تەتەر، پارێزگارێ دهۆكێ پێشوازی ل ئیرمان تویجۆ، قونسلێ وەلاتێ توركیا ل هەرێما كوردستانێ و شاندێ د گەل دا كر و د هەڤدیتنەكێ دا بەحسێ رەوشا دەڤەرێ و بەرنامێن حوكمەتا هەرێما كوردستانێ یێن ئاڤەدانكرنێ و رۆلێ كۆمپانیێن توركی د ڤی بیاڤی دا و پەیوەندیێن دێرین یێن كلتۆری و ئابووری و بازرگانی و چاوانیا پێشئێخستنا هەموو جۆرێن پەیوەندیان هاتە كرن.
