بەرێ بنیاتی بۆ جاددەیا رۆژئاڤایێ دهۆكێ ب رۆژهەلاتێ سێمێلێ ڤە گرێ ددەت هاتـە دانان
ب مەرەما گرنگیدان ب گەهاندنا پڕۆژەیێن خزمەتگوزاری بۆ هەموو دەڤەران، ل سنوورێ پارێزگەها دهۆكێ، د. عەلی تەتەر، پارێزگارێ دهۆكێ ب ئامادەبوونا د. نەوزاد عەبدوللا، بەرپرسێ لقێ ئێك یێ پارتی و دەڤەردارێن دهۆكێ و سێمێلێ و چەندین بەرپرسێن حزبی و ئیداری و خەلكێ دەڤەرێ دوهی 18/9/2024 بەرێ بنیاتی بۆ چێكرنا جۆتسایدێ ژ رۆژئاڤایێ دهۆكێ، هەر ژ فلكا زركا هەتا دگەهیتە شوقەیێن فرەنسی2 ل نێزیك جاددەیا 60 متری ل كۆمەلگەها تەناهیێ دانا.
پارێزگارێ دهۆكێ د رێورسمێن دانانا بەرێ بنیاتی دا سوپاسیا مەسرور بارزانی، سەرۆكێ حوكمەتا هەرێما كوردستانێ كر، كو هەردەم داكوكیێ ل دابینكرنا پڕۆژەیێن خزمەتگوزاری بۆ هەموو دەڤەران دكەت و گۆت: «ب چێكرنا ڤێ قووناغا رێكێ ب دەهان هزار وەلاتی دێ مفای ژێ بینن و ل قووناغێن د دووڤ دا ئەڤ رێكە ب رێكا سەرەكی یا گوندێ سێجێ ب سەنتەرێ سێمێلێ ڤە دێ هێتە گرێدان، دیسا پڕۆژە ل سەر بودجەیا پارێزگەها دهۆكێ ب گوژمێ هەشت ملیار و 169 ملیۆن دیناران، ب درێژاهیا دو كیلۆمەتر و 100 مەتران دێ هێتە بجهئینان».
پارێزگاری گۆتژی: «ل ڤان رۆژان ب گوژمێ پتری 50 ملیار دیناران پڕۆژە ل سنوورێ دەڤەرداریێن دهۆكێ و سێمێلێ و شێخان هاتینە راگەهاندن، ل رۆژێن بهێن گەلەك پڕۆژە بۆ دەڤەرداریێن ئاكرێ و ئامێدیێ و بەردەڕەشێ ژی دێ هێنە راگەهاندن، كو هەموو بیاڤان بخوەڤە دگرن و ب چێكرنا ڤان پڕۆژەیان گورانكاریێن بەرچاڤ دێ ل هەموو دەڤەران پەیدا بن».
